Bihainim Pasin Marimari Bilong God Long Nau

“[Jehova] yet i mekim wanem samting em i laik mekim long mipela, long wanem, em i God bilong marimari oltaim.”−2 Samuel 24:14.

JEHOVA i winim ol man long bihainim pasin marimari, na King Devit i save long dispela samting. Em i save, pasin bilong Jehova long mekim ol samting i winim pasin bilong yumi ol man, olsem na Devit i laik kisim save long pasin bilong Jehova na bihainim stretpela pasin bilong em. (1 Stori 21:13; Buk Song 25:4, 5) Olsem wanem? Yu tu yu gat dispela tingting olsem bilong Devit?

² Baibel i givim save long yumi long ol tingting bilong God, na Baibel i tokim yumi long tingting bilong em tu long ol samting yumi ken mekim sapos man i rongim yumi. Jisas i bin givim tok long ol aposel em bihain ol i kamap wasman Kristen, na em i tokim ol: “Sapos brata bilong yu em i mekim rong long yu, orait yu go lukim em, na taim yutupela tasol i stap, yu mas traim stretim tok wantaim em. Sapos em i harim tok bilong yu, orait bai yu kisim bek brata bilong yu.” (Matyu 18:15) Dispela rong i no liklik samting, nogat; em bikpela rong, olsem pasin giaman, o bagarapim nem bilong man o kain samting olsem. Jisas i tok, sapos man i bin mekim rong na em i no harim tok, orait, brata i ken kisim sampela witnes i save long dispela samting na ol i ken toktok wantaim man i bin mekim rong na bai em i ken save em i bin mekim tru wanpela rong. “Tasol sapos em i no laik harim tok bilong ol, orait yu mas tokim ol manmeri bilong [kongrigesen]. Na sapos em i no laik harim tok bilong ol tu, orait yu mas lukim em i olsem wanpela haiden na olsem man bilong kisim takis.”−Matyu 18:15-17.

³ Ol aposel i bilong lain Juda, olsem na ol i save long insait bilong dispela hap tok olsem “lukim em i olsem wanpela haiden na olsem man bilong kisim takis.” Bipo ol Juda i no save bung wantaim ol man bilong narapela lain (ol “haiden”), na ol i bin givim baksait long ol Juda i kisim wok long ol Rom long kisim takis,a (Jon 4:9; Aposel 10:28) Jisas i tokim ol disaipel, sapos kongrigesen i rausim wanpela man i bin mekim rong, orait, ol i no ken bung moa wantaim dispela man. Tasol Jisas yet em i bin bung wantaim sampela man bilong kisim takis. Orait, olsem wanem long dispela?

⁴ Luk 15:1 i tok: “Ol man bilong kisim takis na ol man bilong mekim sin ol i kam klostu long Jisas bilong harim tok bilong em.” Tasol i no olgeta man bilong kisim takis na mekim sin i kam long Jisas, nogat−ol man i laik bai Jisas i lusim rong bilong ol, ol tasol i bin kam long Jisas. Na kain man olsem ol i bin go long Jon Bilong Baptais na bai ol i ken harim tok bilong em long tanim bel. (Luk 3:12; 7:29) Olsem na taim sampela i bin kam long Jisas na em i autim tok long ol, em i no kalapim tok bilong em long Matyu 18:17. Na Baibel i tok, i gat “planti man bilong kisim takis na bilong mekim sin” ol i harim tok bilong Jisas na “i gat planti bilong dispela kain man i save bihainim Jisas.” (Mak 2:15) Ol i no laik sakim tok bilong Jisas na bihainim yet pasin nogut, nogat; ol i harim tok bilong em na ol i bilip. Ating ol i no lusim olgeta rong bilong ol, tasol ating ol i wok long senisim pasin bilong ol, na taim “gutpela wasman” Jisas i autim tok long ol em i bihainim pasin bilong Papa bilong em, em Man bilong pasin marimari.−Jon 10:14.

Kristen Mas Lusim Tingting long Rong Bilong Narapela

⁵ Yumi ken save, Papa bilong yumi i orait long lusim tingting long ol rong yumi save mekim, long wanem, Baibel i tok: “Sapos yumi autim sin bilong yumi, orait God bai i mekim olsem em i bin tok. Em bai i mekim stretpela pasin na lusim sin bilong yumi. Na em bai i rausim olgeta pasin nogut i stap long yumi na mekim yumi i kamap klin.” “Mi raitim dispela tok long yupela, bai yupela i no ken mekim sin. Na sapos wanpela man i mekim sin, orait yumi gat Helpim bilong yumi, em i stap wantaim Papa. Em Jisas Krais, dispela man bilong mekim stretpela pasin olgeta.” (1 Jon 1:9; 2:1) Olsem wanem? Jehova inap lusim rong bilong rauspela man, o nogat?

