Wanem Dispela Gutnius?
“Dispela gutnius . . . ”—MATYU 24:14.
OL KRISTEN i mas autim “gutnius bilong Kingdom.” Bilong mekim olsem, ol i mas tokim ol narapela long en, na helpim ol long save olsem dispela Kingdom em i wanpela gavman na em bai bosim graun long stretpela pasin. Tasol Baibel i mekim wok long dispela tok “gutnius” long ol narapela narapela rot tu. Olsem: “Gutnius long God i kisim bek yupela” (Efesus 1:13); “gutnius bilong God” (Rom 15:16); na “gutnius i stori long Jisas Krais.”—Mak 1:1.
Olgeta tok i tru em Jisas i bin autim na ol disaipel bilong em i bin raitim, olgeta i insait long dispela gutnius. Paslain long Jisas i go long heven, em i tokim ol disaipel bilong em: “Yupela i mas i go na kamapim ol disaipel long olgeta lain man, na baptaisim ol long nem bilong Papa na bilong Pikinini na bilong holi spirit. Skulim ol long bihainim olgeta samting mi tokim yupela long mekim.” (Matyu 28:19, 20) Olsem na wok bilong ol Kristen tru em long autim tok bilong Kingdom, na tu, ol i mas wok strong long kamapim ol disaipel.
Ol lotu i mekim wanem bilong bihainim dispela tok? Ol lain husat i no save long Kingdom em wanem samting—na i gat planti man olsem—ol i no inap skulim gut ol man long dispela samting. Tasol ol i save tokim ol man long ol tok ol man i amamas long harim, olsem God i save lusim sin bilong ol, na ol i mas bilip long Jisas. Ol i save mekim kain kain samting bilong pulim ol manmeri i go lotu wantaim ol, olsem ol i mekim wok bilong helpim sindaun bilong ol manmeri, wokim ol haus sik, ol skul, na haus bilong lukautim ol rabisman. Tru, kain wok olsem inap pulim planti man long joinim lotu bilong ol, tasol dispela i no helpim ol manmeri long kamap Kristen tru na wok strong long bihainim ol tok Jisas i skulim ol man long en, nogat.
Wanpela tisa bilong lotu i tok: “Planti saveman na ol bikman insait long ol lotu Kristen i wanbel olsem yumi mas kamapim ol disaipel bilong Jisas na skulim ol long mekim olgeta samting Jisas i bin tok long en. . . . Ol tok bilong Jisas long dispela samting i klia olgeta. Tasol yumi no mekim samting em i tokim yumi long mekim. Yumi no gat tingting liklik long mekim olsem. Na i klia tru olsem yumi no save long mekim olsem.”
Olsem tasol, ol i mekim wanpela wok painimaut long ol Katolik long Amerika, na wok painimaut i soim olsem 95 pesen ol i wanbel olsem wok bilong autim gutnius em hap wok ol i mas mekim long lotu bilong ol. Tasol planti ol i pilim olsem gutpela rot bilong autim gutnius, em long stap gutpela piksa long bihainim ol pasin Kristen long laip bilong ol, na i no gat wok long ol i toktok wantaim ol narapela long dispela samting. Wanpela bilong ol i tok: “Wok bilong autim gutnius i no olsem yumi mas toktok olgeta taim. Yumi yet i mas i stap olsem Gutnius.” Nius U.S. Catholic, em nius i bin mekim wok painimaut, i tok planti man i surik long autim bilip bilong ol long ol narapela, long wanem, “i no longtaim i go pinis lotu i gat nem nogut long pasin sem na samting ol i skulim ol man long en i paul nabaut.”
Long narapela hap, wanpela bisop bilong lotu Metodis i bel hevi na i tok lain bilong lotu bilong em i bruk nabaut na ol i paul na ol i no gat strongpela bel long mekim wok lotu bilong ol na ol i bihainim wankain pasin olsem ol man i stap ausait long lotu. Em i bel hevi na i askim: “Husat tru i gat wok long autim gutnius bilong Kingdom?”
Dispela bisop i no kamapim wanpela bekim long askim bilong em. Tasol i gat bekim i stap. Bai yu painim dispela bekim long stori i kamap bihain long dispela.
[Rait long pes 6]
Gutnius em ol tok long Kingdom Bilong God na God bai kisim bek ol man long rot bilong bilip long Jisas Krais