Ritim Gut Ol Skripsa

TAIM yu toktok wantaim ol narapela long ol samting God i tok long mekim, maski yu toktok wantaim wanpela man o yu mekim wanpela tok long pletfom, Baibel i mas stap olsem as bilong ol tok yu mekim. Taim yu mekim olsem yu save ritim ol tok i stap long Baibel, na yu mas ritim gut.

Bilong Kamapim Strong Ol Tok Yu Mas Pilim Long Bel. Yu mas ritim ol skripsa long pasin i kamapim olsem yu pilim tru long bel. Yumi ken skelim sampela skripsa olsem. Taim yu ritim Song 37:11 long maus, nek bilong yu i mas kamapim olsem yu amamas long wetim dispela bel isi skripsa i tok promis long en. Taim yu ritim Kamapim Tok Hait 21:4 i stori long pen na i dai bai pinis, orait nek bilong yu i mas kamapim olsem yu amamas na pilim tru dispela gutpela samting skripsa i tok profet long en. Kamapim Tok Hait 18:​2, 4, 5, i singautim ol man long lusim “Bikpela taun Babilon,” em sin i pulap long en. Olsem na taim yu ritim, nek bilong yu i mas makim olsem taim i sot pinis, no ken lusim taim. Taim yu mekim olsem yu mas mekim long pasin tru tru yu pilim long bel, tasol no ken mekim strong tumas. Tok bilong skripsa yet na wok em i mekim bai makim wanem pasin i stret long bihainim bilong kamapim olsem yu pilim tru long bel.

Kamapim Strong Ol Tok i Stret Long Kamapim Strong. Sapos ol tok yu mekim long wanpela ves i stori long wanpela hap bilong ves tasol, orait kamapim klia dispela hap taim yu ritim. Olsem: Taim yu ritim Matyu 6:33 long Nupela Testamen na Ol Sam, sapos yu laik kamapim mining bilong hap i tok long “wok pastaim long painim kingdom” bai yu no kolim strong hap i tok long “stretpela pasin bilong em” o “olgeta narapela samting.”

Ating long wanpela tok long Miting Bilong Wok yu laik ritim Matyu 28:19. Bai yu kamapim strong wanem ol tok? Sapos yu laik kirapim ol brata long wok strong long kirapim ol Baibel-stadi, orait kolim strong dispela tok “kamap disaipel.” Tasol sapos yu laik stori long wok bilong ol Kristen long autim tok i tru bilong Baibel long ol man bilong ol narapela kantri ol i kam sindaun long ples bilong yu o yu laik kirapim sampela pablisa long i go long wanpela hap ol i sot long ol pablisa, orait ating bai yu kolim strong dispela tok “olgeta lain manmeri.”

Planti taim yumi kamapim wanpela skripsa bilong bekim wanpela askim o bilong helpim wanpela tok sampela man i gat tok long en. Sapos yu kolim olgeta tok bilong skripsa long wankain nek tasol, ating ol i no inap save long as na yu ritim dispela skripsa. Ating yu save gut long tok yu kamapim, tasol odiens bilong yu ol i no save.

Olsem: Taim yu ritim Song 83:18 long wanpela Baibel nem bilong God i stap long en, sapos yu kamapim strong dispela tok “God Antap Tru,” ating bai man bilong haus i no kisim save olsem God i gat nem bilong em yet. Yu mas kolim strong nem “Jehova.” Tasol taim yu toktok long nambawan wok bos bilong Jehova na yu kamapim dispela skripsa, orait yu mas kamapim strong dispela tok “God Antap Tru.” Na i wankain taim yu kamapim Jems 2:24 bilong soim olsem man i mas bilip na mekim gutpela pasin. Tasol sapos yu kamapim strong dispela tok “kolim em stretpela man” na yu no kamapim strong dispela tok “mekim gutpela pasin,” ating man i harim tok i no ken kisim gut tok yu laik kamapim.

