Mekim Wok Long Ol Liklik Nius Bilong Helpim Ol Man
Namba Wan Hap
1 Inap planti yia pinis, oganaisesen bilong Jehova long nau i bin helpim gut ol man long rot bilong ol liklik nius. Nem bilong oganaisesen bilong yumi i rejista long gavman long Amerika, em Watch Tower Bible and Tract Society, na dispela tok Inglis tract em olsem liklik nius, na i makim olsem ol liklik nius i mekim bikpela wok long helpim ol man long save long tok bilong Kingdom. Kirap long 1881 i go inap 1918, lain bilong Jehova i bin tilim inap olsem 300 milion liklik nius. Ol man i kamap brata bilong Krais olsem remnan insait long dispela taim, planti ol i bin harim tok i tru long namba wan taim long rot bilong ol dispela liklik nius bilong bipo.
2 Long 1987 ol i tokaut long 4-pela nupela liklik nius i gat kala. Olsem na kirap long 1987, yumi bin mekim bikpela wok gen long ol liklik nius. Long “Ol Man i Stap Olsem Lait” Kibung Distrik bilong 1992-1993 ol i tokaut long 4-pela liklik nius moa, i gat gutpela kala na tok bilong ol i gutpela bilong kirapim tingting bilong man. Nem bilong ol i olsem: Bilong Mekim Gut Bel Bilong Man i Stap Bel Hevi, na Amamas Wantaim Famili Bilong Yu, na Husat Tru i Bosim Dispela Graun?, na Ol Man Bilong Graun Bai Abrusim Bagarap o Nogat? Olsem wanem? Taim yu autim tok, yu save mekim wok long olgeta 8-pela liklik nius bambai yu inap helpim ol man?
3 Sapos yumi mekim gutpela wok long ol liklik nius, ol gutpela samting inap kamap. Yumi mas save gut long olgeta wan wan liklik nius. Olsem wanem? Yu kaunim gut pinis na bai yu inap save, olgeta wan wan i stori long wanem samting? Yu bin tingting long wanem kain man bai laikim ol dispela liklik nius? Sapos yu save gut long ol tok i stap long olgeta wan wan liklik nius, orait, taim yu autim tok long ol man long haus, na long kain kain taim na ples tu, bai yu no pret long mekim wok long ol dispela liklik nius.
4 Taim Yu Go Long Ol Haus na Autim Tok, Mekim Wok Long Ol Liklik Nius: Wanpela wasman sekit i tok: “Planti taim mi mekim wok long ol liklik nius bilong kirapim tok na gutpela samting i save kamap.” Olsem wanem? Yu tu yu bin mekim wok long ol liklik nius bilong kirapim tok? Gutpela sapos yu mekim olsem. Yumi gat 8-pela liklik nius, olsem na nau i gat 8-pela rot yumi ken mekim wok long en bilong kirapim tok. Olgeta wan wan liklik nius inap opim rot bilong yumi ken kirapim Baibel-stadi long namba wan taim yumi lukim man o long taim yumi mekim ol gobek.
5 I gat ol narapela kain taim tu bilong mekim wok long ol liklik nius. Olsem: Taim yu toktok wantaim man bilong haus, sapos em i tok nau tasol wanpela long famili bilong em i dai pinis o wanpela long famili i sik, orait, yu ken mekim wanem? Ating kain man olsem em i stap bel hevi tru. Bilong mekim gut bel bilong em, gutpela sapos yu mekim pasin sori na givim liklik nius long em, nem bilong en: Bilong Mekim Gut Bel Bilong Man i Stap Bel Hevi. O ating man i tok nau tasol marit bilong em i bruk o bos i pinisim em long wok, na ol dispela samting inap mekim na em i bel hevi. Yu ken kamapim ol askim i stap long pes 2 bilong liklik nius Amamas Wantaim Famili Bilong Yu olsem: “Bilong wanem i gat planti hevi i save painim ol famili? Olsem wanem yumi ken i stap amamas wantaim famili bilong yumi?” Ating man bilong haus em tu i gat ol dispela askim. Tasol maski i olsem em i no laik harim tok bilong yu, ating bihain bai em i kaunim dispela liklik nius.—Sav 11:6.
6 Long sampela hap, kongrigesen i bin autim tok planti taim long teritori bilong ol, na planti man i kisim pinis sampela buk samting bilong yumi. Sapos yumi mekim wok long ol liklik nius, bai yumi gat rot long stori long wanpela samting em man bilong haus bai amamas long save long en, na bai yumi inap kirapim em long kamapim tingting bilong em, na kirapim em long tingting long ol samting em Kingdom bai mekim. Kamapim wanpela askim yu ken stori long en bihain. Go bek lukim em, na kirapim tingting bilong em na bai em i gat laik long harim sampela tok moa. Ating bihain bai yumi inap kirapim stadi wantaim em long wanpela buk o buklet em i kisim pinis.
