Bai Yu Trastim God?

TINGIM olsem yu gat wanpela pren em yu laikim tru, tasol em i mekim wanpela samting em yu no ting em bai mekim. Ol narapela i sutim tok long pasin em i mekim na ol astingting bilong em, na ol i tok pren bilong yu em i man nogut. Olsem wanem? Wantu bai yu wanbel wantaim ol, o bai yu wet long harim stret tok i kam long pren bilong yu? Sapos em i no stap long eksplenim samting em i bin mekim, bai yu stap isi na holim yet stretpela tingting long em?

Paslain long yu bekim dispela askim ating bai yu laik kisim sampela save moa. Ating bai yu askim, ‘Mi save gut long pren bilong mi? I gat wanem as na mi laikim em tru?’ Yu ting i gutpela yumi holim wankain tingting olsem long God paslain long yumi skelim em olsem em i man nogut o nogat?

Bai yu hatwok long kliagut long sampela samting God i mekim, o yu tingting planti long ol samting em i larim i kamap. I gat planti manmeri bai tokim yu olsem God em i man nogut na ol bai kirapim yu long skelim astingting bilong em olsem ol i bin mekim. Olsem wanem? Bai yu no hariap long skelim God inap long yu save gut moa long em? Save yu gat pinis long God bai helpim yu long bekim dispela askim. Askim yu yet, ‘God i bin mekim wanem ol gutpela samting long mi?’

Sapos yu gat planti hevi long laip bilong yu, ating bai yu tok olsem God i no wanpela gutpela pren. Tasol tingim. Yu ting God i as bilong ol hevi i kamap long laip bilong yu o ol gutpela samting yu kisim? Olsem yumi stori pinis, Satan em i “hetman bilong dispela graun,” na i no Jehova. (Jon 12:31) Satan em i as bilong ol hevi na ol pasin i no stret i stap long dispela graun. Na tu, bai yu wanbel long tok olsem ol pasin kranki bilong yumi yet na ol samting yumi no ting long en i save kamap i givim planti hevi long yumi.

Tasol God i bin wokim wanem ol samting? Tingim tok Baibel i mekim long God olsem em Man “i bin wokim heven na graun,” na em i wokim bodi bilong yumi ol man “i nambawan tru,” na Baibel i tok tu olsem Jehova em “God wanpela tasol i save bosim laip bilong yu.” (Song 124:8; 139:14; Daniel 5:23) Dispela ol samting i makim wanem?

Dispela i makim olsem God i bin wokim yumi olgeta na yumi stap laip. (Aposel 17:28) Ol presen olsem laip, ol gutpela samting i stap long graun, pasin laikim na pasin pren, amamas bilong teistim, tatsim ol samting, harim musik o krai bilong ol samting, na smelim ol samting, dispela olgeta samting em presen i kam long God. (Jems 1:17) Tru tumas, bai yu wanbel olsem ol dispela gutpela samting i mekim na God i kamap olsem wanpela pren em yumi inap laikim na bilip tru long em!

Tasol ating bai yu hatwok long bilip long God. Yu pilim olsem yu no save gut long em inap long yu ken bilip long em. I gat as na yu pilim olsem. Long dispela ol sotpela atikol mipela i no inap stori long olgeta samting i mekim na ol man i tingim God olsem em i man nogut. Tasol gutpela samting inap kamap sapos yu save gut moa long God.a Mipela i bilip tru olsem sapos yu mekim olsem, bai yu kisim stretpela save long ol pasin bilong God. Yu ting em i man nogut? Nogat, “God em i pasin laikim.”—1 Jon 4:8.