Stori Yu Mas Save Long En

Baibel em buk i narapela kain long ol narapela buk bilong lotu. I no gat wanpela buk i olsem Baibel we i stiaim ol bilip bilong planti man inap longpela haptaim. Maski i olsem, planti man i bin mekim wok painimaut na sutim tok long Baibel.

Sampela saveman i gat tupela tingting long ol Baibel bilong nau, olsem ol i kamapim ol tok bilong ol olpela rait o nogat. Wanpela profesa bilong lotu i tok: “Yumi no inap save sapos ol man i raitim stret olgeta tok bilong ol olpela rait. Ol kopi bilong ol rait i stap planti handret yia bihain long taim ol i raitim ol fes rait, na ol i yusim kain kain pasin bilong rait. Olsem na ol kopi bilong nau i gat ol popaia long en.”

Ol arapela i no bilip long tok bilong Baibel, long wanem, ol i tingim save ol i kisim long lotu ol i go bikpela long en. Olsem, famili bilong Faizal em ol i no Kristen i skulim em olsem Baibel em buk holi, tasol ol tok bilong en i no wankain long ol rait bilong pastaim. Faizal i tok: “Taim ol man i laik toktok wantaim mi long Baibel, mi save gat tupela tingting. Long wanem, ol tok bilong Baibel i senis. Ol i no gat Baibel bilong pastaim!”

Yu ting em bikpela samting long save sapos ol tok bilong Baibel i bin senis o nogat? Skelim ol dispela askim: Sapos yu no save olsem tru tru ol gutpela tok promis bilong Baibel long ol samting bai kamap bihain i stap long rait bilong bipo, bai yu trastim ol dispela tok? (Rom 15:4) Bai yu yusim ol stiatok bilong Baibel long mekim ol bikpela disisen long wok, famili, na lotu sapos ol Baibel bilong nau i kamapim ol tok em ol man i raitim na i gat planti popaia long en?

Maski ol olpela rait bilong Baibel i no stap moa, yumi inap sekim gen kopi bilong ol rait bilong bipo, dispela i makim tu planti tausen manuskrip bilong Baibel. Hau na ol dispela manuskrip i no bin bagarap maski ol i stap inap longpela taim, ol man i birua long ol, na ol i traim long senisim ol tok bilong en? Hau na ol manuskrip bilong bipo i strongim bilip bilong yu olsem tok bilong Baibel bilong nau i stret na i tru? Skelim bekim bilong ol dispela askim long neks atikol, em bai stori long hau Baibel i abrusim bagarap na i stap yet long nau.