7 Mekim Wok Long Ol Liklik Nius Long Kain Kain Taim na Ples: Sapos ol liklik nius i stap klostu long yumi olsem long poket o paus samting, orait, yumi inap mekim wok long ol long kain kain taim na ples, olsem taim yumi go long stua bilong baim kaikai samting, o sindaun long PMV samting, o long taim yumi toktok wantaim ol wanblut o ol man i kam lukim yumi. Ol liklik nius i opim rot bilong yumi ken autim tok inap liklik hap taim tasol. Ol dispela nius i liklik tasol—i no bikpela olsem ol buk samting—olsem na ol man i no pret long kisim. Ol tok bilong en i kamapim klia ol samting na i no save skrapim bel bilong man. I no gat planti tok long en bilong kaunim, olsem wanpela buk o magasin, olsem na ol man i amamas long kisim.
8 Yu mas redi long tilim ol liklik nius long kain ples olsem skul o ples wok, o long ol man yu bungim long haus kaikai o long ples bilong kisim bensin. Wanpela sista, taim em i kisim lapun bubu bilong em i go lukim dokta em i kisim sampela liklik nius i go wantaim em. Long ofis bilong dokta em i kirapim tok wantaim wanpela meri i gat bel. Taim sista i soim pinis liklik nius Gutpela Sindaun Long Nupela Taim long dispela meri, sista i kamapim askim olsem: “Yu laik mekim bikpela long pikinini bilong yu long kain ples olsem yu lukim long piksa hia?” Bihain em i go lukim dispela meri long haus bilong em na dispela i opim rot bilong em i go bek planti taim na lukim em.
Mekim Wok Long Ol Liklik Nius Bilong Helpim Ol Man
Namba 2 Hap
1 Wanpela wasman sekit i wok wantaim wanpela kongrigesen na em i tok, taim ol i autim tok long man long namba wan taim, ol i mekim wok long ol liklik nius na long dispela rot ol i kirapim 64 Baibel-stadi.
2 Olsem wanem? Taim yu autim tok long ol man long namba wan taim, yu bin tokim ol yu laik stadi wantaim ol long Baibel? Sapos yu mekim wok long wanpela liklik nius, orait, yu inap stori liklik long pasin bilong mekim Baibel-stadi. Wanpela sista i bin mekim olsem—em i mekim wok long liklik nius Gutpela Sindaun Long Nupela Taim. Em i soim piksa bilong liklik nius long meri bilong haus, na em i askim meri, ‘Yu ting wanpela taim bai kamap na dispela graun bai i stap olsem dispela piksa?’ Taim meri i bekim pinis tok, sista i tokim em long kaunim 2 Pita 3:13 na Aisaia 65:17, em ol skripsa i stap long dispela liklik nius. Orait nau sista i tok: “Ol dispela promis i no olsem wanpela driman nating, nogat; ol i stap long Baibel, em Tok bilong God.” Na nau sista i stretim rot bilong stori moa wantaim em long wik antap. Taim sista i go bek lukim em, sista i bekim planti askim bilong dispela meri na em i givim buk Yu Inap i Stap Oltaim Long Paradais Long Graun long em. Bihain em i kirapim Baibel-stadi wantaim em.
3 Olsem wanem? Yu wanpela pablisa na nau tasol yu kisim baptais, o yu wanpela pablisa i no baptais yet na yu lain yet long pasin bilong autim tok? Sapos olsem, gutpela sapos yu tokim ol pablisa i lain gut pinis na bai ol i ken helpim yu long save long sampela pasin bilong mekim wok long ol liklik nius long hap teritori bilong kongrigesen yu save autim tok long en. Baibel i stori long planti manmeri, em ol strongpela bilipman i bin helpim ol na soim gutpela rot long ol.
4 Brata i lukautim Buk-Stadi em tu i ken helpim ol pablisa i no lain gut yet. Em i ken stretim rot bambai sampela ol narapela i ken helpim ol long mekim gutpela wok long ol liklik nius. Ol papamama i gat wok long helpim ol pikinini bilong ol na bai pasin bilong ol long autim tok i kamap gutpela moa. Papamama bilong wanpela yangpela meri Witnes i bin lainim em long pasin bilong tilim liklik nius Gutpela Sindaun Long Nupela Taim. Em i go wantaim mama bilong em long wanpela Baibel-stadi na tilim wanpela liklik nius long man bilong meri i stadi long Baibel. Man hia i kirap nogut long strongpela bilip bilong dispela yangpela. Em i amamas tru long ol tok em i kaunim long liklik nius. Long olgeta wik, taim yangpela meri i laik go bek wantaim mama long dispela Baibel-stadi, pastaim meri hia i save redim wanpela skripsa o wanpela stori long Baibel bilong kamapim long dispela man. Nau man i save kaunim olgeta magasin, na em i laikim buk Revelation Climax, na em i bin kam long sampela miting tu. Ol dispela samting i bin kamap, long wanem, papamama i bin mekim wok bilong ol long lainim pikinini meri long pasin bilong mekim gutpela wok long ol liklik nius.
