Kamapim Stret Mining Bilong Ol Skripsa

TAIM yumi skulim ol narapela, yumi no ken ritim hap bilong Baibel long ol na em tasol. Aposel Pol i tokim Timoti: “Yu mas wok strong long kamap wokman tru, na bai God i laikim wok bilong yu. Olsem na bai yu autim stret tok tru bilong God, na bai yu no gat sem long ai bilong en.”​—2 Ti. 2:15.

Bilong mekim olsem, mining bilong ol skripsa yumi kamapim i mas stret wantaim ol samting Baibel yet i lainim yumi long en. Olsem na yumi mas tingim tok bilong ol ves i stap klostu, na no ken kisim sampela hap tok yumi laikim na yumi bungim wantaim tingting bilong yumi yet. Long rot bilong profet Jeremaia, Jehova i tokim lain bilong em long lukaut long ol profet i tok olsem ol i autim tok bilong Jehova, tasol tru tru ol i save autim “driman i bin kamap long tingting bilong ol yet.” (Jer. 23:16) Aposel Pol i tokim ol Kristen olsem ol i no ken bihainim tingting bilong ol man na bagarapim Tok Bilong God. Em i tok: “Mipela i givim baksait pinis long olkain pasin nogut ol man i save hait na mekim. Mipela i no save wokabaut long pasin bilong giaman. Na mipela i no save senisim tok bilong God. Nogat.” Long dispela taim bipo ol man bilong salim wain i save giaman na tanim wara wantaim wain bambai ol i ken kisim bikpela win mani moa. Yumi no save tanim Tok Bilong God wantaim tingting bilong ol man na bagarapim Tok bilong God, nogat. Pol i tok: “Mipela i no olsem ol planti man, ol i save go nabaut na mekim wok bisnis long tok bilong God. Nogat. Mipela i kisim dispela wok long God yet . . . Mipela i wanbel wantaim Krais, na long ai bilong God mipela i save autim stret ol tok.”​—2 Ko. 2:17; 4:2.

Ating sampela taim bai yu kolim tok bilong wanpela skripsa bilong kamapim klia wanpela stiatok. Planti stiatok i stap long Baibel na ol i givim gutpela tingting yumi ken bihainim taim ol kain kain samting i kamap long yumi. (2 Ti. 3:​16, 17) Tasol taim yu kamapim mining bilong skripsa yu mas save olsem tok yu kamapim i stret na yu no paulim mining bilong en na mekim olsem tok bilong skripsa i strongim tok yu yet yu laik kamapim. (Sng. 91:​11, 12; Mt. 4:​5, 6) Mining bilong skripsa yu kamapim i mas stret wantaim ol samting Jehova i laik mekim na i stret wantaim olgeta Tok Bilong God.

Na tu, bilong “autim stret tok tru bilong God” yumi mas save long as tingting em tok bilong Baibel i kamapim. Em i no wanpela “stik” bilong mekim save long ol narapela. Ol tisa bilong lotu husat i bin birua long Jisas Krais, ol i kolim ol tok bilong buk bilong God, tasol i olsem ol i pasim ai na ol i no lukim ol samting i bikpela tru​—ol samting bilong stretpela pasin, marimari, na pasin bilong i stap gut long God​—em ol samting God i laik bai yumi mekim. (Mt. 22:​23, 24; 23:​23, 24) Taim Jisas i lainim ol man long Tok Bilong God, em i bihainim pasin bilong Papa bilong em. Jisas i givim bel long tok i tru na em i laikim tru ol manmeri em i skulim. Yumi mas wok strong long bihainim pasin bilong en.​—Mt. 11:28.

Olsem wanem yumi ken save olsem yumi kamapim stret mining bilong wanpela skripsa? Pasin bilong ritim Baibel long olgeta taim bai helpim yumi. Yumi mas pilim tru gutpela samting Jehova i givim yumi, em wokboi i gat gutpela tingting, em lain Kristen God i makim long spirit holi na long rot bilong ol Em i givim kaikai bilong spirit long ol man i bilip long em. (Mt. 24:45) Pasin bilong mekim stadi bilong yumi yet, go oltaim long ol miting na insait long ol miting bai helpim yumi long kisim helpim long ol gutpela tok lain wokboi i save givim yumi.

Sapos yu gat buk Toktok Gut long tok ples bilong yu na yu lain gut long yusim dispela buk, bai yu gat gutpela samting bilong helpim yu long kamapim stret mining bilong planti skripsa yumi save ritim taim yumi mekim wok autim tok. Sapos yu tingting long ritim wanpela skripsa yu no save gut long en, pasin daun bai kirapim yu long skelim gut ol buk bilong kisim save long dispela skripsa bambai yu inap autim stret tok tru bilong God.​—Snd. 11:2.

Kamapim Klia Mining. Taim yu wok long skulim ol narapela yu mas save gut olsem, ol i luksave long olsem wanem samting yu toktok long en i stret wantaim ol skripsa yu kamapim. Sapos yu kamapim wanpela askim pastaim, orait ol man i mas luksave long olsem wanem skripsa i bekim dispela askim. Sapos dispela skripsa i strongim wanpela tok yu mekim, orait sumatin i mas luksave long olsem wanem dispela skripsa i kamapim klia dispela tok yu mekim.

Sapos yu ritim skripsa tasol​—maski yu bihainim pasin bilong kamapim strong ol tok taim yu ritim​—em i no inap. Tingim, ol man i no save tumas long Baibel, na ating ol i no inap kisim gut tok yu laik kamapim taim yu ritim dispela skripsa wanpela taim tasol. Yu mas kirapim ol long lukim hap bilong dispela skripsa i stori stret long samting yu toktok long en.

