Narapela i Ken Helpim Narapela—Long Mekim Wanem?
1 Yumi amamas tru olsem nau yumi kisim Wastaua tupela taim long olgeta mun. Olgeta Wastaua i gat gutpela piksa na gutpela kala! Ating planti taim yu bin tenkyu long Jehova long givim dispela gutpela presen long yumi!
2 Tasol bikpela samting moa em olsem: Ol dispela magasin i wanpela rot Jehova i mekim wok long en bilong givim ‘kaikai’ bilong spirit long yumi long taim stret bilong en. (Mt 24:45-47) Nau bai yumi kisim planti ‘kaikai’ moa bilong spirit, winim bilong bipo! Bai yumi kisim long wankain taim olsem ol bikpela lain brata bilong yumi long olgeta hap bilong graun ol i save kisim long “taim bikman i makim”!—Lu 12:42-44.
3 Tru tumas, yumi mas i gat ol dispela planti kaikai moa bilong spirit! Bilong wanem? Long wanem Satan na ol spirit nogut i stap long olgeta hap bilong dispela graun. (KTH 12:12) Satan i laik mekim wanem? Em i laik bai yumi bagarapim nem bilong Jehova na yumi lus long kisim laip i stap oltaim.—KTH 12:17.
4 Bilong sakim Satan yumi mas i gat save bilong Baibel. Sapos yumi gat dispela save bai yumi inap bilip. Sapos yumi gat bilip bai yumi inap mekim gut bel bilong Jehova na bai em i lukautim yumi.—Hi 11:4.
5 Olsem na yumi olgeta wan wan i mas i gat Baibel na Wastaua bilong yumi yet. Olsem wanem long ol pikinini? Ol pikinini tu i mas i gat Baibel na Wastaua bilong ol yet bilong stadi long en.
6 Tasol ating sampela bai tok olsem: “Dispela brata o sista i no save long kaunim! Pikinini bilong mi i no save long kaunim! Olsem na bilong wanem ol i mas i gat Baibel na Wastaua? As bilong dispela i olsem: Ol i mas i gat bambai ol inap lukim ol gutpela piksa i stap long Wastaua, na i olsem ol i ‘stadi’ long ol dispela piksa. Ol piksa i gat wok long helpim yumi long kisim gut ol bikpela tok em Wastaua i laik lainim yumi long en.
OL MAN I SAVE LONG KAUNIM BUK OL I GAT WOK
7 Olsem wanem? Yu save long kaunim? Sapos olsem, i olsem yu kisim wanpela gutpela presen. Olsem wanem? Wanpela man i bin lainim yu long kaunim buk? Na taim yu lain long mekim, yu bin wok strong na bai yu inap save gut long pasin bilong kaunim? Tru tumas, yu bin mekim olsem, a? Tasol olsem wanem? I gat sampela long kongrigesen bilong yu i no bin skul? Yu laik helpim ol long lain long kaunim buk? Yumi ol manmeri i bin skul, yumi gat wok bilong lainim ol narapela i no bin skul.
8 Wanem namba wan samting yu ken mekim bilong helpim man long lain long kaunim buk? Tokim em long sindaun wantaim yu long Stadi Wastaua. Taim brata i kaunim ol paragraf, helpim em long bihainim ol tok long Wastaua bilong em. Sapos pikinini bilong yu i lain long kaunim, orait yu ken mekim dispela samting wantaim em. Sapos yumi lainim man long kaunim buk bai yumi kisim bikpela amamas taim em i kirap long kaunim sampela tok, na maski em i no kaunim gut pastaim na em i popaia nabaut, bihain bai em inap kaunim gut!
9 Tru tumas, yumi olgeta inap helpim ol narapela. Tasol sapos yumi laik mekim gut dispela wok, yumi mas mekim long pasin isi, na oltaim yumi mas helpim sumatin—nogut yumi les long mekim. Na sapos sumatin i laik save gut long pasin bilong kaunim buk, em tu i mas wok strong—em i no ken les! Gutpela tru sapos olgeta long kongrigesen i holim Wastaua bilong ol yet, em ol i save pinis long kaunim o ol i lain yet.
10 Sapos narapela i helpim narapela long lain long kaunim buk, dispela bai helpim ol long kisim sampela save moa na kamap strong moa long bilip na mekim pasin Jehova i laikim, em Man bilong givim laip long yumi!
This article is unique to PNG.