Lain Gad Bilong Sisar i Harim Gutnius

Em yia 59 C.E. Sampela soldia i bin wokabaut inap longpela hap pinis na ol i pilim tait, ol i bringim sampela kalabusman na ol i go insait long Rom long geit ol i kolim Porta Kapena. Haus king bilong Empera Niro i stap long maunten Palatin, na Lain Gad Bilong Sisar i was long en na ol i gat bainat aninit long klos pait bilong ol.a Julius, em ofisa bilong 100 soldia, em i bringim ol kalabusman i go lusim Ples Maket Bilong Rom na ol i wokabaut i go antap long maunten Viminal. Ol i abrusim gaden i gat planti alta bilong ol god bilong Rom, na ol i abrusim tu ples em ol ami i save kisim trening long en.

Piksa bilong ol soldia long Lain Gad Bilong Sisar, ating i bin stap long Banis Bilong Klodius, ol i wokim long 51 C.E.

Wanpela namel long ol kalabusman em aposel Pol. Sampela mun paslain Pol i bin stap long sip na traipela win ren i mekim nabaut long sip, na wanpela ensel i tokim em: “Yu mas sanap long ai bilong Sisar.” (Apo. 27:24) Olsem wanem? Nau Pol bai mekim dispela samting? Em i tanim lukluk long nambawan biktaun bilong Gavman Rom, na ating long dispela taim em i tingim tok Bikpela Jisas i bin givim long em long Haus Taua Bilong Antonia long Jerusalem. Jisas i tok: “Sanap strong! Yu bin autim tok na kamapim gut stori bilong mi long Jerusalem, na yu mas tokaut long Rom tu.”—Apo. 23:10, 11.

Ating Pol i lukluk long taun i gat strongpela banis, na banis brik bilong en i gat ol hap em ol soldia i ken sanap long en, na tu, i gat ol taua. Lain Gad Bilong Sisar i stap long dispela hap na ol i mekim wok olsem bodi gad bilong empera, na tu, ol polis bilong taun i stap long dispela hap. Dispela strongpela taun i gat 12-pela grupb bilong Lain Gad Bilong Sisar, na sampela grup moa bilong ol soldia, olsem na sampela tausen soldia wantaim ol soldia i save sindaun long hos ol inap stap long dispela ples. Dispela taun i gat strongpela banis i soim klia olsem empera i gat bikpela strong. Lain Gad Bilong Sisar i save bosim ol kalabusman bilong ol provins, olsem na Julius i bringim lain kalabus bilong em i go insait long wanpela bilong 4-pela bikpela geit. Inap sampela mun pinis em i raun wantaim ol kalabusman na kisim taim nogut long solwara, tasol nau em i kamap long ples em i mas bringim ol long en.—Apo. 27:1-3, 43, 44.

POL I AUTIM TOK NA “I NO GAT WANPELA SAMTING I PASIM EM”

Ol narakain samting i painim Pol taim em i go long Rom. Taim ol i stap long solwara na traipela win i kamap, Pol i tok profet olsem sip bai bagarap, tasol ol manmeri bai abrusim bagarap. Wanpela snek nogut i bin kaikaim Pol, tasol em i no kisim bagarap long en. Em i oraitim ol sikman long ailan Malta, na ol i kirap na tok em i wanpela god. Ating Lain Gad Bilong Sisar i harim pinis stori bilong ol dispela samting.

Pol i save pinis long ol brata bilong Rom em nau ‘ol i kam bungim em long Maketples Bilong Apius na long Tripela Haus Pasindia.’ (Apo. 28:15) Tasol Pol em i kalabusman, na olsem wanem bai em i ken inapim laik bilong em long autim gutnius long Rom? (Rom 1:14, 15) Sampela i ting ol i bin putim ol kalabusman long han bilong kepten bilong ol gad. Sapos olsem, orait ating ol i bin putim Pol long han bilong Ofisa Bilong Lain Gad Bilong Sisar, em Afranius Burus, ating em i gat bikpela namba na strong, na empera tasol i winim em.c Olsem na nau Pol i no stap aninit moa long ofisa husat i bosim 100 soldia, nogat, em i stap aninit long lukaut bilong wanpela soldia bilong Sisar. Ol i orait long Pol i kisim ples slip bilong em yet, ol man i ken visitim em, na em inap autim tok long ol na “i no gat wanpela samting i pasim em.”—Apo. 28:16, 30, 31.

