Helpim Ol Painia
1 Ol man i save, lain bilong Jehova i lain bilong givim bel long autim tok. Tru, sampela i no inap mekim wok painia, tasol yumi olgeta i ken wok strong long autim tok olsem ol painia i mekim. Yumi save amamas long ol planti brata sista inap mekim wok painia na yumi strongim bel bilong ol.
2 Bilong kamap painia na stap gut long dispela wok, em bikpela wok. Ol painia i mekim bikpela hap long wok autim tok na wok bilong lainim ol man. Bilong mekim olsem ol i mas wok strong na lusim sampela samting bilong ol yet. Ol narapela i ken mekim wanem bilong helpim na strongim ol dispela wokboi i givim bel long autim tok long olgeta taim?
3 Ol Samting Yumi Ken Mekim: Ol elda i mas helpim ol painia. Taim ol elda i autim tok wantaim ol painia ol inap strongim gut ol. Planti elda i save wok long autim tok wantaim olgeta wan wan painia bilong kongrigesen long wanpela o tupela taim samting long olgeta yia. Long dispela rot ol elda inap givim gutpela tok amamas long ol painia long ol wok ol i mekim na helpim ol long kamap strong moa. Ating ol painia i mas stretim sedyul bilong ol bambai ol i ken autim tok long taim i stret long ol elda. Na tu, ol elda ol i mas save bai teritori inap long ol grup o nogat. Bilong helpim sedyul bilong ol painia, ol elda i ken putim sampela bung bilong i go autim tok long belo bek o long 5 klok samting long apinun. Ol i ken mekim olsem long ol mun i gat planti painia haptaim.—Ais 40:11.
4 Ol wokman bilong kongrigesen i ken helpim gut ol painia—ol i ken autim tok wantaim ol na mekim gut wok bilong ol insait long kongrigesen. Ol sista painia i save amamas sapos i gat brata bilong lukautim grup bilong i go autim tok. Ol brata i lukautim ol magasin na buk samting ol i mas save ol magasin na buk samting em inap o nogat. Sapos ol i lukautim gut ol dispela samting, orait, ol painia inap tingim gut wok bilong ol long autim tok.
5 Olgeta i Ken Helpim Ol Painia: Ol pablisa i ken helpim ol painia sapos ol i autim tok planti taim wantaim ol. Ol painia i save amamas taim ol pablisa i poromanim ol na wok wantaim ol. Gutpela sapos yu stretim rot bilong wok wantaim ol painia long olgeta wik o tupela taim long olgeta mun. Na tu, sapos yu helpim ol painia long ol samting bilong skin, ol bai pilim dispela gutpela pasin sori bilong yu.—Fl 4:14-19.
6 I gat planti samting ol famili i ken mekim bilong helpim sampela long famili i mekim wok painia. Ol i ken stretim gut taim bilong mekim ol wok long haus na bai wanpela o tupela long famili i ken mekim wok painia. Wanpela sista i gat 3-pela pikinini, em i mekim wok painia na em i wok mani tupela de long wik. Tupela pikinini man i helpim mama—tupela i mekim wok bilong i go long stua na kisim kaikai samting, na tu, ol i klinim banis na rausim pipia samting. Pikinini meri i helpim mama long mekim wok bilong klinim haus na kukim kaikai. Taim em i winim skul pinis, em tu i kirap mekim wok painia, na em i save go long wok long ol de mama i no i go. Sapos olgeta long famili i wok gut wantaim olsem, orait, dispela bai inapim sampela moa long famili long mekim wok painia na famili bai kisim planti blesing.
7 Ol painia i givim bel long mekim wok ol i helpim tru kongrigesen long planti rot. Gutpela pasin ol i bihainim i save kirapim planti long kongrigesen long wok strong moa yet long autim tok. Tru tumas, yumi mas helpim ol painia. Sapos yumi wok gut wantaim ol painia, orait, kongrigesen olgeta bai amamas na bai ol i mekim bikpela wok bilong litimapim nem bilong Jehova.
[Ol Askim]
1. (a) Yumi olgeta wan wan i ken wok strong long mekim wanem? (b) Yumi mas i gat wanem tingting long ol painia?
2. Bilong wanem yumi mas helpim na strongim ol painia?
3. Kolim sampela samting ol elda i ken mekim bilong helpim ol painia.
4. Kolim sampela samting ol wokman bilong kongrigesen i ken mekim bilong helpim ol painia.
5. (a) Ol pablisa wan wan i ken mekim wanem bilong helpim ol painia? (b) Olsem Filipai 4:14-19 i tok, wanpela kongrigesen i bin mekim wanem bilong helpim Pol long mekim wok autim tok long olgeta de?
6. Ol famili i ken mekim wanem bilong helpim ol narapela long famili i mekim wok painia?
7. Taim olgeta pablisa i wok gut wantaim long helpim ol painia, wanem gutpela samting i kamap?