FRAN PES STORI: SKUL YUMI KISIM LONG MOSES
Moses Em i Husat?
Yu save tingim wanem samting taim yu harim dispela nem Moses? Yu save tingim . . .
wanpela bebi em mama i bin haitim em long basket long wara Nail?
wanpela mangi em pikinini meri bilong Fero i adoptim na lukautim em long haus king, tasol em i no lusim tingting olsem em i bilong lain Israel?
man i bin stap olsem wasman bilong sipsip long Midian inap 40 yia?
man i bin toktok wantaim Jehovaa long fran bilong wanpela liklik diwai i paia?
man i bin strongim bel na askim king bilong Isip long larim ol Israel i lusim wok kalabus?
man em God i bin stiaim long tokaut long Tenpela Bikpela Hevi bai painim Isip taim king i sakim tok bilong God tru?
man i bin kisim lain Israel i go lusim kalabus bilong Isip?
man God i bin yusim bilo
ng brukim solwara Retsi?
man i bin givim Tenpela Lo bilong God long ol lain Israel?
MOSES i bin mekim olgeta dispela samting na sampela samting moa. Olsem na ol lotu Kristen, lotu Juda, na lotu Muslim i gat bikpela rispek long dispela gutpela man!
I klia tru olsem Moses em i wanpela profet husat i bin “mekim ol bikpela samting.” (Lo 34:10-12) Em i larim God i yusim em long mekim olkain strongpela wok. Tasol Moses em i wanpela man nating. Wankain olsem profet Elaija, em i bin sanap wantaim Moses long wanpela visen bilong Jisas taim Jisas i mekim wok autim tok hia long graun, Moses em i man “wankain olsem yumi.” (Jems 5:17; Matyu 17:1-9) Moses i bin karim ol hevi wankain olsem ol hevi yumi save karim na em i bin sanap strong na winim ol dispela hevi.
Yu laik save long olsem wanem em i bin mekim olsem? Tingim 3-pela gutpela pasin Moses i bin mekim na skul yumi ken kisim long em.
a Jehova em nem bilong God olsem Baibel i kamapim.