Givim Bel Olgeta Long Mekim Wok Bilong Jehova
1 Nau yumi stap long taim nogut bilong las de, na kain kain hevi i save painim ol brata na sista na ol pikinini taim ol i mekim laspela hap wok bilong autim tok. Ol dispela hevi i givim hatwok long ol. Olsem na ol elda i ‘mas was gut long ol yet na long olgeta manmeri bilong kongrigesen’ na lukautim gut ol.—Ap 20:28.
2 Sapos ol elda i laik givim bel olgeta long mekim wok bilong Jehova, ol i mas save ol brata i stap olsem wanem. Ol i mas save long wanem ol samting? Ol elda i mas tingim ol samting olsem:
1. I gat sampela samting na ol elda i save sampela brata i slek long bihainim tok i tru na ol i no pas gut wantaim lain bilong Jehova?—Hi 2:1; 12:12, 13.
2. I gat sampela samting i makim olsem ol i laik pren wantaim ol man bilong graun na laikim pasin bilong ol?—Je 4:4.
3. I gat sampela samting i makim olsem ol i laikim ol samting bilong graun na ol i givim bel long kisim ol samting bilong graun?—1 Jo 2:15-17.
3 Ol hevi olsem i no inap kamap bikpela sapos ol elda bilong lukautim ol Buk-Stadi i was gut long ol brata long grup bilong ol. Brata bilong lukautim Buk-Stadi inap helpim ol brata long kain kain samting. I gat wanem ol samting na em i ken helpim ol brata long grup bilong em long givim bel olgeta long mekim wok bilong Jehova?
4 Namba wan samting i olsem: Em yet i mas i stap gutpela tisa. Bilong mekim gut wok tisa, em i mas redim gut stadi. Brata bilong lukautim Buk-Stadi i no ken save tasol long ol bekim bilong ol askim, nogat; em i mas save tu, i gat wanem as na ol dispela bekim i stret, na olsem wanem ol tok bilong stadi inap helpim ol brata. Em i mas tingting long helpim olgeta wan wan long grup long kisim gut ol tok bambai ol yet i ken bihainim ol dispela tok, na bai ol i ken kamapim gut long ol narapela.
5 Namba 2 samting i olsem: Brata bilong lukautim Buk-Stadi i mas i go pas long mekim wok autim tok. Olsem na long olgeta wan wan wik em i mas wok wantaim grup bilong em long autim tok long ol haus, na sapos em inap, em i ken go wantaim ol long mekim ol gobek na Baibel-stadi. Sapos em yet i no inap i stap, orait em i mas makim wanpela brata i gat save long lukautim grup bambai ol brata sista i gat man bilong lukautim gut ol na go pas long autim tok. Ol brata bilong lukautim ol Buk-Stadi na ol narapela elda tu, i mas wok strong bambai ol i stap olsem gutpela piksa long olgeta samting ol i mekim. Ol i mas i go pas long mekim wok autim tok na ol i mas bihainim gutpela pasin na givim bel long mekim wok bilong ol na bai ol narapela i ken givim bel olgeta long mekim wok bilong Jehova.—1 Pi 5:2, 3.
[Ol Askim]
1. (a) Ol wan wan Witnes Bilong Jehova i mas mekim wanem olsem Efesus 6:6 i tok? (b) Kaunim Aposel 20:28. Bilong wanem em bikpela samting long ol elda i mas was gut long ‘olgeta manmeri bilong kongrigesen’ na lukautim gut ol? Bilong wanem ol i mas was gut long ol yet?
2. Ol elda i ken tingim wanem ol samting bilong i stap bilong ol brata?
3, 4. (a) Bilong helpim ol brata long grup long daun long brata bilong lukautim Buk-Stadi, dispela brata i mas mekim wanem olsem 1 Timoti 5:17 na Rom 12:8 i tok? (b) Brata bilong lukautim Buk-Stadi i mas wok strong long lukautim dispela wok, olsem na em i mas i gat tingting long mekim wanem bilong helpim ol brata?
5. (a) Sapos brata bilong lukautim Buk-Stadi i go pas long mekim wok autim tok, olsem wanem dispela bai helpim ol pablisa? (b) Olsem 1 Pita 5:2, 3 i tok, ol dispela elda i mas ting olsem wanem long wok bilong ol? (c) 1 Korin 15:58 i gat wanem gutpela tok bilong strongim ol brata i save lukautim gut wok bilong ol?
This article is unique to PNG.