YU SAVE LONG DISPELA?

Yu ting ol i bin wokim gen tempel bilong Jerusalem bihain long 70 C.E. o nogat?

JISAS i tok i no gat wanpela ston long tempel bilong Jehova bai stap antap long narapela ston. Dispela tok profet i bin kamap tru taim ami bilong Rom em Taitus i bosim, ol i bagarapim Jerusalem long yia 70 C.E. (Mat. 24:2) Bihain, Empera Julian i tingting long wokim gen tempel.

Ol i bin kolim Julian olsem laspela haiden empera bilong Rom. Julian em pikinini bilong brata bilong Bikpela King Konstantin na em i bin skul long wanpela bikpela skul ol i kolim Kristen. Tasol taim em i kamap empera long 361 C.E., em i sakim skul em i bin kisim na olkain pasin nogut bilong lotu Kristen long taim bilong em, na em i bihainim bilip haiden. Ol histori buk i kolim em olsem “Apostet.”

Julian i nolaik tru long lotu Kristen. Ating wanpela as em olsem, taim em i gat 6-pela krismas em i bin lukim ol bikman bilong lotu i kilim i dai papa bilong em na sampela wanblut. Sampela saveman bilong lotu i tok, Julian i kirapim ol Juda long wokim gen tempel na em i ting dispela bai soim klia olsem Jisas em i giaman profet.a

Em tru olsem Julian i bin tingting long wokim gen tempel. Tasol ol saveman bilong histori i gat 2-pela tingting—tru tru em i bin kirapim dispela wok o nogat, na sapos em i bin mekim, orait wanem samting i kamap na ol i no pinisim dispela wok. Tasol samting tru i kamap em olsem: Klostu 2-pela yia bihain long Julian i kamap king, ol i kilim em i dai na wok em i laik mekim i no kamap.