Lain Gad Bilong Sisar Long Taim Bilong Niro

Mani long taim bilong ol aposel i soim haus bilong Lain Gad Bilong Sisar

Lain Gad Bilong Sisar i mekim tok tru antap olsem ol bai lukautim gut empera na famili bilong em. Taim ol dispela soldia i go long pait, ol i save karim fleg i gat mak bilong empera, na tu, ol hap plang bilong pait i gat piksa bilong binatang skopion, em mak bilong Taiberius Sisar. Na tu, i gat ol ofisa bilong bosim wan wan grup bilong lain soldia na ol i save stap long ol hap bilong mekim ol pilai bambai i no gat pait i kamap, na ol i save mekim wok tu olsem ol man bilong kilim i dai paia. Ol dispela soldia i save mekim wok inap 16 yia na ol i save kisim bikpela pe moa winim ol narapela lain soldia inap 3-pela taim, na ol i save kisim planti mani moa antap long dispela, na taim ol i ritaia ol i save kisim gutpela pe olsem pensen. Tasol i no wankain long ol soldia bilong ol narapela lain ami em ol i save mekim wok soldia inap 25 yia. Na tu, Lain Gad Bilong Sisar i gat wok long givim bikpela pen long ol kalabusman na kilim ol i dai. Taim Pol i kalabus long namba 2 taim, ating em i bin dai long han bilong ol kain soldia olsem, em dispela lain em i bin wok strong long autim gutnius long ol.—2 Tim. 4:16, 17.

Courtesy Classical Numismatic Group, Inc./cngcoins.com

POL I AUTIM TOK LONG OL MAN NATING NA OL BIKMAN

Banis bilong taun bilong Lain Gad Bilong Sisar long nau

Ating taim Burus i mekim wok jas bilong em, em i toktok wantaim aposel Pol, long haus king o long kem bilong Lain Gad Bilong Sisar, na bihain em i bringim Pol i go long Niro. Pol i no abrusim dispela gutpela rot bilong “autim tok yet long ol man nating na long ol bikman wantaim.” (Apo. 26:19-23) Yumi no save long Burus i skelim Pol olsem wanem long kot, tasol yumi save olsem em i no putim Pol long haus kalabus long kem bilong Lain Gad Bilong Sisar.d

Pol i rentim wanpela haus i bikpela inap long “ol bikman bilong ol Juda” i ken i kam lukim em na em i ken autim tok long ol, na long ol “bikpela lain i kam lukim em long haus.” Na ol soldia bilong Lain Gad Bilong Sisar ol tu i putim yau na harim em i autim tok. Kirap “long moning i go inap long apinun,” Pol i “autim gut tru” tok long ol Juda na stori long Kingdom na long Jisas.—Apo. 28:17, 23.

Ol soldia i harim Pol i kolim ol tok bilong raitim long pas

Ol wan wan grup soldia bilong was long haus king ol i save senis senis long olgeta de long namba 8 aua. Gad bilong Pol tu i save senis senis long olgeta de. Insait long 2-pela yia Pol i stap kalabus, ol soldia i bin harim em i kolim ol tok bilong raitim long ol pas i go long ol Kristen bilong Efesus, Filipai, Kolosi, na ol Hibru, na tu, ol i lukim em i raitim pas i go long Filemon, em wanpela Kristen. Taim Pol i stap kalabus, em i bin helpim Onesimus, em wanpela wokboi husat i bin ranawe long bosman bilong em. Pol i ‘kamap olsem papa bilong en taim em i stap long kalabus,’ na Pol i salim em i go bek long bosman bilong em. (File. 10) Na yumi save, Pol i bin tingim tu ol gad husat i was long em. (1 Kor. 9:22) Ating em i bin askim wanpela soldia long wok bilong ol wan wan hap bilong klos pait na bihain em i kamapim gutpela tok piksa long en.—Efe. 6:13-17.

