Stretpela Pasin Bilong Kolim Strong Tok

TAIM yu toktok o rit long maus, em i bikpela samting long kolim stret ol wan wan tok, na tu yu mas kamapim strong ol tok i kamapim sampela tingting i stap insait long en, na yu mas mekim long pasin i kamapim klia as bilong dispela tok yu mekim.

Bilong bihainim stretpela pasin bilong kolim strong tok, yu no ken kolim strong wanpela wanpela tok o planti tok. Nogat. Yu mas kolim strong ol tok i stret long kolim strong. Sapos yu kolim strong ol tok i no stret long kolim strong, ating odiens bai i no klia long mining bilong tok bilong yu, na tingting bilong ol bai wokabaut. Maski samting yu laik stori long en i gutpela, sapos yu no bihainim stretpela pasin bilong kolim strong ol tok, orait tok yu mekim bai i no kirapim tumas bel bilong ol man long mekim samting.

I gat kain kain pasin bilong kamapim strong tok, na planti taim yumi ken mekim wok long sampela pasin wantaim, olsem: apim nek, kolim strong moa olsem yu pilim tru, toktok isi isi olsem yu tingim gut ol tok yu mekim, malolo paslain o bihain long tok yu kamapim (o tupela wantaim), wokim han na pes. Long sampela tok ples yu ken kamapim gut tok taim yu daunim o apim krai bilong toktok. Bilong save long pasin yu laik bihainim bilong kamapim gut tok, yu mas tingim samting yu laik stori long en na ol samting i wok long kamap taim yu mekim tok.

Taim yu wok long tingim wanem tok yu laik kamapim strong, tingim ol dispela tok hia. (1) Bilong bihainim stretpela pasin bilong kolim strong tok insait long ol sentens, yu no ken tingim ol tok insait long dispela sentens tasol, nogat, yu mas tingim ol tok bilong ol narapela sentens i stap klostu. (2) Yu ken kolim strong tok taim yu laik strongim kirap bilong nupela tingting yu laik kamapim, maski em i wanpela bikpela tok o yu laik kamapim narapela kain tingting tasol. O em inap kirapim ol man long tingim pinis bilong wanpela kain tingting yu kamapim. (3) Man bilong mekim tok inap kolim strong tok bilong kamapim tingting bilong em long samting em i stori long en. (4) Na tu, stretpela pasin bilong kolim strong tok i ken helpim yu long kamapim ol bikpela tok insait long tok bilong yu.

Bilong mekim wok long pasin bilong kolim strong tok olsem yumi stori pinis, man i mekim tok o ritim tok i mas save gut long ol samting em i stori long en na em i mas i gat laik long odiens bilong em i kisim gut dispela tok. Nehemia 8:8 i stori long tok ol man i kisim long taim bilong Esra olsem: “Esra i ritim lo long tok Hibru, na ol Livai i tanim long tok Aram, bilong ol manmeri i ken save gut. Na tu ol Livai i autim as bilong lo long ol.” Yumi save, ol man i bin ritim na kamapim as bilong Lo Bilong God ol i save olsem em i bikpela samting bilong helpim odiens long kisim mining bilong ol samting ol i harim, na putim gut long tingting, na bihainim.

Samting Inap Kamapim Hevi. Taim ol man i toktok wantaim ol narapela long olgeta de ol i no hatwok long kamapim mining bilong ol tok ol i mekim. Tasol taim ol i ritim tok narapela man i bin raitim, ol inap hatwok long makim wanem tok ol i mas kolim strong. Bikpela samting i olsem, yu mas save gut long ol tok yu bai ritim. Bilong save gut olsem, yu mas stadi gut long ol tok ol i raitim. Olsem na sapos ol i askim yu long ritim buk samting long wanpela miting bilong kongrigesen, orait yu mas redim gut.

Sampela i save toktok liklik, kolim strong wanpela tok, toktok liklik moa, na kolim strong wanpela tok, mekim mekim olsem maski i no gat as na ol i kolim strong ol dispela tok. Na sampela i save kolim strong ol kain tok olsem: inap, na, tasol, olsem, o. Taim pasin bilong kolim strong tok i no helpim ol man long kisim gut tingting em i kamapim, orait dispela pasin inap mekim na ol man bai no inap putim tingting long tok em i mekim.

Bilong bihainim pasin bilong kolim strong tok, sampela i save tok strong tru na ol man i harim tok i pilim olsem em i laik krosim ol. Kain tok olsem i no save helpim ol man tumas. Sapos man bilong mekim tok i no mekim stret pasin bilong kolim strong tok, ol man i harim inap kisim tingting olsem em i gat pasin antap na i laik daunim ol. Mobeta em i toktok wantaim ol long pasin sori na helpim ol long save olsem as bilong tok bilong em i stap long Baibel na i kamapim stretpela tingting!

