FRAN PES STORI | BILONG WANEM JISAS I KARIM HEVI NA DAI?
Tru Tru Ol Dispela Samting I Bin Kamap?
Long yia 33 C.E., ol birua i bin kilim i dai Jisas bilong Nasaret. Ol man i sutim tok giaman olsem Jisas i laik daunim gavman, olsem na ol i paitim em nogut tru, na nilim em long diwai pos. Jisas i karim bikpela pen tru na em i dai. Tasol God i kirapim em bek na bihain long 40 de, em i go long heven.
Fopela Gutnius Bilong Baibel long Ol Skripsa Grik em planti man i kolim olsem Nupela Testamen i kamapim laip stori bilong Jisas. Yu ting wanem? Tru tru ol dispela samting i bin kamap? Planti man i laik save long bekim bilong dispela askim. Sapos ol dispela samting em Ol Gutnius i stori long en i no bin kamap tru, orait bilip bilong ol Kristen i no gat as bilong en, na bilip bilong stap laip oltaim long graun em driman nating. (1 Korin 15:14) Tasol sapos ol dispela samting i bin kamap, orait yumi ken bilip tru olsem gutpela samting bai painim ol man long bihain na yu tu inap stap long dispela taim. Olsem na yumi laik save, ol stori em Ol Gutnius i kamapim i tru o nogat?
OL SAMTING I KAMAP TRU
Ol Gutnius i stori long olgeta samting i bin kamap na ol tok bilong en i stret, tasol ol stori nating em ol man i kamapim i no wankain. Olsem, Ol Gutnius i stori long planti ples, sampela bilong ol dispela ples i stap long nau na yu inap i go raun long en. Na tu, Ol Gutnius i stori long ol bikman i stap long taim bilong Jisas. Planti saveman bilong bipo i painim ol evidens i soim olsem ol dispela man i bin stap tru.—Luk 3:1, 2, 23.
Ol man bilong raitim ol buk husat i stap long yia 100 i go 200 C.E. i bin stori long Jisas.a Ol Gutnius i stori long hau ol birua i kilim i dai Jisas, na dispela i stret wantaim pasin bilong ol Rom long bipo long panisim ol man na kilim ol i dai. Na tu, Ol Gutnius i stori long olgeta samting i bin painim Jisas na ol disaipel bilong en, na ol i kamapim tu ol popaia bilong sampela disaipel. (Matyu 26:56; Luk 22:24-26; Jon 18:10, 11) Olgeta dispela samting i kamapim klia olsem ol man i raitim Ol Gutnius i tokaut stret na i stori gut long olgeta samting i kamap long Jisas.
EM TRU OLSEM JISAS I BIN KIRAP BEK?
Planti man i bilip olsem Jisas em man i stap tru na em i bin dai, tasol sampela i gat tupela tingting long kirap bek bilong Jisas. Ol aposel bilong Jisas tu i no bilip olsem Jisas i kirap bek taim ol i harim dispela tok long namba wan taim. (Luk 24:11) Tasol ol aposel i bilip bihain long ol na ol arapela disaipel bilong Jisas i lukim em long narapela narapela taim. Baibel i stori olsem wanpela taim, winim 500 aiwitnes i bin lukim Jisas bihain long taim em i kirap bek.—1 Korin 15:6.
Maski ol man inap arestim ol disaipel na kilim ol i dai, ol i strongim bel na tokaut long kirap bek bilong Jisas, na tu, ol i tokim ol man husat i bin kilim i dai Jisas. (Aposel 4:1-3, 10, 19, 20; 5:27-32) Planti disaipel bilong Jisas i lukim em bihain long taim em i kirap bek na dispela i strongim bilip bilong ol, olsem na ol i no pret long tokaut long ol narapela long ol samting ol i bin lukim. Long nau tu, ol Kristen i bilip tru olsem Jisas em man i bin stap tru, na God i bin kirapim em bek bihain long em i dai.
Ol Gutnius i stori long dai bilong Jisas na kirap bek bilong en na dispela i soim olsem olgeta samting ol i bin raitim i kamap tru. Taim yu ritim Baibel, dispela bai strongim bilip bilong yu olsem ol dispela samting i bin kamap tru. Na taim yu kliagut long risen na ol dispela samting i bin kamap, bai yu gat strongpela bilip. Neks atikol bai stori long dispela.
a Wanpela bilong ol dispela man em Tasitus husat i bon long yia 55 C.E. samting. Em i tok: “Krais, em man ol i kisim nem Kristen long en, em i dai long han bilong Gavena Pontius Pailat long taim Taiberius i stap king.” Na tu, Suetonius na Josifas em ol saveman bilong histori long taim bilong ol aposel, na Plini em yangpela gavana bilong Bitinia long pinis bilong yia 100 C.E., olgeta dispela man i bin stori long Jisas.