Ol Miting Bilong Wok Bilong Februeri
Wik i Kirap long Februeri 3
Singsing 180
5 min: Ol toksave bilong kongrigesen.
15 min: “Save Gut Long Pasin Bilong Autim Stret Tok Tru Bilong God.” Paslain long miting, makim wanpela brata i save gut long kaunim tok na em i ken redi long kaunim ol paragraf. Kaunim pinis paragraf, orait kamapim askim bilong en.
15 min: Stori Bilong Mun. Toktok wantaim ol brata long nupela Stori Bilong Mun na helpim ol long save olsem wanem dispela tok inap helpim ol man long nau. Redim gut na mekim dispela soim hia:
As Tru Bilong Gutpela Tingting
Snd 2:6, 7: God i givim gutpela tingting long yumi.
Ais 48:17, 18: Bihainim tok bilong God na kisim ol blesing bilong oltaim.
SOIM: Tupela pablisa i autim tok long ol haus na ol i toktok wantaim man bilong haus.
Man bilong haus: Gutpela tru yu kam lukim mi. Tasol mi lotu pinis nau long moningtaim.
Pablisa 1: Gutpela yu tokim mi. Mi laik save, yu bilong wanem misin?
Man bilong haus: Mi Katolik. Mi go bikpela long lotu Katolik.
Pablisa 1: Gutpela tru yu man bilong tingim ol samting bilong lotu. Long nau planti man i no tingim God tumas, olsem na pasin bilong pait na bagarapim man i kamap bikpela long Papua Niugini na long ol narapela hap bilong graun tu.
Man bilong haus: Tru tumas.
Pablisa 1: Tasol yumi ken amamas, long wanem, long rot bilong Baibel, God i givim gutpela tingting long yumi bilong soim rot long yumi. Mi laik kaunim tok bilong Sindaun 2:6, 7. (Kaunim)
Pablisa 2: Gutpela tru yumi gat Baibel bilong helpim yumi nau long dispela taim bilong hevi! Sapos yumi bihainim ol tok bilong Baibel, dispela bai helpim yumi long nau na long bihain tu. Mi laik kaunim wanpela tok i stori long ol samting God i tok promis long mekim long nau na long bihain. Long Aisaia 48:17, 18, Baibel i tok: (Kaunim)
Pablisa 1: Tru tumas, yumi olgeta i gat laik long kisim sampela save moa long ol tok bilong Baibel, a? Bilong helpim yu, mipela i gat dispela . . . (mekim wok long samting bilong tilim long dispela mun).
10 min: Taim Bilong Go Bek Long Skul! Wanpela elda i gat pikinini em i ken toktok long ol samting papamama i ken mekim bilong helpim ol pikinini taim ol i go bek long skul.
1 Long planti hap long Papua Niugini, mun Februeri em i taim bilong ol pikinini i go bek long skul. Ating planti bilong ol pikinini bilong yumi bai ol i stap long nupela klas na bai ol i gat nupela tisa.
2 Long skul, long olgeta de ol pikinini bilong yumi i mas bung wantaim ol pikinini bilong ausait, na dispela i putim bikpela traim long ol. Satan i kamapim planti traim bilong pulim ol, olsem pasin bilong smok, na kisim drak, na tok nogut, na salut long plak, na mekim singsing bilong litimapim kantri, na insait long ol beten em skul i save mekim long moningtaim, na i gat planti traim moa.
3 Yupela ol papamama! Olsem wanem? Yupela i bin toktok wantaim ol pikinini bilong yupela long ol traim inap painim ol, na kamapim sampela tok bilong buklet Skul bilong givim gutpela tingting long ol? Yupela i bin i go wantaim ol pikinini long skul bilong lukim tisa na toktok gut wantaim em long tingting bilong yumi long ol dispela samting? Sapos yupela i mekim olsem, ating bai i no gat hevi long ol dispela samting bihain. Ol tisa i amamas long papamama i kam long skul na toktok wantaim ol long hevi inap kamap. Na yupela i mas toksave long tisa olsem yupela i laik wok gut wantaim em long wok em i mekim bilong skulim ol pikinini bilong yupela.
4 Yupela ol pikinini man na meri! Mipela ol man i bikpela pinis i save long ol bikpela traim i save painim yupela long skul. Olsem wanem? Yu bin tingim ol dispela traim? Yu laikim tru Jehova? Sapos ol wanskul i lap nogut long yu na tok bilas long yu, bai yu bihainim yet ol lo bilong Jehova? Tingim 3-pela yangpela Hibru—ol i no laik brukim skru na lotu long wanpela piksa, olsem na ol man i tromoi ol i go long paia, tasol Jehova i bin sambai long ol na mekim gut long ol. Sapos yu holimpas ol lo bilong em, em bai mekim gut long yu tu na sambai long yu. Mipela i beten askim Jehova long stap wantaim yupela long taim yupela i go bek long skul!
Singsing 221 na beten.
Wik i Kirap long Februeri 10
Singsing 161
10 min: Ol toksave bilong kongrigesen.
20 min: “Strongim Bilip Bilong Yu Bambai Yu Bilip Strong Moa Long Baibel.” Paslain long miting, makim wanpela brata i save gut long kaunim tok na em i ken redi long kaunim ol paragraf. Kaunim pinis paragraf, orait kamapim askim bilong en.
15 min: Ol Kaikai i Redi Pinis Long Brasil. Wanpela brata i ken stori long ol tok i stap long pes 24-27 bilong Wastaua bilong Septemba 15, 1991. Stori gut long ol tok bilong “Pasin Bilong Ol i Senis,” long pes 27. Brata i ken kamapim sampela tok ol brata bai amamas long harim, tasol em mas stori gut long Baibel i gat strong bilong kirapim man long senisim pasin.
Singsing 46 na beten.
Wik i Kirap long Februeri 17
Singsing 55
10 min: Ol toksave bilong kongrigesen. Ripot bilong ol akaun. Tokaut long ol kontribusen em kongrigesen i bin salim i go long Sosaiti.
20 min: “Buk-Stadi Bilong Kongrigesen—Namba 5 Hap.” Paslain long miting, makim sampela brata o sista ol i save gut long kaunim tok na ol i ken redi long kaunim gut ol paragraf. Kaunim pinis paragraf, orait kamapim askim bilong en. Wasman bilong wok autim tok i ken lukautim dispela hap.
15 min: “Lusim Olgeta Kain Samting i Mekim Yumi i No Inap Ran Strong.” Wanpela elda i ken lukim Wastaua bilong Oktoba 15, 1991, long pes 21-24, na kamapim ol bikpela tok bilong en bilong strongim bel bilong ol brata sista.
Singsing 15 na beten.
Wik i Kirap long Februeri 24
Singsing 105
10 min: Ol toksave bilong kongrigesen.
20 min: “Givim Bel Long Wok Autim Tok—Namba 5 Hap.” Paslain long miting, makim wanpela brata i save gut long kaunim tok na bai em i ken kaunim ol paragraf. Kaunim pinis paragraf, orait kamapim askim bilong en.
15 min: Askim. Wanpela elda i ken lukautim dispela hap. Tok i mas helpim ol brata sista long save bilong wanem ol i mas was gut long pasin ol i mekim long taim ol i go lukim baptais, na long ol samting dispela inap mekim long nem bilong Jehova na long tok bilong Kingdom.
Singsing 196 na beten.