Wanpela Man Bilong Is Esia Long Itali Bilong Bipo
INAP 2,000 yia i go pinis, olsem wanem wanpela man bilong Is Esia i go kamap long hap em Gavman Rom bilong bipo i bin bosim? Ol saveman bilong digim graun i laik save long bekim bilong dispela askim taim ol i painim wanpela narapela kain samting long hap saut bilong Itali long 2009.
Ol i painim dispela samting long wanpela matmat bilong ol Rom bilong bipo long Vagnari, em ples i stap longwe inap 60 kilomita long hap wes bilong Bari. Ol i bin painim ol bun bilong 75 man. Ol i wokim ol tes long ol dispela bun na painimaut olsem planti bilong ol dispela man, mama i bin karim ol long ol ples i stap klostu. Tasol ol man bilong mekim wok painimaut i kirap nogut long bun bilong wanpela man. Taim ol i skelim jin samting (mitochondrial DNA) bilong dispela man, ol i lukim olsem lain tumbuna long sait bilong mama bilong em i kam long Is Esia.a Ol bun bilong em i kamapim olsem em i bin stap long yia 100 o 200 C.E. samting. Wanpela ripot i stori long dispela wok painimaut i tok, “dispela em i namba wan taim we ol i painim ol bun bilong wanpela man bilong Is Esia long ol hap em Gavman Rom i bin bosim.” Olsem na dispela man em i husat?
Dispela ripot i tok: “Pastaim ol i ting dispela man i bin insait long wok bisnis bilong slika i bin kamap namel long Saina na Rom.” Tasol ol i tingim olsem ol man bilong mekim kain wok bisnis i bin yusim ol namelman bilong salim ol samting, na i no gat wanpela man i bin raun inap 8,000 kilomita namel long Saina na Itali.
Dispela ples we ol i bin painim ol bun i givim wanem save long yumi? Long bipo, Vagnari em wanpela ples ol empera i bin bosim, na ol wokboi nating i save kukim ain na wokim ol tail long dispela hap. Planti bilong ol dispela wokboi ol i sleiv, olsem na ating dispela man bilong Esia tu em i wanpela sleiv. Matmat bilong em i soim olsem em i no wanpela maniman. Ol samting bilong em i stap long matmat em wanpela sospen tasol, na i gat narapela bodi ol i planim antap long em.
Bilong wanem yumi laik save long dispela samting ol i bin painim? Long taim bilong ol aposel, tok bilong lotu Kristen i go long ol hap we ol lain bilong bipo i raun long en. Baibel i tok bihain long Pentikos 33 C.E., ol man bilong ol narapela ples husat i bin kam long Jerusalem ol i kisim gutnius i go long ol longwe hap. (Aposel 2:1-12, 37-41) Ol bun bilong dispela man i kamapim klia olsem long dispela taim bipo sampela man bilong Is Esia i bin raun i kam long hap bilong Mediterenian.b
[Ol Futnot]
a Dispela wok painimaut long jin (mitochondrial DNA) i no inap kamapim ol samting bilong lain tumbuna long sait bilong papa bilong em.
b Na tu, i gat ol samting i kamapim olsem ol lain bilong Wes i bin raun i go long Is Esia. Lukim stori “Ol Misineri Inap i Go Long Hap Is Inap Long Wanem Mak?” long Wastaua bilong Janueri 1, 2009.
[Mep long pes 29]
ROM
Vagnari
Solwara Mediterenian
IS ESIA
SOLWARA PASIFIK
[Piksa long pes 29]
Ol bun bilong wanpela man bilong Is Esia em ol i painim long wanpela matmat bilong ol Rom bilong bipo
[Kredit Lain]
© Su concessione del Ministero per i Beni e le Attività Culturali - Direzione Regionale per i Beni Culturali e Paesaggistici della Puglia - Soprintendenza per i Beni Archeologici della Puglia