⁶ Em inap. Taim kongrigesen i rausim man, ol elda i save tokim em, sapos em i tanim bel God inap lusim rong bilong em. Em inap kam long ol miting long Haus Kingdom na bai em i ken harim ol tok bilong Baibel na ating dispela inap helpim em long tanim bel. (Lukim 1 Korin 14:23-25.) Ating bihain em bai askim ol elda long kisim em bek long klinpela kongrigesen, na taim ol i bung toktok wantaim em ol i laik save, em i tanim bel tru na lusim dispela rong bilong em o nogat. (Matyu 18:18) Sapos em i mekim, ol inap kisim em bek, olsem 2 Korin 2:5-8 i makim. Sapos em i bin raus inap planti yia, orait, nau em i mas wok long givim bel long kamap strong. Na ating ol i mas helpim em long kisim ol save bilong Baibel na helpim em long laikim ol samting bilong spirit na bai em i ken kamap strong long spirit na kamap strongpela Kristen.

Kam Bek long Jehova

⁷ Bilong kirapim rauspela man long kam bek, ol elda inap i go toktok wantaim em, o nogat? Ol inap. Baibel i kamapim klia olsem: Bilong mekim pasin marimari long man i bin mekim rong, i no olsem yumi no larim em na yumi no givim strafe long em, nogat; planti taim yumi mas kirap mekim sampela samting bilong helpim em long tanim bel. Jehova i save mekim olsem tu. Taim lain bilong em long bipo ol i bikhet na em i laik rausim ol, pastaim em i toksave long ol long rot bilong i kam bek long em. Em i tokim ol: “Yupela Israel, yupela lain bilong Jekop, yupela wokman bilong mi, yupela i no ken lusim tingting long mi bin mekim yupela i kamap wanpela lain manmeri na yupela i stap wokman bilong mi. . . . Mi [bai] rausim . . . ol sin bilong yupela, na . . . mi [bai] kisim bek yupela . . . , olsem na yupela i mas kam bek long mi.”−Aisaia 44:21, 22.

⁸ Na taim ol i raus pinis na ol i stap long narapela hap, Jehova i salim ol profet bilong em long ol bilong tokim ol long “painim” em na “kam klostu long” em. (Jeremaia 29:1, 10-14) Na long Esekiel 34:16 Jehova i tok em i olsem wasman bilong sipsip na lain Israel i olsem ol sipsip i lus. Em i tok: “Sapos sampela sipsip i lus, bai mi go painim ol na kisim bek ol. Na sapos sampela sipsip i go nabaut, bai mi bringim ol i kam bek.” Long Jeremaia 31:10 Jehova i tok piksa long em i olsem wasman bilong sipsip na ol Israel i olsem lain sipsip, tasol i no olsem em i stap nating long banis na wetim ol sipsip yet i kam long em, nogat—em yet “bai i bringim ol i kam bek gen” na “lukautim ol gut.” Tru ol i raus i stap na planti bilong ol i no tanim bel, tasol God i kirap mekim sampela samting na bai ol dispela sipsip i ken kam bek. Na sapos yumi lukim Malakai 3:6 yumi ken save God i no ken senisim tingting bilong em—em bai mekim wankain pasin long ol Kristen.

⁹ Dispela i givim tingting long yumi olsem ating ol elda i ken mekim sampela samting long sampela rauspela man ating ol i bin tanim bel, a? Aposel Pol i bin tokim ol elda long rausim wanpela man nogut long kongrigesen long Korin. Bihain dispela man i tanim bel, na Pol i tokim ol long mekim pasin sori long em, na bihain ol i kisim em bek long kongrigesen.−1 Korin 5:9-13; 2 Korin 2:5-11.

¹⁰ Buk em pastaim yumi kolim hia em i tok, bipo ‘ol i bin rausim man na bai em i no ken bagarapim lain bilong ol. “Liklik yis tasol i save mekim olgeta bret i solap.” (1 Ko 5:6) Planti hap bilong Baibel na ol narapela buk i tok olsem, tasol i gat narapela samting i bin kirapim Pol long mekim dispela tok long 2 Korin 2:7-10—em i tingting long helpim dispela man, maski em i raus.’ Olsem na long nau tu ol wasman bilong kongrigesen i mas i gat dispela tingting long helpim rauspela man sapos em i laik kam bek. (Aposel 20:28; 1 Pita 5:2) Ating ol pren bilong dispela man long bipo na ol wanblut bilong em ol i laik bai em i kam bek, tasol ol i no laik kalapim tok bilong 1 Korin 5:11, olsem na ol i no bung wantaim em.b Ol i larim ol elda i ken toktok wantaim em na bai ol elda i ken save, em i laik kam bek o nogat.

