Yu Ting Em Wanpela Buk Nating?

“God em i as bilong olgeta tok i stap long Rait Holi, na ol i gutpela. . . . Olsem bai wokman bilong God i ken i stap inap tru na redi long mekim olgeta kain gutpela wok.” —2 TIMOTI 3:16, 17.

I NO olgeta man i ting olsem Baibel i gutpela bilong helpim yumi long olgeta samting. Olsem wanem long yu? Wanem tok i stap hia i kamapim tingting yu gat long Baibel?

• Em wanpela buk ol i bin raitim gut

• Em wanpela buk holi

• Em wanpela buk i gat ol stori tumbuna we i kamapim ol skultok

• Em Tok Bilong God

Narapela askim i olsem, Yu ting samting yu bilip long en i bikpela samting? Tingim tok Baibel i mekim long ol tok bilong Baibel yet: “Olgeta tok ol i bin raitim long bipo, ol i bin raitim bilong skulim yumi. Dispela tok i helpim yumi long sanap strong na i mekim isi bel bilong yumi long rot bilong Rait Holi. Na dispela i strongim yumi long wetim gutpela samting.” (Rom 15:4) Olsem na Baibel i tok em i bilong skulim na helpim yumi long wetim gutpela samting i kamap bihain.

Tasol sapos Baibel em i wanpela buk ol i bin raitim gut, o em i wanpela bilong ol buk holi tasol, yu ting bai yu larim dispela buk i skulim na stiaim yu na famili bilong yu, moa yet sapos ol tok bilong en i narapela kain long ol save yu gat pinis? Sapos Baibel em buk i gat ol stori nating tasol, yu ting ol tok promis bilong en inap mekim gut bel bilong yu na helpim yu long wetim ol gutpela samting i kamap bihain?

Planti milion manmeri husat i bin stadi long Baibel ol i bilip tru olsem em i Tok Bilong God. Bilong wanem ol i bilip olsem? Wanem samting i mekim na Baibel i narapela kain long olgeta narapela buk? Long ol stori i kamap bihain, mipela i laik singautim yu long skelim 5-pela samting i mekim na Baibel i narapela kain.