Yu Save Long Dispela?

Ol i kisim we ol ston i dia tumas em ol hetpris bilong Israel i pasim long bros bilong ol?

▪ Bihain long ol Israel i lusim Isip na kamap long ples drai nating, God i tokim ol long wokim laplap i gat ol naispela ston long en bilong pasim long bros. (Kisim Bek 28:15-21) Dispela laplap bilong bros i gat ol dispela ston olsem rubi, topas, emeral, terkois, sapaia, jaspa, lesem, aget, ametis, krisolait, oniks, na jeid.a Tru tru lain Israel i gat ol dispela kain naispela ston?

Long taim bilong ol man i bin raitim Baibel, ol man i laikim tru ol ston i dia tumas na ol i save mekim wok bisnis long en. Olsem, lain Isip bilong bipo i bin kisim ol ston i dia tumas long ol longwe ples olsem Iran, Afganistan, na India. Ol main bilong Isip i save digim na kisim ol kain kain ston i dia tumas. Ol king bilong Isip i save bosim strong wok bilong kisim ol naispela ston long ol hap ol i bosim. Jop i stori long olsem wanem ol wanlain bilong em i save wokim ol bikpela hul long graun na i go daun insait long en bilong painim ol naispela ston i dia tumas. Jop i stori long ol samting ol i digim long graun na em i kolim stret nem bilong ston sapaia na topas.—Jop 28:1-11, 19.

Buk Kisim Bek i stori olsem ol Israel i bin “kisim olgeta samting bilong ol Isip” taim ol i lusim Isip. (Kisim Bek 12:35, 36) Olsem na i stret long tok olsem ol Israel i bin kisim long Isip ol dispela ston i dia tumas em ol hetpris i pasim long laplap i stap long bros bilong ol.

Bilong wanem ol i yusim wain olsem marasin long taim bilong ol man i bin raitim Baibel?

▪ Long wanpela tok piksa bilong Jisas, em i stori long wanpela man em ol raskol i bin paitim em nogut tru. Jisas i tok, wanpela man Samaria i helpim dispela man na em i “kapsaitim oil na wain long ol sua bilong em na pasim.” (Luk 10:30-34) Taim aposel Pol i raitim pas long pren bilong em Timoti, em i tok: “No ken dring wara moa, tasol yu mas dring liklik wain bilong helpim bel bilong yu na daunim sik yu save kisim planti taim.” (1 Timoti 5:23) Yu ting dispela pasin Jisas i tok long en na skultok bilong Pol i stret long sait bilong helt?

Buk Ancient Wine i tok wain i save “kilim pen, kilim ol jem, na inap stretim planti sik.” Long bipo, ol Isip, Mesopotemia, na Siria i save yusim wain long mekim planti wok long sait bilong helt. Buk The Oxford Companion to Wine i kolim wain olsem “marasin bilong bipo yet em ol man i bin raitim stori bilong en.” Long tok Pol i givim long Timoti, buk The Origins and Ancient History of Wine i tok: “Ol eksperimen i soim olsem wain i save kilim kwik ol binatang bilong sik taifoit na ol narapela binatang nogut.” Wok painimaut bilong nau i soim olsem winim 500 gutpela marasin i stap insait long wain, na dispela inap daunim olkain binatang nogut olsem, na inap daunim tu sampela narapela sik.

[Futnot]

[Piksa long pes 26]

Piksa i soim ol wokman i brukbrukim ol greip, long matmat bilong Nakht, Tebes, Isip

[Kredit Lain]

Gianni Dagli Orti/The Art Archive at Art Resource, NY