¹¹ Tasol ol elda i no ken traim helpim man i bikhet na sakim lo na givim baksait long tok i tru na “kirap na mekim tok giaman nabaut, bilong pulim ol manmeri bilong God i go bihainim” em. Dispela kain man inap “bagarapim bilip” bilong kongrigesen; em i “man bilong mangal” na “tok giaman.” (Aposel 20:30; 2 Pita 2:1, 3) Na Baibel i no tok ol elda i mas helpim ol rauspela man i bikhet na i no laik harim tok o ol i wok long kirapim ol narapela long mekim pasin nogut.-2 Tesalonaika 2:3; 1 Timoti 4:1; 2 Jon 9-11; Jut 4, 11.

¹² Tasol planti rauspela man i no olsem. Ating sampela i lusim pasin nogut ol i bin mekim. Ating sampela i lusim pinis smok, na sampela i no dring spak moa, na sampela i no pulim moa ol narapela long mekim pasin i no stret. Taim ol Israel i raus i stap long narapela hap na ol i no tanim bel na kam bek yet long God, em i salim ol wokman bilong em i go bilong tokim ol na kirapim ol long kam bek long em. Ating Pol o ol elda bilong kongrigesen Korin i bin go lukim dispela rauspela man o nogat, Baibel i no tok, tasol taim dispela man i tanim bel na lusim pasin pamuk, Pol i tokim kongrigesen long kisim em bek.

¹³ Sampela elda i bin bungim sampela rauspela man,c na elda i lukim olsem em inap givim liklik tok long dispela man, na elda i tokim em long ol samting em inap mekim na bai em i ken kam bek; na sampela kain man olsem ol i bin tanim bel na kongrigesen i kisim ol bek. Em gutpela. Olsem na yumi save, ating i gat sampela man em kongrigesen i bin rausim ol o ol yet i rausim skin bilong ol i go ausait, tasol sapos ol wasman i mekim pasin marimari long ol, ol bai kirap harim tok. Tasol olsem wanem ol elda i ken mekim dispela samting? Wanpela taim tasol long olgeta yia ol i ken tingim husat ol rauspela man i stap insait long teritori bilong kongrigesen bilong ol, na husat i bin raus longtaim liklik olsem winim wanpela yia pinis. Sapos i gat wanpela ol i ting ol inap toktok wantaim em, orait, ol i ken makim tupela elda (gutpela sapos tupela i save long ol samting bilong dispela man) bilong i go toktok wantaim em. Sapos i gat rauspela man i save tok pait o bel nogut long tok i tru o em inap mekim nogut long kongrigesen o em i tok em i no laik bai ol i kam helpim em, orait maski long kain man olsem.−Rom 16:17, 18; 1 Timoti 1:20; 2 Timoti 2:16-18.

¹⁴ Tupela elda hia i ken telefon na askim man, ol inap i go toktok liklik wantaim em o nogat; o ol i ken go tasol na bungim em. Ol i no ken kros o pes drai samting, nogat; ol i mas bihainim pasin marimari. Na ol i no ken kamapim gen ol tok bilong taim kongrigesen i bin rausim em, nogat; ol i mas stori long ol tok bilong Baibel, olsem Aisaia 1:18 na Aisaia 55:6, 7 na Jems 5:20. Sapos man i gat laik long kam bek insait gen long lain bilong God, orait, tupela i ken kolim ol samting em i mas mekim, olsem kaunim Baibel na ol buk samting bilong Sosaiti Was Taua, na go long ol miting long Haus Kingdom.

¹⁵ Taim tupela elda i go toktok wantaim rauspela man tupela i mas tingting gut na bai ol i ken save, dispela man i bin tanim bel o nogat, na tupela i mas bung gen wantaim em o nogat. Na tupela i mas save, sampela rauspela man i no inap tanim bel. (Hibru 6:4-6; 2 Pita 2:20-22) Taim tupela i toktok pinis wantaim dispela man, tupela i ken toksave long Komiti Bilong Lukautim Wok Bilong Kongrigesen, na Komiti i ken toksave long ol narapela elda taim ol elda i miting. Taim tupela i mekim dispela pasin marimari ol i bihainim pasin bilong God, em i bin tok: “Sapos yupela i lusim pasin nogut na kam bek long mi, mi tu bai mi lusim belhat na kisim bek yupela, Mi Bikpela I Gat Olgeta Strong, mi tok pinis.”−Malakai 3:7.

