Jehova i Save Wok Long Mekim Gut Long Lain Bilong Em
1 Ol Witnes Bilong Jehova i kisim wok long autim tok. (Mt 24:14) Long olgeta yia yumi lukim planti samting Jehova i mekim bilong mekim gut long lain bilong em, na dispela samting i strongim yumi. (Sng 76:1) Long olgeta taim em i soim rot long yumi.—2 Ko 2:14.
2 Pastaim long planti kantri, olsem long Is Yurop, gavman i pasim wok bilong ol Witnes, tasol nau rot i op long ol i mekim bikpela wok autim tok long ol dispela hap. Olsem na ol brata i mas wokim planti milion buk na magasin moa long ol faktori bilong yumi. Ol i salim ol dispela buk samting long sip i go long ol narapela narapela kantri bilong ol kongrigesen i ken kisim. Ol brata i mas stretim gut rot bambai ol inap mekim gut ol dispela wok. Na spirit bilong Jehova i kirapim planti brata sista long mekim wok bilong em long olgeta de, olsem mekim wok painia o wok long Betel. Long rot bilong oganaisesen bilong em Jehova i lukautim gut olgeta dispela wok.
3 Long Papua Niugini brens-ofis i makim teritori bilong ol wan wan kongrigesen bilong autim tok long en. Yumi gat wok long autim tok long olgeta man insait long dispela teritori, olsem aposel Pol i bin mekim. (Ap 20:21, 24) Nau em i gutpela taim bilong yumi autim tok, olsem na yumi mas wok strong oltaim long autim tok long olgeta man insait long teritori bilong yumi.
4 Olsem wanem? Ol elda long ol wan wan kongrigesen i gat bikpela wok? Tru tumas, ol i gat. Gutpela yumi kaunim Filipai 2:19-24 na bai yumi ken save long ol samting Pol na Timoti i mekim bilong helpim gut ol brata sista. Mipela i save pinis olsem yupela ol elda long olgeta kongrigesen i save bihainim gutpela pasin bilong tupela. Sapos ol elda i tingim gut ol brata na wok long helpim ol long pasin sori, ol brata bai amamas long mekim wok aninit long ol.—Hi 13:7, 17.
5 Kain kain samting nogut i wok long kamap long planti hap bilong graun, olsem na long olgeta taim yumi olgeta i mas wetim Jehova i helpim yumi. Long sampela kantri long yia i go pinis, ol brata bilong yumi na sampela misineri i bin kisim bikpela hevi na traim. Tasol Baibel i tok profet long kain samting olsem bai painim yumi, long wanem yumi disaipel bilong Krais Jisas na yumi no bilong dispela graun. (Jo 15:19, 20; 2 Ti 3:12) Tasol maski wanem wanem samting Jehova i larim ol birua i mekim yet long yumi, yumi save pinis long wok yumi mas mekim. Olsem na long olgeta hap bilong graun, yumi mas wok strong yet long singautim ol man i kam, olsem Hap Tok Bilong Baibel Bilong Tingim long Yia 1991 i tok: “Olgeta man i harim dispela tok, [ol] tu i mas tok, ‘Yu kam.’ ”—KTH 22:17.
[Ol Askim]
1. I gat wanem tok bilong Baibel i strongim yumi?
2. (a) Olsem wanem long wok autim tok long planti kantri? (b) Jehova i lukautim gut wok bilong em olsem wanem?
3. (a) Aposel Pol i bihainim wanem gutpela pasin long autim tok na yumi ken bihainim? (b) Nau em i gutpela taim long Papua Niugini bilong yumi autim tok o olsem wanem? Pol i kamapim wanem gutpela tok long 2 Korin 6:1, 2?
4. (a) Pol na Timoti i bihainim wanem gutpela pasin bilong ol elda i ken bihainim? (b) Sapos ol elda i tingim gut ol brata na wok long helpim ol, dispela bai kirapim ol brata long mekim wanem?
5. Yumi mas mekim wanem wok olsem Hap Tok Bilong Baibel Bilong Tingim long Yia 1991 i tok yumi mas mekim?
This article is unique to PNG.