YU SAVE LONG DISPELA?
Long taim bilong ol man i bin raitim Baibel ol man i bin mekim wok long wanem ol aloe?
Ol i bin kisim aloe long diwai Agawut
Baibel i tok ol i bin putim wanpela kain sanda ol i kolim aloe long ol klos na ol bet bilong givim gutpela smel. (Song 45:8; Sindaun 7:17; Solomon 4:14) Ating ol i bin kisim long diwai Agawut (wanpela bilong ol diwai Aquilaria). Taim diwai i wok long sting, em i kamapim wel i gat gutpela smel na em i kamapim tu kain blut bilong diwai i save kamap strong. Ol i save wilwilim diwai na i kamap paura na salim long ol man olsem “ol aloe” i gat gutpela smel.
Baibel i tok ol haus sel bilong Israel i kain olsem “ol gutpela diwai [aloe] Bikpela i bin planim.” (Namba 24:5, 6) Ating dispela ves i toktok long lukluk bilong diwai Agawut, em i longpela i go antap inap 30 mita na ol han bilong en i save go bikpela. Yumi no inap painim dispela diwai long Israel bilong nau, tasol buk A Dictionary of the Bible i tok, “maski ol man bilong [dispela hap] long nau i no save long dispela diwai na sampela narapela diwai, yumi no ken ting olsem long bipo ol i no bin planim ol dispela diwai long Ples Daun Bilong Jordan em ples i gat planti mani kago na planti manmeri i stap long en.”
Wanem ol ofa em God i orait long en long tempel bilong Jerusalem?
Koin risit bilong tempel long Jerusalem, em i bin stap 2,000 yia
Lo bilong God i tok ol i mas ofaim ol gutpela animal tasol long tempel. God i no inap orait long ol animal i gat sik o sua samting long skin. (Kisim Bek 23:19; Wok Pris 22:21-24) Filo, wanpela man Juda bilong raitim buk na em i bin stap long taim bilong ol aposel, em i tok sampela taim ol pris i save glasim gut animal “kirap long het i go daun long lek” na bai ol i ken save ol dispela animal i gutpela tru, na “i no gat wanpela sua samting i bagarapim skin bilong ol.”
Saveman E. P. Sanders i tok, ol man bilong wok long tempel “i givim tok orait long ol man husat i save salim ol animal bilong mekim ofa long salim tasol ol animal na ol pisin em pris i bin glasim gut pinis. Taim ol i mekim olsem, man bilong salim samting i mas givim wanpela kain risit olsem koin long man bilong baim, bilong makim olsem dispela animal i gutpela tru na i no gat bagarap long skin.”
Long 2011, sampela saveman bilong painim ol samting bilong bipo ol i bin painim wanpela kain koin olsem klostu long tempel—em wanpela kain koin ol i wokim long klei na em i bilong yia 100 B.C.E. i go 70 C.E. I gat tupela rait Aram long en i kolim dispela tok, “Klin Tru Bilong God.” Ol i ting ol bosman bilong tempel i bin pasim ol dispela kain mak long ol samting bilong mekim wok lotu, o ol animal ol i laik kilim bilong mekim ofa.