Save Gut Long Pasin Bilong Autim Stret Tok Tru Bilong God
1 Sapos yumi autim gut Tok bilong God, dispela bai helpim ol man long bilipim tok bilong Kingdom. Olsem na Pol i kirapim yumi long lain long autim gut tok, em i tok: “Yu mas wok strong long kamap wokman tru, na bai God i laikim wok bilong yu. Olsem na bai yu autim stret tok tru bilong God, na bai yu no gat sem long ai bilong en.”—2 Ti 2:15.
2 Sapos yumi laik autim gut tok bilong Baibel, yumi mas lain long mekim olsem. Bikpela samting em yumi mas makim taim bilong yumi yet yumi stadi na go long ol miting. Tasol yumi mas mekim wok long ol samting yumi lain long en, na taim yumi autim tok yumi mas mekim wok long Baibel long olgeta taim. Bilong mekim olsem, yumi mas wok strong na askim God long helpim yumi na soim rot long yumi.—1 Jo 3:22.
3 Kamapim Tok Bilong God: Em bikpela samting ol man i mas save olsem ol tok yumi autim i no kamap long tingting bilong yumi yet, nogat, em i kam long Baibel, em Tok bilong God. (Jo 7:18) Sapos yumi opim Baibel na soim tok bilong God long ol, dispela inap helpim tru ol. Ol man i gat gutpela bel ol i save laikim tru tok bilong Baibel. Sapos long olgeta taim yumi mekim wok long Baibel, dispela bai helpim yumi long autim gut tok, na bai yumi helpim ol narapela long kisim bikpela save moa long Tok bilong God, na dispela bai helpim ol.
4 Planti man i no save gut long ol tok bilong Baibel. Olsem na nogut yumi kaunim nating ol tok bilong en. Yumi mas tingim gutpela rot bilong kamapim as bilong ol dispela tok. Olsem: Yumi ken givim sampela askim long ol o kolim wanpela hevi bilong kirapim tingting bilong ol. Na tu, sapos yumi kaunim tasol wanpela skripsa, ating man i no kisim gut. Olsem na yumi mas kolim gen ol bikpela tok bilong en na bai em inap kisim gut.
5 Oltaim Jisas i kamapim ol tok bilong Baibel bilong helpim ol man i gat gutpela bel, na bilong daunim tok bilong ol birua. Taim Pol i autim tok, em i save mekim pasin olsem: Em i kamapim as bilong ol tok em i autim na em i kolim sampela tok bilong Baibel bambai ol man i ken save ol dispela tok i stret. (Ap 17:2, 3) Sapos yumi wok strong long save gut long pasin bilong autim gut tok tru bilong God, orait, bai yumi no pret long autim tok, na taim yumi autim tok bai yumi kisim amamas moa yet.
[Ol Askim]
1. (a) Pol i kirapim yumi long mekim wanem, olsem 2 Timoti 2:15 i tok? (b) Sapos yumi save pinis long pasin bilong autim gut tok bilong Baibel, dispela bai helpim ol man olsem wanem?
2. (a) Yumi mas mekim wanem na bai yumi inap autim gut tok bilong Baibel? (b) Kaunim 1 Jon 3:22. Sapos yumi mekim pasin God i laikim, orait God i tok promis long mekim wanem?
3. Kaunim Jon 7:18. Sapos yumi mekim wok long Baibel, olsem wanem dispela inap helpim ol man? Olsem wanem dispela inap helpim yumi yet?
4. Kolim sampela samting yumi ken mekim bilong helpim ol man i no save gut long ol tok bilong Baibel.
5. Kaunim Aposel 17:2, 3. Jisas na Pol i mekim wanem na wok bilong ol long autim tok i bin kamap gutpela? Yumi tu yumi ken mekim wanem na bai wok bilong yumi long autim tok i kamap gutpela?