Yu Save Long Dispela?
Yu ting long bipo wanpela man inap planim gras nogut long gaden bilong narapela man?
Dispela em kopi bilong buk Digest em Empera Justinian i kamapim long yia 1468, na em i stori gut tru long ol lo bilong dispela taim bipo
LONG Matyu 13:24-26, Jisas i tok: “Kingdom bilong heven i olsem wanpela man i planim ol gutpela sid long gaden bilong en. Taim ol man i slip i stap, birua bilong dispela man i kam na planim ol gras nogut namel long ol wit na em i go. Taim wit i kru na karim kaikai, ol gras nogut tu i kamap wantaim.” Ol man bilong raitim ol stori i holim 2-pela tingting long stori i stap long dispela tok piksa, tasol ol rait bilong gavman Rom long bipo i soim olsem dispela stori em samting tru i kamap long bipo.
Wanpela dikseneri bilong Baibel i tok: “Lo bilong Rom i tambuim ol man long . . . planim gras nogut long gaden bilong narapela long bekim rong bilong em. Dispela lo i soim olsem planti taim dispela pasin i save kamap.” Alastair Kerr em wanpela saveman bilong lo, na em i tok long 533 C.E. Empera Justinian i kamapim buk Digest we i kolim sampela hap tok bilong ol man i save harim kot namel long 100 C.E. na 250 C.E. Long dispela buk (Digest, 9.2.27.14), saveman Ulpian i kolim wanpela kot keis em Celsus i bin skelim—Celsus em wanpela bikman bilong Rom namel long 100 C.E., na 200 C.E. Wanpela man i bin planim gras nogut long gaden bilong narapela man na dispela i bagarapim ol gutpela kaikai. Buk Digest i kolim ol samting em papa bilong gaden i ken mekim bambai man i planim gras nogut inap givim kompensesen.
Long taim bipo, ol man i mekim dispela pasin nogut long ol hap em gavman Rom i bosim, na dispela i soim olsem stori i stap long tok piksa bilong Jisas em samting tru ol man i bin mekim long bipo.
Long taim bilong ol aposel, ol Rom i larim ol bikman bilong lain Juda long Judia i stap fri long mekim wanem ol samting?
LONG dispela taim bipo, gavman Rom i makim wanpela gavana wantaim ol soldia bilong em long bosim Judia. Wok bilong gavana em long kisim takis na stiaim ol manmeri long i stap wanbel na bihainim lo. Gavman Rom i save stopim ol wok i no stret wantaim lo, na kotim ol man husat i bagarapim sindaun bilong ol narapela. Tasol long planti narapela samting, ol Rom i larim ol lida bilong lain Juda yet long stiaim sindaun bilong ol manmeri.
Sanhedrin bilong ol Juda i harim kot
Sanhedrin i stap olsem suprim kot na kaunsil bilong ol Juda, na ol i bihainim lo bilong ol Juda long stretim ol hevi. Ol liklik kot i stap long olgeta hap bilong Judia. Ol dispela liklik kot i save harim kot bilong ol man i mekim kain rong olsem pasin raskol, na Rom i no save insait long en. Tasol ol kot bilong ol Juda i no gat rait long mekim disisen long kilim i dai ol man i mekim rong—ol Rom tasol i gat dispela rait. Wanpela taim ol Rom i larim Sanhedrin long harim kot bilong Stiven, na Sanhedrin yet i mekim disisen na ol i stonim Stiven na kilim em i dai.—Apo. 6:8-15; 7:54-60.
Sanhedrin i holim bikpela namba long mekim disisen long kot. Tasol saveman Emil Schürer i tok: “Taim man i bikhet long wok gavman bilong Rom, long dispela taim tasol gavman Rom inap mekim disisen long harim dispela kot na Sanhedrin i no inap harim.” Eksampel bilong dispela em long taim Klodius Lisias, wanpela komanda bilong ami, i kisim bek aposel Pol long han bilong ol Juda bikos Pol em sitisen bilong Rom.—Apo. 23:26-30.