Autim Gutpela Tok—Beten na Mekim Wok
1 Aposel Pol i salim pas long ol Filipai na em i strongim bel bilong ol olsem: “[God] i save strongim mi, na long strong bilong em mi inap mekim olgeta samting.” (Fl 4:13) Yumi tu mas bilip long Jehova na bai yumi gat strong long autim gutpela tok na yumi no ken pret. Yumi inap mekim olsem wanem?
2 Planti taim Jisas i tok, yumi “mas beten long olgeta taim, na [yumi] no ken les.” (Lu 18:1) Na Pol i tok, “Yupela i mas beten oltaim.” (1 Te 5:17) Olsem na sapos yumi laik stap strong, yumi mas beten. Taim yumi autim tok, beten i mas i stap oltaim long tingting bilong yumi. Yumi ken beten askim Jehova long opim rot bilong yumi ken autim tok, na bilong yumi ken kisim gutpela tingting taim yumi autim tok long ol haus, na bilong yumi ken putim tok i go daun long bel bilong ol Baibel-stadi. Yumi mas wok strong long autim tok bilong Kingdom, long wanem, taim i laik pinis nau; olsem na yumi mas beten long wok bilong Kingdom i ken i go bikpela moa long olgeta hap. (Mt 24:14) Yumi mas ‘holim strong’ pasin bilong beten bambai yumi no ken les long ol samting bilong spirit, na bai yumi ken pilim moa yet olsem em i gutpela samting yumi inap autim tok long ol narapela samting God i laik mekim.—Ko 4:2.
TAIM YUMI MEKIM BAIBEL-STADI
3 Bilong wanem i bikpela samting yumi mas beten taim yumi mekim Baibel-stadi? Sapos yumi beten taim yumi laik kirapim stadi, dispela bai helpim yumi long tingim gut dispela wok bilong yumi, na dispela Baibel-stadi bai save ol samting em i wok long kisim save long en i bikpela samting. Pasin bilong beten i lainim Baibel-stadi long em i mas bilip long Jehova na wetim em i soim rot long em. Na pasin bilong yumi long beten bai lainim dispela man long pasin em i ken bihainim long beten.—Lu 11:1.
4 Taim yumi mekim Baibel-stadi, yumi ken beten long wanem ol samting? Yumi ken tingim ol gutpela beten, olsem beten Jisas i skulim ol disaipel long en, na beten Pol i mekim bilong helpim ol Filipai. (Mt 6:9-13; Fl 1:9-11) Yumi no ken ting yumi mas kolim longpela beten, nogat, tasol yumi mas kolim stret ol samting yumi laik beten long en. Taim yumi beten, gutpela sapos yumi kolim sampela tok bilong litimapim nem bilong Jehova long ol bikpela wok em i bin mekim. Na yumi ken tokaut olsem em i stap bikpela king tru long antap, na ol pasin bilong em i nambawan tru. (Sng 145:3-5) Gutpela yumi kolim nem bilong dispela man yumi stadi wantaim em, na ating yumi ken kamapim sampela hevi bilong em, na askim Jehova long helpim em bambai em i ken kamap strong long ol samting bilong spirit. Taim em i wok long kamap strong, na em i kam long ol miting na tokim ol narapela man long ol samting em i wok long kisim save long en, yumi ken beten askim Jehova long blesim dispela wok bilong em. Na yumi ken beten askim Jehova long blesim tu wok autim tok long olgeta hap bilong graun.
BETEN BILONG HELPIM OL BRATA SISTA
5 Olgeta brata sista long lain bilong Jehova ol i wanwok bilong yumi. (1 Ko 3:9) Olsem na taim ol gavman i laik pasim wok autim tok, yumi ken beten “long helpim ol king na olgeta gavman.” Bilong wanem yumi mekim olsem? “Bai yumi olgeta i ken sindaun gut na i stap bel isi, na yumi ken bihainim tru olgeta pasin God i laikim.” (1 Ti 2:1, 2) Kain beten olsem i helpim olgeta brata sista bilong yumi long olgeta hap bilong graun. Yumi ken beten na bai ol gavman i kisim gutpela tingting long dispela wok bilong yumi na ol i no ken pasim.
6 Na yumi mas tingim ol brata i autim tok long ol ples i gat hatwok long mekim, o ol i gat sampela hevi bilong skin o sik bilong spirit, na yumi ken beten askim Jehova long strongim ol bambai ol i ken mekim moa yet wok autim tok. (2 Te 3:1, 2) Taim yumi beten, gutpela sapos yumi tingim ol elda, na ol wasman bilong raun, na Lain Bilong Bosim Ol Witnes—em ‘ol man i wok long helpim yumi.’—1 Te 5:12.
7 Olgeta taim yumi mas putim olgeta hevi bilong yumi long han bilong Jehova. (Sng 55:22; 1 Pi 5:7) Na yumi ken bilip olsem, olgeta beten yumi mekim na i stret long laik bilong God, bai God i harim. (1 Jo 5:14) Olsem na sapos yumi beten askim Jehova long helpim yumi long mekim gut wok autim tok, em bai harim beten bilong yumi na helpim yumi.—2 Ti 4:5.
[Ol Askim]
1, 2. (a) Kaunim Kolosi 4:2. Bilong wanem yumi mas ‘holim strong’ pasin bilong beten? (b) Beten inap helpim yumi olsem wanem? (c) Gutpela yumi beten long wanem kain taim?
3, 4. (a) Kaunim Luk 11:1. Yumi mas mekim wanem taim yumi mekim Baibel-stadi? (b) Olsem wanem ol beten yumi mekim taim yumi mekim Baibel-stadi i ken strongim dispela man yumi stadi wantaim em? Taim yumi beten, yumi ken tok wanem bilong makim olsem yumi tingim dispela man?
5, 6. (a) Kaunim 1 Timoti 2:1, 2. Long wanem taim yumi mas beten “long helpim ol king na olgeta gavman”? Bilong wanem yumi mas beten olsem? (b) Yumi ken beten olsem wanem bilong helpim ol brata long Bogenvil? na long Bruklin long Amerika? na long kongrigesen bilong yumi?
7. Olsem wanem ol dispela tok bilong Baibel i ken strongim yumi: Buk Song 55:22? 1 Pita 5:7? 1 Jon 5:14?