Jehova ‘i Save Karim Ol Hevi Bilong Mi Olgeta De’
Maski mi gat bikpela sik we i givim bikpela hevi tru long mi, mi pilim tru pasin laikim bilong Papa bilong yumi long heven. Winim 20 yia nau mi kisim bikpela amamas long mekim wok bilong Jehova olsem wanpela painia.
Mi bon long 1956. Kirap long taim mama i karim mi, mi kisim wanpela sik (spina bifida) we ol bun bilong baksait i no pas gut. Dispela i bagarapim wok bilong ol nev, em ol liklik rop bilong salim tok long kru, olsem na i hatwok long mi wokabaut, na tu, dispela i mekim na mi kisim ol narapela bikpela sik.
Taim mi no bon yet, ol misineri bilong ol Witnes Bilong Jehova i kirap stadi long Baibel wantaim papamama bilong mi. Long taim mi liklik yet, i no gat planti pablisa long asples bilong mi long taun Usakos, Namibia. Long dispela taim i no gat kongrigesen, olsem na mipela i save bung olsem famili na skelim ol samting ol i makim long kongrigesen bai skelim long miting. Taim mi gat 7-pela krismas mi no inap long pispis, olsem na ol i wokim operesen long helpim mi long pispis. Taim mi gat 14 krismas mi kisim sik epilepsi. Mi mas i stap klostu long papamama na bai ol inap lukautim mi, olsem na mi no pinisim haiskul, long wanem, skul i stap longwe.
Maski i olsem, mi mekim ol samting bilong strongim mi long pas gut moa wantaim God. Planti buk na nius bilong yumi i no bin stap long tok Afrikaans, em tokples bilong mi. Olsem na mi lain long rit long tok Inglis na bai mi inap stadi gut long planti buk bilong yumi. Mi kamap pablisa na kisim baptais taim mi gat 19 krismas. Kirap long dispela taim na i go inap 4-pela yia olgeta, ol bikpela sik i givim planti hevi long mi na mekim mi i bel hevi tru. Na tu, ol manmeri long taun bilong mi ol i save gut long narapela narapela, olsem na mi pret long ol bai i gat wanem tingting long mi na dispela i pasim mi long givim bel long autim tok.
Taim mi gat 20 krismas samting, mipela i lusim Namibia na i go stap long Saut Afrika, na long hap em fes taim bilong mi long bung wantaim kongrigesen. Mi bin amamas tru! Tasol mi kisim gen narapela operesen, em operesen bilong helpim mi long toilet.
Bihain liklik, mi harim wanpela wasman sekit i mekim tok i stori long wok painia. Mi pilim tru tok em i mekim. Mi save olsem mi gat bikpela sik na dispela i givim planti hevi long mi, tasol mi luksave olsem Jehova i bin helpim mi long karim ol dispela hevi. Olsem na mi putim aplikesen bilong mekim wok painia oltaim. Tasol ol elda i save olsem mi gat bikpela sik, olsem na ol i no tok orait long mi mekim wok painia.
Maski i olsem, mi autim tok bilong kingdom na mekim wok inap long skel bilong mi. Mama na ol narapela i helpim mi, olsem na insait long 6-pela mun mi tu inap lusim planti aua long autim tok wankain olsem ol painia. Dispela i soim olsem mi gat strongpela tingting long mekim wok painia, na mi inap karim ol hevi em sik i kamapim. Mi putim gen aplikesen, na ol i tok orait long mi long mekim wok painia. Mi kamap painia oltaim long Septemba 1, 1988.
Taim mi mekim wok painia, mi luksave olsem oltaim Jehova i save helpim mi. Mi no tingting tasol long hevi bilong mi, nogat. Mi skulim ol narapela long tok i tru, na dispela i lukautim mi, strongim mi, na helpim mi long pas gut moa wantaim God. Mi kisim bikpela amamas tru long helpim planti manmeri long winim mak bilong dediket na baptais.
Mi no save sapos bihain sik bai pinis na mi kamap orait o nogat. Tasol Jehova ‘i save karim ol hevi bilong mi olgeta de.’ (Sng. 68:19) Em i helpim mi long karim ol hevi, na tu, em i helpim mi long amamas long i stap laip yet!