Askim

◼ Wanem taim i stret long man i ken kisim wanpela buk Lo Bilong Yumi Bilong Mekim Wok Autim Tok, na olsem wanem ol elda i ken stretim rot bilong givim ol askim long ol man i laik kisim baptais na long wanem taim ol i ken mekim?

Stori bilong dispela samting i stap long pes 173-175 long buk Lo, aninit long het-tok “Toksave Bilong Ol Elda Bilong Kongrigesen.” Long dispela hap em i stori gut olsem taim wanpela man i senisim pasin bilong em na bihainim ol stretpela lo bilong Jehova, na go oltaim long ol miting bilong kongrigesen, na insait tru long wok autim tok olsem pablisa i no baptais yet, orait em i ken tokim wanpela elda olsem em i laik kisim baptais, na long dispela taim em i ken kisim wanpela buk Lo Bilong Yumi Bilong Mekim Wok Autim Tok.​—⁠Lukim tu stori “Nupela Pablisa” long pes 97-100.

Taim pablisa i no baptais yet i kisim buk, em i mas kirap kaunim ol askim bilong givim long ol manmeri i laik kisim baptais i stap long buk kirap long pes 175. Em i mas wok strong long skelim ol skripsa ol i makim na olsem wanem em bai bihainim ol dispela tok. Taim em i skelim pinis ol dispela askim, sampela elda bai skelim gen ol dispela askim na ol bekim wantaim em. Wasman siaman bai stretim rot bilong mekim olsem.

Ol elda i no ken hariap hariap long skelim ol dispela askim wantaim man i laik kisim baptais. Olsem na man i laik kisim baptais, em i mas toksave hariap long tingting bilong em long ol elda. I no olsem ol elda i mas wet inap long taim ol i toksave long de bilong kibung na long dispela taim ol i kirap skelim ol askim wantaim ol man i laik kisim baptais. Ol pablisa i gat Baibel-stadi ol i mas luksave long ol sumatin bilong ol i kamap strong long ol samting bilong spirit o nogat, na skelim wanem taim sumatin bai dediket, na toksave long sumatin long em i mas mekim wanem bilong kisim baptais.

Ating ol elda i skelim ol askim wantaim man i laik kisim baptais bai pasim tok olsem em i gutpela long dispela man i mas kamap strong moa long ol samting bilong spirit pastaim, na bihain em i ken mekim dispela bikpela samting. Ating dispela man i mas kisim sampela save moa o em i mas lain moa yet long pasin bilong autim bilip bilong em long ol narapela. (1 Pi 3:15) Ating em i mas lain moa yet long mekim wok autim tok. O ating ol bai lukim olsem em i no winim yet mak bilong kisim baptais. (Lukim Aposel 8:36.) Sapos em i no winim dispela mak, ol elda i mas tokim em long wanem ol samting em i mas mekim bilong kamap strong moa, na sapos i stret long mekim, ol i ken stretim rot bilong givim helpim long dispela man bilong em i ken winim dispela mak long bihain.