Stadi 15
Kaunim Gut Baibel; Kamapim Gut Insait Bilong En
1 Taim yu tokim ol man long laik bilong God, yu mas kamapim gut tok bilong Baibel. Yu mas kaunim gut. Yu mas givim bel long kaunim na kamapim gut insait bilong en.
2 Kamapim gut ol bikpela tok. Taim yu kaunim wanpela tok bilong Baibel, makim wanpela tok bilong dispela ves yu laik bai ol man i tingim gut, na yu mas kamapim gut dispela hap tok.
3 Olsem: Sapos yu laik tokim man: “Man i mekim pekato em bai dai tru—em i no ken i go long wanpela ples paia na kisim pen inap oltaim oltaim,” orait, sapos yu kaunim Esekiel 18:4 bilong helpim tok bilong yu, yu mas kaunim olsem: “Man i mekim sin, dispela man tasol i mas i dai.”
4 Yu ken kamapim ol bikpela hap tok bilong ves long kain kain pasin, olsem:
5 Taim yu kaunim ol bikpela tok yu ken kaunim strong liklik, o kaunim hariap liklik o isi liklik, o mekim nek i go antap o i go daun liklik.
6 O yu ken malolo paslain o bihain long bikpela tok na bai yu kamapim gut.
7 Sapos yu laik bai ol i tingim gut wanpela hap tok, yu ken kolim tupela taim. Tasol no ken mekim dispela samting planti taim.
8 O taim yumi kaunim bikpela tok bilong ves, yumi ken wokim han bilong yumi.
9 Taim man bilong haus i kaunim. Ating taim man bilong haus i kaunim wanpela ves em i no ken kamapim gut ol bikpela tok, olsem na yu yet yu mas stori long tok bilong dispela ves na kamapim gut insait bilong en. O taim em i kaunim ves na em i kamap long bikpela tok, pasim tok bilong em na stori long dispela bikpela tok na bihain em i ken kaunim ves i go inap long pinis bilong en.
10 Yumi mas kaunim gut tok bilong Baibel, tasol yumi mas kamapim gut insait bilong dispela tok tu. Yu mas kamapim ol ves i stret long tok yu laik mekim, olsem ol ves i helpim tok bilong yu. Na no ken paulim tok.
11 Kamapim gut ol bikpela tok yu laik bai man i bihainim. Taim yu kamapim insait bilong tok bilong wanpela ves yu mas kamapim gut ol bikpela tok bilong en. Yu ken kolim sampela tok moa i wankain olsem dispela tok, o yu ken mekim askim long dispela tok.
12 Bilong wanem yu kamapim dispela tok. Yu mas soim ol man bilong wanem yu kamapim tok bilong dispela ves na em i helpim tok bilong yu olsem wanem. Yu mas stori gut long ves bambai ol man i ken save gut long en.