‘AUTIM TOK BILONG GOD NA I NO PRET’

Taim Pol i stap kalabus, em i bin ‘helpim wok bilong gutnius i go bikpela moa’ namel long Lain Gad Bilong Sisar na ol narapela lain. (Fili. 1:12, 13) Ol soldia husat i stap long dispela strongpela taun, ol i gat ol savelain long olgeta hap em Gavman Rom i bosim. Na tu, ol dispela soldia i save toktok wantaim empera, na olgeta lain i stap long haus bilong empera. Sampela long haus bilong empera i bin kamap Kristen, olsem ol wanfamili, ol wokman, na ol wokboi. (Fili. 4:22) Pol i no bin pret long autim tok, na dispela i strongim bel bilong ol brata long Rom long “autim tok bilong God na ol i no pret.”—Fili. 1:14.

Maski yumi stap long wanem hap, yumi inap autim tok long ol lain yumi bungim

Wok bilong Pol long autim tok long Rom i strongim bel bilong yumi tu taim yumi “autim tok bilong God long gutpela taim na long taim nogut.” (2 Tim. 4:2) Sampela bilong yumi i stap tasol long haus, o long haus bilong ol lapun, o long haus sik, o yumi stap long kalabus, long wanem, yumi holimpas bilip bilong yumi. Maski yumi stap long wanem hap, yumi inap autim tok long ol man husat i kam bilong helpim yumi, o kam bilong mekim sampela wok. Taim yumi no pret long autim tok taim rot i op, yumi lukim tru olsem ‘i no gat wanpela samting inap pasim tok bilong God.’—2 Tim. 2:8, 9.

Sekstus Afranius Burus

Wanpela rait i gat nem bilong Sekstus Afranius Burus

Ating mama i bin karim Burus long Vaison-la-Romaine, nau i stap long sauten Frans, na long 1884 C.E. ol i bin painim wanpela hap ston i gat nem bilong em long en. Long 51 C.E., Agripina Namba 2, em meri bilong Klodius Sisar, em i bin givim namba long Burus olsem Nambawan Ofisa bilong Lain Gad Bilong Sisar. Agripina i makim 2-pela man long skulim pikinini man bilong em, Niro, long mekim wok olsem empera long bihain. Wanpela em Burus, em wanpela soldia i gat nem na em i trenim Niro long wok ami. Narapela man em Seneka, na em i skulim Niro long wokim tingting na kisim save long ol samting. Wanpela taim Agripina i tok na ol i givim marasin nogut long man bilong em na em i dai. Taim ol man i no harim tok yet long indai bilong Klodius, Burus i bringim Niro i go long taun bilong Lain Gad Bilong Sisar na dispela lain i tokaut olsem Niro i kamap empera, na lain bilong haus gavman i mas orait tasol long dispela samting. Long 59 C.E., Niro i tok na ol i givim marasin nogut long mama bilong em na em i dai, na Burus i no tokaut long dispela samting. Tupela saveman bilong Rom, em Suetonius na Kasius Dio, ol i tok Niro i bin givim marasin nogut long Burus na em i dai long 62 C.E.

Musée Calvet Avignon

a Lukim blok, “Lain Gad Bilong Sisar Long Taim Bilong Niro.”

b Olgeta wan wan grup bilong dispela 12-pela grup soldia bilong Rom i gat 1,000 soldia long en.

c Lukim blok “Sekstus Afranius Burus.”

d Long 36/37 C.E, Taiberius Sisar i bin kalabusim Herot Agripa long dispela hap, long wanem, Herot i tokaut long laik bilong em olsem liklik taim na Kaligula bai kamap empera. Olsem na taim Kaligula i kamap empera, em i praisim Herot na givim wok king long em.—Apo. 12:1.