Yu Mas Lain Gut Long Pasin Bilong Givim Bel Long God
1 Skul Bilong Wok Autim Tok i lainim yumi isi isi long “autim stret tok tru bilong God.” (2 Ti 2:15) Olsem wanem? Yu insait long dispela Skul? Sapos nogat, na yu inapim mak bilong kamap sumatin long Skul, orait, gutpela sapos nau yu putim nem bilong yu long lista bilong Skul.
2 Hap bilong Baibel em sedyul i makim bilong kaunim long olgeta wik, em wanpela bikpela hap bilong Skul. Insait long hap taim yu bin makim bambai yu yet yu ken stadi, makim hap taim tu long kaunim ol dispela hap bilong Baibel, na long dispela rot, isi isi bai yu inap kaunim Baibel olgeta.
3 Kirap long sedyul bilong Skul bilong 1993, sumatin i mekim Tok Namba 2 i mas kaunim olgeta ves em sedyul i makim, na em i no ken mekim sampela tok bilong em yet long namel. Em i mas mekim liklik tok long kirap bilong tok na long pinis bilong tok tasol. Brata i kamapim ol bikpela tok bilong Baibel em i no ken stori planti long ol ves brata bai kaunim long Tok Namba 2, long wanem, brata i mekim Tok Namba 2 bai stori gut long ol dispela ves.
4 Wasman bilong Skul bai makim pepa “Bilong Helpim Sumatin Long Mekim Gut Tok” bilong ol brata sista i mekim Tok Namba 2 na 3 na 4. I no olsem em i mas bihainim tasol ol tok olsem dispela pepa i makim, nogat; em i ken tingim wanem wanem samting inap helpim dispela sumatin yet long mekim gut tok. Wasman bilong Skul i no ken makim pepa bilong brata i mekim Tok Namba 1, tasol taim miting i pinis, wasman bilong Skul i ken givim sampela tok long dispela brata sapos em i laik.
5 Ol manmeri i winim mak bilong kamap sumatin long Skul ol i mas mekim wok long olgeta samting bilong spirit em Jehova i bin givim long ol bilong helpim ol, na dispela Skul Bilong Wok Autim Tok tu. Ol samting ol i lainim long dispela Skul inap helpim wok bilong ol long autim tok i kamap gutpela moa.—1 Ti 4:7.