Stadi 3
Lain Long Pasin Bilong Kaunim Tok Long Ol Man
1 Yumi ol Kristen yumi save kaunim tok long ol man. Long Stadi Wastaua na long Buk-Stadi yumi save kaunim ol ves bilong Baibel na paragraf. Long Skul na long Miting Bilong Wok na long taim yumi autim tok, yumi save kaunim tok bilong Baibel long ol man. Olsem na yumi mas lain gut long pasin bilong kaunim tok.
2 Yu mas redi pastaim bambai yu inap kaunim gut tok long ol man na dispela tok inap helpim ol.
3 Taim yu kaunim tok, yu mas givim bel long kaunim, na kaunim strong bambai olgeta man inap harim.
4 Yu mas kolim gut olgeta tok, nogut ol man i no harim gut. Taim yu kaunim sampela tok, yu mas opim gut maus na wokim maus na ol tok i ken kamap gut.
5 Yu mas kamapim gut o kolim strong ol bikpela tok bilong dispela hap tok yu kaunim, olsem bai ol man i harim ol i ken kisim gut na ol i ken save stret long insait bilong dispela tok. Sapos yu malolo paslain o bihain long ol bikpela tok, dispela pasin tu inap kamapim gut ol bikpela tok.
6 Sampela taim yu mas kaunim tok hariap na sampela taim yu ken kaunim isi isi; na nek i mas i go antap na i go daun; mekim olsem na bai yu inap kaunim gut tok na bai i olsem yu toktok tasol wantaim ol man.
7 Kaunim manyuskrip. Manyuskrip i olsem wanpela pepa ol i raitim pinis olgeta tok long en na yumi mas kaunim tasol. Taim Sosaiti i tingim wanpela bikpela tok ol i laik bai olgeta kongrigesen i mas harim, Sosaiti i save wokim manyuskrip na salim long ol. Na long kibung tu ol i save mekim dispela kain tok.
8 Taim yu kaunim manyuskrip yu mas kaunim olsem yu yet yu toktok, na bai ol man i no ken save yu kaunim; ol bai ting yu toktok tasol. Olsem na pastaim yu mas kaunim kaunim planti taim, olsem redim gut. Na yu mas save gut long ol bikpela tok ol man bilong harim ol i mas tingim. Taim yu wok long kaunim kaunim manyuskrip yu ken kaunim long maus tu.
9 Gutpela sapos yu katim ol bikpela tok bambai yu ken kolim strong.
10 Kaunim Baibel. Yumi olgeta yumi mas kaunim tok bilong Baibel; em bikpela samting. Yumi mas lain long kaunim gut tok bilong Baibel, long wanem, em tok bilong God. Taim yumi kaunim tok bilong Baibel long Skul o taim yumi autim tok, yumi mas kaunim gut. (Neh 8:8) Olsem na bai ol man i ken save, yumi laikim God na tok bilong em.—KTH 1:3.