Rot Bilong Kamap Gutpela Moa. Planti man i no save olsem ol i gat hevi long pasin bilong kolim strong tok. Ating narapela i mas tokim em. Sapos yu gat wok long stretim dispela pasin, brata bilong lukautim skul bai helpim yu. Na tu em i gutpela long askim narapela i save mekim gutpela tok long helpim yu. Askim em long putim yau taim yu rit na toktok na em i ken givim sampela tok long yu bilong helpim yu long stretim dispela samting.

Bilong kirap mekim olsem, ating brata bai tokim yu long yusim hap bilong wanpela Wastaua bilong mekim traim long en. Em bai tokim yu long skelim gut ol wan wan sentens bilong save wanem ol tok yu mas kamapim strong bambai i no hatwok long ol man long kisim tok yu ritim. Em bai kirapim yu long tingim ol tok ol i raitim long rait italik. Tingim, ol wan wan tok insait long wanpela sentens i save wok wantaim. Sampela taim yu mas kamapim strong wanpela lain tok insait long sentens, i no wanpela tok tasol.

Orait, bilong helpim yu long lain moa long wanem tok yu mas strongim, ating man bilong skulim yu bai kirapim yu long skelim ol tok i stap long ol sentens klostu long dispela sentens yu ritim. Dispela paragraf olgeta i stori long wanem samting? Dispela bai mekim wanem long ol tok yu mas kamapim strong insait long ol wan wan sentens? Lukim het-tok na ol liklik het-tok ol i raitim long strongpela rait. Olsem wanem ol dispela tok i ken helpim yu long makim wanem ol tok yu mas kamapim strong? Yu mas tingim ol dispela samting. Tasol yu mas was gut, no ken kamapim strong planti tok.

Maski yu bai mekim wanpela tok i stap long tingting o yu ritim tok, man bilong skulim yu bai kirapim yu long larim tingting yu laik kamapim i makim wanem tok yu bai kolim strong. Yu mas save wanpela tingting i pinis we o wanpela bikpela tok i pinis we na narapela i kirap. Odiens bai amamas sapos pasin bilong yu long mekim tok i kamapim klia ol dispela samting. Ating yu ken mekim olsem sapos yu kolim strong liklik ol kain tok olsem: namba wan samting, narapela samting, laspela samting, olsem na, em nau.

Man bilong skulim yu bai kirapim yu long tingim ol tok yu laik bai ol man i pilim moa yet. Bilong mekim olsem yu ken kolim strong ol kain tok olsem: i no gat, i no inap tru, oltaim, na bikpela samting. Taim yu mekim olsem, dispela inap stiaim tingting bilong odiens olsem ol i gat wanem tingting long tok bilong yu. Stadi 11, “Mekim Long Pasin i Olsem Yu Pilim Tru Long Bel,” bai stori moa long dispela.

Bilong kamap gutpela long pasin bilong kolim strong ol tok, yu mas save gut long ol bikpela tok yu laik bai odiens i ken tingim. Bai yumi stori moa long dispela samting taim yumi skelim pasin bilong rit long ai bilong ol man long Stadi 7, “Kamapim Strong Ol Nambawan Bikpela Tingting,” na pasin bilong toktok, long Stadi 37, “Mekim Ol Bikpela Tok i Stap Ples Klia.”

Sapos yu wok strong long mekim wok autim tok bilong yu i kamap gutpela moa, orait tingim gut pasin yu bihainim long ritim ol skripsa. Olgeta taim askim yu yet olsem, ‘Wanem as na mi ritim dispela ves?’ Bilong mekim wok tisa, i no olsem yu kolim stret ol tok na givim bel long ritim ves na em tasol. Nogat. Sapos yu wok long bekim askim bilong man o lainim em long wanpela as bilip na yu ritim wanpela skripsa, em i gutpela long kamapim strong ol tok i stap long skripsa i strongim dispela tok yu toktok wantaim em long en. Sapos yu no mekim olsem, ating em i no inap kisim gut as bilong tok bilong yu.

Bilong kolim strong tok yu mas kamapim strong moa sampela tok, olsem na sapos man i no save gut long mekim tok, ating em bai kolim ol dispela tok strong tumas. Dispela i wankain olsem ol wan wan krai bilong gita taim man i lain nupela long paitim. Tasol taim em i mekim mekim na em i lain gut, ol wan wan krai bai pas gut wantaim na i kamap naispela musik.

Taim yu kisim sampela save pinis, yu inap kisim sampela helpim moa taim yu lukim pasin bilong ol man i save gut long mekim tok. Bai yu kisim save long ol samting yu inap mekim taim yu senisim pasin bilong yu long kolim strong ol tok. Na bai yu pilim tru olsem em i bikpela samting long kamapim strong tok long kain kain pasin bilong kamapim klia mining bilong tok yu mekim. Taim yu wok long kisim stretpela pasin bilong kolim strong tok, dispela bai helpim yu long kamap gutpela tru long pasin bilong yu long rit na toktok.

No ken kisim liklik save tasol long pasin bilong kolim strong tok. Bilong tok bilong yu i ken mekim gutpela wok, yu mas wok yet long kisim gut dispela pasin na wok long kolim strong tok long pasin i krai gut long yau bilong ol narapela.