Ol Narapela Pasin Marimari

¹⁶ Olsem wanem long ol narapela brata i no wasman na ol i no gat wok long i go lukim ol man i bin raus? Ol i ken mekim wanem bilong helpim dispela wok bilong ol wasman na bilong bihainim pasin bilong Jehova?

¹⁷ Sapos sampela rauspela man i stap o sampela i bin rausim ol yet i go ausait, yumi mas bihainim dispela tok: “Sapos wanpela man yupela i save kolim brata long Krais, em i mekim pasin pamuk o em i mangal long ol samting bilong ol arapela man o em i lotu long ol giaman god o em i tok bilas o em i spak o em i stilim samting bilong narapela man, orait yupela i no ken i stap wantaim em. Nogat. Na tu, yupela i no ken kaikai wantaim kain man olsem.” (1 Korin 5:11) Tasol yumi no ken mekim olsem long famili bilong man i raus ol i stap wantaim em long haus. Ol Juda bilong bipo i strong tumas long bihainim dispela lo, na ol i kirap mekim olsem long famili bilong man i kisim takis, tasol Jisas i no tok long mekim olsem, nogat. Em i tok tasol, sapos man i gat rong na em i no harim tok bilong ol man i laik helpim em, orait, kongrigesen i mas mekim long em olsem ol i save mekim long “wanpela haiden na olsem man bilong kisim takis.” Jisas i no tok long mekim olsem long famili Kristen bilong dispela man; em i tok long mekim long dispela man tasol.—Matyu 18:17.

¹⁸ Yumi mas strongim famili bilong man i raus sapos ol i gutpela Kristen. Sapos em i sindaun yet wantaim ol, nogut em i wok long putim hevi long ol na i laik givim hatwok long ol long bihainim ol samting bilong spirit, o em i no laik bai ol narapela Kristen i kam lukim famili, o taim ol i kam em tu i kam bung na em i no laik klia, o em i laik pasim famili na bai ol i no ken go long ol miting na kibung Kristen. (Lukim Matyu 23:13.) Sapos sampela famili Kristen i gat dispela hevi, yumi mas sori long ol.−2 Korin 1:3, 4.

¹⁹ Yumi ken “strongim bel bilong ol . . . na . . . helpim ol. . . . Na . . . mas isi isi long” ol na mekim gutpela tok sori long ol. (1 Tesalonaika 5:14) Yumi ken mekim dispela pasin marimari long ol paslain long miting, na bihain long miting, na taim bilong raun wantaim ol long autim tok, na long ol narapela taim yumi save stap wantaim ol. Yumi no ken toktok wantaim ol long ol samting bilong rausim man, nogat—yumi ken toktok long ol gutpela samting bilong strongim ol. (Sindaun 25:11; Kolosi 1:2-4) Ol elda bai mekim wok wasman na i go lukim ol Kristen insait long dispela famili, tasol ating yumi ol narapela tu i ken go lukim ol, na taim yumi mekim olsem, yumi ken abrusim dispela rauspela man. Sapos yumi laik i go lukim ol o toktok wantaim ol long telefon na rauspela man yet i bekim tok, yumi ken tok yumi laik lukim wanpela long famili bilong em. Sampela taim yumi ken singautim ol Kristen bilong dispela famili i kam long haus bilong yumi na bai yumi ken bung na toktok wantaim. Maski ol i yangpela o lapun, ol i wanwok bilong yumi ol wokman bilong Jehova, na yumi wantaim ol i bilong lain bilong God, olsem na ol i mas bung wantaim yumi.−Buk Song 10:14.

²⁰ Na yumi ken bihainim pasin marimari sapos kongrigesen i kisim bek rauspela man. Jisas i tok, “sapos wanpela man bilong mekim sin em i tanim bel,” ol ensel long heven “i save amamas moa moa yet.” (Luk 15:7, 10) Pol i tokim ol Kristen long Korin long pasin ol i ken mekim long man i bin raus na ol i kisim bek, em i tok: “Yupela i lusim sin bilong em na mekim isi bel bilong en. Nogut bikpela bel hevi moa i daunim tru dispela man. Olsem na mi laik bai yupela i soim em olsem yupela i laikim em yet.” (2 Korin 7, 8) Bihain long taim ol i kisim bek rauspela man, long pasin bilong gutpela tingting yumi ken mekim pasin sori olsem long em.

