Mekim Gut Wok Bilong Kingdom Insait long Kongrigesen
1 Long rot bilong Krais Jisas, em Het bilong kongrigesen Kristen, Jehova i givim wok long “bosboi i gat gutpela tingting.” (Lu 12:42, 43) Long dispela rot yumi inap kisim ol magasin na buk samting i save stiaim tingting bilong yumi “long gutpela pasin yumi ol lain bilong God i mas bihainim.” (1 Ti 3:15) Buk Watch Tower Publications Index (tok Inglis) i mekim bikpela wok long helpim yumi long save long ol tok i stap insait long ol magasin na buk samting. Sapos yu no gat dispela indeks, orait mekim wok long indeks bilong buk Lo.
2 Olsem wanem? Yu wanpela elda? Long dispela buk Index na long indeks bilong buk Lo i gat ol het-tok olsem “Elda” na “Wasman,” na aninit long en i gat ol liklik het-tok i kamapim wok bilong ol wasman. Baibel yet i kamapim dispela tok “wasman” bilong makim ol brata i holim bikpela wok insait long kongrigesen. Na long indeks i gat ol het-tok olsem, “Wasman siaman” na “Wasman bilong wok autim tok” na “Kuskus.” Sapos yu lukim het-tok “Kongrigesen,” dispela hap tu bai helpim yu long kisim save.
3 Ol wokman bilong kongrigesen ol tu ol i mekim bikpela wok. Long buk Index o long indeks bilong buk Lo i gat het-tok olsem “Wokman bilong kongrigesen,” na aninit long dispela het-tok i gat lista bilong ol wok ol i kisim na ol mak ol i mas winim. Na tu, bai yu painim sampela tok bilong helpim yu long save long ol wok yu inap mekim insait long kongrigesen, na ol samting yu ken mekim bilong kisim sampela wok moa.
4 Ol elda wantaim ol wokman i gat sampela wok long mekim long ol miting bilong kongrigesen. Long indeks, aninit long het-tok “Miting,” i gat sampela tok bilong helpim yu long save long olgeta samting bilong miting. Na long buk Index i gat liklik het-tok, “efforts to attend” i kamapim ol bikpela wok sampela brata sista i mekim long kam long ol miting. Long lista bilong ol het-tok bilong buk Index, na long indeks bilong buk Lo i gat nem bilong ol wan wan miting, olsem “Miting Bilong Pablik-Tok” na “Miting Bilong Wok Autim Tok” na ol narapela miting.
5 Buk Song 68:11 i tok: “Planti meri i go autim dispela tok.” Olsem ol brata i mas mekim, ol sista tu ol i mas bihainim stretpela pasin insait long kongrigesen. Sampela taim ol askim i kamap olsem: Long wanem taim ol sista i mas karamapim laplap samting long het bilong ol? na olsem wanem sapos i no gat brata bilong mekim beten o lukautim ol miting? Orait, het-tok “Women” long buk Index, o het-tok “Sista” long buk Lo, i ken helpim yu long save long bekim bilong ol dispela askim.
6 Laspela hap bilong 1 Timoti 3:15 i tok, kongrigesen bilong God i olsem “strongpela pos i karim tok tru.” Olsem na yumi ken helpim dispela tok tru sapos yumi bihainim stretpela pasin insait long kongrigesen, olsem mekim gut wok bilong Kingdom.