Narapela skripsa yumi ken skelim em Rom 15:​7-13. Dispela em i hap bilong wanpela pas aposel Pol i bin raitim i go long wanpela kongrigesen i gat ol man bilong ol narapela lain na ol Juda tu wantaim. Long dispela hap Pol i tokaut olsem wok autim tok bilong Krais em i no helpim ol Juda i katim skin tasol, nogat, em i helpim ol man bilong ol narapela lain tu na “bai ol arapela lain i lukim marimari bilong God na litimapim nem bilong em.” Orait nau Pol i kamapim 4-pela skripsa bilong soim olsem rot i op long ol narapela lain. Olsem wanem yu ken ritim ol dispela skripsa bilong kamapim strong tok Pol i laik kamapim? Sapos yu laik makim sampela tok bilong kolim strong, ating yu ken makim dispela tok “ol arapela lain manmeri” i stap long ves 9, “ol manmeri bilong ol arapela kantri” long ves 10, “yupela olgeta lain pipel” na “yupela manmeri bilong olgeta kantri” long ves 11, na “olgeta lain manmeri” long ves 12. Orait ritim Rom 15:​7-13 na kamapim strong ol dispela tok hia yu bin makim. Taim yu mekim olsem, tingting Pol i laik kamapim i kamap klia moa na i no hatwok long kisim.

Ol Rot Bilong Kamapim Strong Tok. I gat kain kain rot bilong kamapim strong ol hap tok i kamapim tingting yu laik bai ol man i tingim. Rot yu bihainim i mas stret wantaim skripsa yu ritim na pasin bilong yu long mekim tok. Mipela i kamapim sampela tingting long hia.

Strongim nek. Bilong mekim olsem yu mas senisim nek bilong yu taim yu kolim ol hap tok i save kamapim tingting bilong sentens bambai ol man i ken luksave long en. Yu inap kamapim strong dispela tok taim yu apim o daunim nek bilong yu. Long planti tok ples yu ken kamapim strong tok taim yu senisim krai bilong nek. Tasol long sampela tok ples dispela inap senisim mining bilong tok. Sapos yu toktok isi isi taim yu kolim ol bikpela tok, dispela i save strongim ol dispela tok. Long ol tok ples i no gat pasin bilong strongim nek bilong kamapim strong sampela tok, ol man i mas mekim ol samting i stret long dispela tok ples bilong kamapim strong ol tok.

Malolo. Yu ken malolo paslain o bihain long taim yu ritim bikpela tok bilong skripsa​—o yu ken mekim paslain na bihain tu. Pasin bilong malolo liklik paslain long ritim wanpela bikpela tok i save kirapim laik bilong ol man long harim; pasin bilong malolo bihain long ritim wanpela bikpela tok i save kirapim man long tingim tru dispela tok. Tasol sapos yu malolo planti taim ol man i no inap save wanem tok i bikpela tok.

Kamapim gen. Bilong kamapim strong wanpela tok yu ken mekim olsem: Taim yu ritim pinis wanpela tok, orait katim tok bilong yu yet na kirap ritim gen dispela tok. Narapela pasin i gutpela moa em i olsem: Ritim pinis skripsa olgeta na bihain ritim gen bikpela tok yu laik kamapim.

Wokim han samting. Pasin bilong wokim han na pes samting inap mekim na ol man i ken pilim tru wanpela tok o hap tok.

Krai bilong nek. Long sampela tok ples, taim yu ritim wanpela tok krai bilong nek inap senisim mining bilong tok na makim olsem tok i narapela kain. Yumi mas was gut sapos yumi laik mekim sampela tok i sutim bel bilong narapela.

Taim Ol Narapela i Ritim Ol Skripsa. Taim man bilong haus i ritim wanpela skripsa, ating em bai kolim strong ol tok i no stret long kolim olsem o bai em i no kolim strong wanpela tok. Yu ken mekim wanem long kain taim olsem? Yu mas kamapim klia mining bilong skripsa taim yu stori long olsem wanem ol i ken bihainim dispela tok. Bihain stori long ol tok bilong dispela skripsa i kamapim ol bikpela tingting.