YU SAVE LONG DISPELA?

Hau ol man long bipo i wokim gut ol sip na wara i no bagarapim?

Lionel Casson, wanpela saveman bilong wokim ol sip bilong bipo i stori olsem ol man bilong wokim sip long Rom i save pasim ol hul namel long ol plang long ol sip o bot. Ol i save “pasim ol hap i gat hul o sampela taim ol i penim ausait na insait bilong sip long kolta o long samting i luk olsem gris kandel.” Lain Akkad na lain Babilon i bin yusim kolta paslain long ol Rom long wokim gut ol sip na bai wara i no ken bagarapim.

Ol Skripsa Hibru i stori long wankain pasin bilong wokim sip olsem tok i stap long Stat 6:14. Long tok Hibru, dispela tok “kolta” i makim ston ol i kukim na i melt na i kamap olsem wara.

I gat 2-pela kain kolta, wanpela em strong na narapela i kain olsem wara. Ol man bilong wokim sip long bipo i save yusim dispela kolta i kain olsem wara long penim ol sip. Taim kolta i drai na i go strong, em inap pasim gut olgeta hul namel long ol plang na wara i no inap bagarapim sip.

I gat planti kolta long ol ples em Baibel i stori long en long bipo. Olsem, long ples daun bilong Sidim long Solwara Detsi, “i gat planti hul bilong kisim kolta i stap.”—Stat 14:10.

Hau ol i lukautim ol pis long bipo na ol pis i no bagarap hariap?

Long bipo yet pis em wanpela abus planti man i save kaikai. Paslain long sampela aposel bilong Jisas i bihainim em, ol i man bilong kisim pis long Raunwara Galili. (Matyu 4:18-22) Sampela bilong ol pis ol i kisim ol i save salim i go long ol hap we ol i save baim na salim ol pis.

Long nau ol man i bihainim wankain pasin bilong ol man long Galili bilong bipo long lukautim pis na bai pis i no ken bagarap hariap. Pastaim ol i save klinim gut ol pis na wasim long wara. Buk Studies in Ancient Technology i stori long pasin ol i bihainim olsem: “Ol i save putim sol long pis. Bihain ol i putim pis antap long mat, tromoi sampela moa sol long en na draim long san. Insait long 3-pela o 5-pela de, ol i save tanim hapsait bilong pis na draim. Taim ol i draim pis long san, sol i mekim na pis i drai olgeta na i go strong.”

Yumi no save long hamas de o wik samting pis bai stap na i no bagarap hariap. Tasol stori bilong ol Isip bilong bipo long salim ol pis i go long Siria i kamapim klia olsem pasin ol i yusim bilong lukautim pis i bin wok gut.