Yumi Mas Pilim Tru Olsem Ofa Bilong Krais Em i Bikpela Samting
1 Maski ol manmeri i gat narapela narapela kain pasin na sindaun, sapos wanpela pren o wanblut i dai pinis, ol i laik kamapim bel bilong ol olsem ol i pilim tru ol gutpela samting man i dai pinis i bin mekim. Dispela laik inap kamap strong moa yet, sapos man ol i laikim em tumas i kisim bagarap taim em i wok long lukautim laip bilong ol narapela. Ol man i wet long kisim laip oltaim, ol bai bung long taim bilong mekim Memorial long Epril 6, bilong tingim i dai bilong Krais, na long dispela rot bai ol i kamapim bel bilong ol, ol i pilim tru olsem ofa bilong Krais em i bikpela samting.—2 Ko 5:14; 1 Jo 2:2.
2 Pilim Tru Pasin Sori Bilong Jehova: I stret yumi kamapim bel bilong yumi olsem yumi pilim tru dispela gutpela samting God Jehova i bin mekim, em i givim Pikinini bilong em olsem ofa! (1 Jo 4:9, 10) I gat planti gutpela ensel long heven, tasol God i no givim wanpela bilong ol olsem ofa, nogat. Em i givim olsem presen long yumi, dispela wanpela Pikinini em i laikim em tumas, na long dispela rot em i kamapim bikpela sori bilong em. (Snd 8:22, 30) Dispela Pikinini, em Krais Jisas, em i save gut tru long God Jehova na em i tok: “God i gat wanpela Pikinini tasol i stap. Tasol God i laikim tumas olgeta manmeri bilong graun, olsem na em i givim dispela wanpela Pikinini long ol. Em i mekim olsem bilong olgeta manmeri i bilip long em ol i no ken lus. Nogat. Bai ol i kisim laip i stap gut oltaim oltaim.”—Jo 3:16.
3 Pilim Tru Pasin Sori Bilong Krais Jisas: I stret tu yumi kamapim bel bilong yumi olsem yumi pilim tru dispela gutpela samting Krais Jisas i bin mekim, em i givim laip bilong em bilong baim bek olgeta manmeri. (Mt 20:28) Long laik bilong em yet em i daun long Jehova na mekim laik bilong Em—em i save em i mas i stap namel long ol sinman na dai olsem ofa, tasol em i no pret long mekim olsem, nogat. “Em i kamap olsem wokboi nating. Em i kamap olsem man. . . . Na em i daunim em yet na i bihainim tok bilong God, i go inap long em i dai, yes, inap long em i dai long diwai.”—Fl 2:5-8.
4 Yumi Mas Mekim Wanem Bilong Kamapim Klia Olsem Yumi Pilim Tru Ofa Bilong Krais Em i Bikpela Samting? Yumi mas tenkyu long God na long Jisas, na tu, yumi mas kisim save long dispela gutpela samting Jehova i bin mekim bilong kisim bek yumi long rot bilong Jisas. (Jo 17:3) Yumi mas bilip tu long dispela ofa na mekim sampela wok. (Ap 3:19) Na bel bilong yumi i mas kirapim yumi long dediket, olsem givim yumi yet long God Jehova, na kisim baptais. (Mt 16:24) Yumi mas truim dispela dediket na stretim gut ol wok bilong yumi bambai yumi gat taim bilong tokim ol narapela long dispela gutpela pe bilong baim bek ol man.—Ro 10:10.
5 Yumi olgeta inap mekim ol dispela samting. Maika 6:8 i tok: “Bikpela i tokim yumi pinis long ol gutpela pasin, na em i laik bai yumi mekim pasin olsem tasol. Yumi mas bihainim stretpela pasin, na laikim tru ol arapela man, na daunim tingting bilong yumi yet na i stap wanbel wantaim God bilong yumi, na bihainim em wanpela tasol.” Na Devit i tokim Jehova olsem: “Olgeta dispela samting i bilong yu tasol. Pastaim yu bin givim long mipela na nau mipela i givim i go bek long yu.”—1 Sto 29:14.
6 Bilong helpim yumi long pilim moa yet dispela gutpela samting Jehova i bin mekim bilong helpim yumi, gutpela sapos paslain long taim bilong Memorial, olgeta long famili i kaunim ol tok i stap long sapta 112 i go inap 126 bilong buk Nambawan Man Tru, na toktok wantaim long en. Long dispela rot yumi olgeta i ken redim tingting bilong yumi na long taim bilong Memorial long Epril 6, 1993, bai yumi pilim tru olsem ofa bilong Krais em i bikpela samting.