Ol Samting Mi Kisim Long Jehova Inap Helpim Mi Olsem Wanem?
1 Jehova i givim planti samting bilong spirit long yumi bilong helpim yumi. Em i tisa bilong yumi. Em i skulim yumi long mekim ol pasin em i laikim. (Ais 48:17) Em i stiaim tingting bilong yumi long rot bilong Jisas. (Ais 55:4) Jehova i Tisa bilong yumi na Krais Jisas i Hetman bilong yumi, olsem na Jehova i helpim lain bilong em long olgeta hap bilong graun na i kamap gutpela.
2 Jehova i givim wanem ol samting long yumi?
(a) Namba wan samting em Baibel.—Sng 119:105; 2 Ti 3:16, 17.
(b) Em i putim oganaisesen bilong em bilong helpim yumi long kisim save long Baibel long taim stret.—Mt 24:45-47.
(c) Long rot bilong dispela oganaisesen yumi kisim Wastaua na Kirap! na planti buk na buklet na liklik nius samting.
(d) Long rot bilong ol miting bilong kongrigesen Jehova i skulim yumi na narapela i strongim bel bilong narapela.—Hi 10:24, 25.
OL DISPELA SAMTING INAP HELPIM YU OLSEM WANEM?
3 Sapos wanpela man i redim gutpela kaikai i swit tumas na givim long yu, olsem wanem dispela kaikai inap helpim yu? Yu yet yu mas kaikai, a? Sapos narapela man i kaikai, orait dispela kaikai i no inap helpim yu. Tru tumas, yu yet yu mas kaikai bambai yu inap kisim strong na i stap laip.
4 Olsem yumi stori pinis, Jehova i givim gutpela kaikai bilong spirit long yumi. Tasol sapos yumi laik i stap strong long spirit, yumi wan wan yet i mas kisim dispela kaikai bilong spirit na “kaikai.” Olsem wanem yu inap “kaikai” dispela?
(a) Yu yet yu mas stadi long Baibel na ol buk samting. Yu mas beten na tingim gut ol tok yu bin lainim.—Sng 1:1-3; Snd 15:28.
(b) Yu mas go long olgeta miting na bekim sampela tok.—Hi 10:24, 25.
(c) Yu mas bihainim tok bilong Matyu 24:14. Yu mas bihainim tok bilong Matyu 28:19, 20 na mekim ol gobek na Baibel-stadi.
5 Tru tumas, sapos yumi laik bai ol samting Jehova i givim long yumi i ken helpim yumi, yumi olgeta i mas taitim bun na wok strong. (1 Ko 3:8) Jehova i save laikim man i mekim olsem.—2 Ko 9:7.
This article is unique to PNG and is repeated in km 4/93.