Bilong mekim olsem yu mas kolim ol bikpela hap tok tasol, em ol hap tok i kamapim stret samting yu toktok long en. Wanpela rot long mekim olsem, em long kolim gen ol hap tok bilong skripsa i kamapim dispela tingting yu laik toktok long en. Sapos yu toktok wantaim wanpela man, ating yu ken kamapim sampela askim bilong helpim em long luksave long ol bikpela tok. Sampela man bilong mekim tok, taim ol i toktok wantaim wanpela lain, ol i laik kolim sampela narapela hap tok i gat wankain mining o kamapim gen dispela tingting long narapela pasin. Tasol sapos yu laik mekim olsem, was gut, nogut odiens i paul na ol i no save olsem wanem samting yu toktok long en i stret wantaim tok bilong skripsa yu kamapim.

Long dispela rot yu bin makim ol hap tok i helpim tok yu laik kamapim. Nau yu mas mekim sampela samting moa. Olsem wanem? Taim yu mekim tok bilong kamapim dispela skripsa, yu bin kamapim klia as na yu laik ritim dispela skripsa? Sapos olsem, orait soim ol long olsem wanem ol hap tok yu bin kamapim strong i stret wantaim tok yu bin kirapim ol long wet long harim. Kamapim klia olsem wanem ol dispela tok i stret wantaim. Maski yu no bin mekim planti tok olsem bilong kamapim wanpela skripsa, yu mas kamapim sampela tok moa.

Ol Farisi i givim wanpela askim long Jisas ol i ting em bai hatwok long bekim, olsem: “Ating lo bilong yumi i orait long man i ken rausim meri long laik bilong em yet?” As tingting bilong bekim bilong Jisas i stap long Stat 2:24. Em i kirapim ol long lukim wanpela hap tasol bilong dispela ves, na nau em i kamapim mining bilong en. Em i soim ol pinis olsem man na meri i kamap olsem “wanpela bodi tasol,” na nau em i tok: “Olsem na samting God i pasim pinis, em man i no ken katim.”​—Mt. 19:​3-6.

Yu mas kamapim hamas tok bilong kamapim klia mining bilong wanpela skripsa? Bilong save long dispela, yu mas tingim husat i sindaun long odiens, na ol tok yu kamapim ol i bikpela tok o nogat. Kamapim ol tok i no hatwok long kisim, na stori stret.

Toktok Gut Wantaim Long Tok Bilong Baibel. Aposel 17:​2, 3 i stori long wok autim tok bilong Pol long Tesalonaika, na i tok “em i toktok wantaim ol long ol tok i stap long buk bilong God.” Dispela em i wanpela pasin olgeta wokboi bilong Jehova i mas traim long kisim. Olsem: Pol i kamapim sampela stori long i stap na wok autim tok bilong Jisas, na em i soim olsem Ol Skripsa Hibru i bin tok profet long ol dispela samting, na bilong pinisim tok em i mekim strongpela tok olsem: “Dispela Jisas mi autim tok bilong en long yupela, em tasol dispela man God i makim.”

Taim Pol i raitim pas i go long ol Hibru, planti taim em i kolim ol tok bilong Ol Skripsa Hibru. Bilong kamapim strong o kamapim klia wanpela tok, planti taim em bai kolim wanpela tok o wanpela hap tok na bihain kamapim insait bilong en. (Hi. 12:​26, 27) Long stori i stap long Hibru sapta 3, Pol i kolim tok bilong Song 95:​7-11. Orait nau em i stori long 3-pela hap bilong en: (1) em i stori long bel bilong ol (Hi. 3:​8-12), (2) olsem wanem dispela tok “Nau” em i bikpela samting (Hi. 3:​7, 13-15; 4:​6-11), na (3) mining bilong dispela tok: “Yupela i no inap i go insait long ples malolo bilong mi” (Hi. 3:​11, 18, 19; 4:​1-11). Wok strong long bihainim dispela pasin taim yu wok long kamapim mining bilong ol skripsa.

Lukim gutpela wok Jisas i mekim long toktok gut wantaim narapela long buk bilong God, olsem i stap long Luk 10:​25-37. Wanpela saveman bilong Lo i askim Jisas olsem: “Tisa, bai mi mekim wanem na mi kisim laip bilong i stap gut oltaim oltaim?” Bilong bekim tok Jisas i askim man pastaim long kamapim tingting bilong em yet long dispela samting, na bihain Jisas i kamapim strong olsem em i bikpela samting long bihainim Tok Bilong God. Taim Jisas i lukim olsem man i no kisim gut tok bilong em, orait Jisas i stori longpela taim long wanpela hap tok tasol bilong dispela skripsa​—“wantok.” Em i no kamapim tasol mining bilong dispela tok, nogat. Em i kamapim wanpela tok piksa bilong helpim man yet long kisim stretpela tingting long dispela tok.

Em i klia olsem, taim Jisas i bekim ol askim, em i no kolim tasol tok bilong sampela skripsa i bekim stret dispela askim. Em i bin skelim gut tok ol dispela skripsa i mekim na em i kamapim ol tok i stret long askim man i bin mekim.

Taim ol Sadyusi i tok pait wantaim Jisas long bilip bilong kirap bek, Jisas i stori long wanpela hap stret bilong Kisim Bek 3:6. Tasol em i no kolim tok bilong dispela skripsa na em tasol. Em i mekim ol tok i kamapim klia olsem em i laik bilong God long kirapim bek ol man.​—Mk. 12:​24-27.

Sapos yu kisim gut pasin bilong kamapim stret ol tok bilong Baibel na mekim gut dispela wok, dispela bai helpim yu long kamap gutpela tisa.