²¹ Na yumi ken tingim wanpela tok piksa bilong Jisas, em i makim wanpela pasin yumi no ken mekim. Em i stori long wanpela yangpela man i lusim papa na bikbrata bilong em na em i raun mekim ol pasin nabaut, na bihain em i kam bek gen, tasol bikbrata i bel nogut long em. Yumi no ken mekim olsem long man ol i kisim em bek, na yumi no ken tingim moa rong em i bin mekim na ol i bin rausim em, nogat. Yumi mas mekim pasin olsem papa bilong yangpela man i bin mekim—dispela papa i bihainim pasin marimari bilong Jehova. Pikinini i bin lus na i olsem em i dai pinis, tasol em i kam bek gen, olsem lusim dai, na nau papa i amamas tru. (Luk 15:25-32) Olsem tasol yumi tu i mas toktok gut long man i bin raus na ol i kisim em bek, na yumi mas strongim bel bilong em. Em i mas pilim olsem yumi marimari long em olsem Papa bilong yumi long heven i save mekim na em i lusim tingting long rong bilong man i tanim bel.−Matyu 5:7.

²² Tru tumas, sapos yumi laik bihainim pasin bilong God bilong yumi, orait, yumi mas bihainim pasin marimari i stret wantaim ol lo bilong em. Baibel i tok long God olsem: “[Jehova] i save laikim yumi tumas na i save marimari long yumi. Em i no save kros kwiktaim na oltaim em i save sori long yumi. Em i save mekim gutpela pasin long olgeta manmeri na em i save marimari long olgeta samting em i bin wokim.” (Buk Song 145:8, 9) Jehova i makim gutpela pasin tru bilong marimari, na ol Kristen i ken bihainim!

[Ol Futnot]

Lukim 1991 Yearbook of Jehovah’s Witnesses, pes 53, 54.

1. Devit i ting olsem wanem long pasin marimari bilong God? Olsem wanem na em i gat dispela tingting?

2. Long Matyu 18:15-17 Jisas i tok wanem long pasin bilong stretim bikpela rong?

3. Jisas i tok, sapos man i mekim bikpela rong na em i no tanim bel, ol i mas “lukim em i olsem wanpela haiden na olsem man bilong kisim takis,” na i olsem Jisas i tokim ol long ol i mas mekim wanem long dispela man?

4. Yumi tingim tok bilong Jisas long Matyu 18:17, orait, olsem wanem Jisas inap bung na toktok wantaim sampela man bilong kisim takis na sampela sinman?

5. God i ting olsem wanem long pasin bilong lusim rong bilong man?

6. Rauspela man i ken mekim wanem na bai ol i ken lusim tingting long rong bilong em na kisim em bek?

7, 8. God i mekim wanem long lain bilong em ol i raus i stap long narapela hap?

9. Kongrigesen Kristen bilong bipo i bin mekim wanem bilong bihainim pasin marimari bilong God?

10. (a) Wanem tingting i mas kirapim ol elda long i go lukim sampela rauspela man? (b) Bilong wanem ol wanblut Kristen i no ken mekim dispela wok?

11, 12. Wanem kain rauspela man ating ol elda i no laik i go lukim em? Wanem kain rauspela man ating ol i laik i go lukim em?

13, 14. (a) Olsem wanem yumi ken save, sampela rauspela man inap long tanim bel sapos ol elda i mekim pasin marimari long ol? (b) Lain elda i ken mekim wanem bilong bungim man i raus?

15. Taim ol elda i bung wantaim rauspela man, ol i mas tingim wanem samting?

16, 17. Yumi mas mekim wanem long ol famili Kristen bilong rauspela man?

18, 19. Yumi ken mekim wanem gutpela pasin Kristen long ol famili bilong rauspela man?

20, 21. Yumi ken mekim wanem sapos ol i kisim bek man i raus?

22. Yumi mas mekim wanem long bihainim pasin bilong God Jehova?

[Blok long pes 3]

Sapos i gat man o meri bipo em i bin stap insait long klinpela lain bilong God em ol i stap amamas, tasol em i bin raus, o em i rausim em yet, orait i no olsem em i mas i stap ausait olsem, nogat. Em i ken mekim wanpela samting bilong helpim em yet. Em i ken tanim bel na em i ken toksave olsem long ol elda bilong kongrigesen. Rot i op long em i ken i kam bek.