Stadi 22
Kolim Strong Ol Bikpela Tok; Senisim Pasin Bilong Toktok
1 Kolim strong ol bikpela tok, na senisim pasin bilong toktok, dispela tupela samting i save kirapim ol man long laikim tok bilong yumi.
2 Taim yu toktok, sapos yu kolim strong ol bikpela tok, ol man bai kisim gut.
3 Taim yu kaunim tok, no ken kolim strong ol liklik tok, olsem long, na, bilong, i, na sampela hap tok olsem.
4 Taim yu laik kaunim wanpela tok bilong Baibel, o kaunim ol paragraf bilong Wastaua samting, pastaim yu mas tingim gut wanem ol tok yu mas kolim strong. Dispela tok yu laik kaunim i no bilong yu yet; narapela man i bin raitim, olsem na yu mas lukim gut dispela tok na kisim gut tingting bilong man i bin raitim, bambai yu ken kamapim gut.
5 Sampela tok yu ken kolim strong, o kolim isi, o nek bilong yu i go antap, o i go daun, o yu kolim hariap, o kolim isi isi, o taim yu no kolim yet yu ken malolo pastaim, o yu ken kolim na malolo bihain long en, o yu ken wokim han o het samting. Taim yu laik kaunim sampela tok, pastaim yu ken katim ol tok yu laik kolim strong.
6 Kamapim gut ol bikpela tok. Planti brata ol i no kamapim gut ol bikpela tok, olsem na ol man i no kisim gut; ol i no kisim sampela save. Maski yu redim ol gutpela tok, sapos yu no kolim strong ol bikpela tok, bai ol man i no pilim gut tok bilong yu.
7 Yu mas tingim gut tok bilong yu: Wanem tok i nambawan bikpela tok? Wanem tok i nambatu bikpela tok? Katim ol dispela bikpela tok long autlain na taim yu mekim tok na yu kolim wanpela bikpela tok, senisim pasin bilong toktok. Olsem na bai ol man i kisim gut ol bikpela tok.
8 Senisim pasin bilong toktok. Em olsem: Taim yu kaunim wanpela tok yu givim bel long kaunim, na sampela taim nek bilong yu i go antap o i go daun; sampela taim yu toktok hariap na sampela taim yu toktok isi isi; sampela taim yu toktok strong na sampela taim yu toktok isi. Taim yu toktok na nek bilong yu i go antap i olsem yu givim bel long dispela tok. Taim yu mekim tok na nek i go daun i olsem yu hevi long wanpela samting o yu toktok long bikpela samting.
9 Sapos yu toktok strong ol man bai save, nau yu laik kamapim wanpela bikpela tok. Ol tok i no bikpela tumas yu ken kolim hariap liklik. Taim yu kamapim ol bikpela tok yu mas tok isi isi na yu ken malolo long sampela taim na no ken kolim hariap.
10 Taim yu laik kamapim gut insait bilong wanpela tok, nek bilong yu i mas i go antap o i go daun.—Lukim Stat 18:3-8 na 19:6-9.
11 Taim yu senisim pasin bilong toktok em i mas stret wantaim tok yu laik mekim. Taim yu mekim tok yu no ken bihainim wanpela pasin tasol na yu mekim tok. Namel long tok yu ken malolo long toktok na kaunim wanpela ves o mekim sampela askim o tok piksa samting.