5 Mekim Gutpela Wok Long Ol Nupela Liklik Nius: Taim yu mekim wok long liklik nius Ol Man Bilong Graun Bai Abrusim Bagarap o Nogat? yu ken kolim nem bilong yu na kirapim tok olsem: “Moning tru. Mipela i toktok wantaim ol man long sindaun bilong yumi ol man long nau. Yu ting sindaun bilong yumi bai kamap gutpela o yu ting em bai wok long bagarap? [Larim em i bekim.] Sampela i ting ol samting i kamap nau long graun i truim ol tok profet long Baibel na i makim olsem pasin bilong dispela graun i laik pinis. Yu ting olsem wanem?” Taim man bilong haus i kamapim pinis tingting bilong em, tilim liklik nius na kamapim tripela askim i stap long namba 2 paragraf. Orait nau yu ken stori long wanpela bikpela bagarap i bin kamap bipo, na bagarap i laik painim ol man long nau tu. Bilong pinisim tok, stretim rot bilong go bek na stori moa wantaim em long ol tok bilong Baibel i kamapim klia olsem dispela bagarap i kam klostu pinis.
6 Long ples wok o ples skul samting, planti taim yumi inap stori liklik tasol long tok bilong Kingdom. Long ples wok, ating ol wanwok bai stori long ol nius i toktok long wok bilong gavman. Yu ken tok olsem, maski ol bikman i givim bel long kamapim gutaim, long bipo yet na i kam inap long nau, planti pen na hevi i bin painim ol man. Orait nau yu ken kamapim ol tok i stap long ol laspela paragraf long pes 2 bilong liklik nius Husat Tru i Bosim Dispela Graun? Kaunim 4-pela askim i stap long laspela paragraf long pes 2. Sapos i no gat taim bilong stori liklik, orait, givim liklik nius long man na stretim rot bilong yu ken stori long ol dispela askim long narapela taim.
7 Gutpela sapos ol famili na yumi ol wan wan i lusim hap taim bilong tingim pasin bilong tilim ol dispela narapela narapela liklik nius. Traim sampela pasin bilong tilim. Tingim ol dispela askim: Olsem wanem yu ken mekim wok long ol liklik nius wantaim ol buk samting yu laik tilim? Bai yu go we na yu ken kisim sampela liklik nius i go wantaim yu? Long dispela wik bai yu bungim wanpela man em tok bilong liklik nius bai helpim em?
8 Pasin bilong laikim tumas Jehova na tingim ol narapela man bai kirapim yumi long autim tok bilong Kingdom inap long skel bilong yumi. Pasin bilong mekim wok oltaim long ol liklik nius bai helpim yumi long mekim dispela samting. Wanpela manki i gat 7-pela krismas em i laik helpim wanpela meri klostu long haus bilong em long kisim laip long nupela taim, olsem na em i givim wanpela liklik nius long em, na meri i kirap long stadi long Baibel. I no olsem hatwok, a? Taim yumi givim wanpela liklik nius long man bihain, ating yumi tu inap kirapim Baibel-stadi. Tru tumas, sapos yumi mekim gutpela wok long ol liklik nius taim yumi autim gutpela tok bilong Kingdom, orait, gutpela samting bai kamap.
[Questions for Part 1]
1. (a) Kolim nem bilong oganaisesen bilong yumi i rejista long gavman long Amerika. Bilong wanem yumi laik save long dispela nem? (b) Olsem wanem ol liklik nius i bin helpim wok bilong autim tok?
2. Long nau i gat hamas liklik nius i stap? Kolim nem bilong 4-pela laspela liklik nius yu bin kisim.
3. Sapos yumi laik mekim gutpela wok long ol liklik nius, yumi mas mekim wanem? Olsem wanem yu inap save, wanem liklik nius bai i gutpela long tilim long man?
4, 5. (a) Wanpela wasman sekit i kolim wanem gutpela rot bilong mekim wok long ol liklik nius? (b) Long wanem kain taim i gutpela sapos yumi mekim wok long liklik nius Bilong Mekim Gut Bel Bilong Man i Stap Bel Hevi? Na olsem wanem long liklik nius Amamas Wantaim Famili Bilong Yu?
6. Olsem wanem yumi ken mekim wok long wanpela liklik nius bilong kirapim Baibel-stadi?
7. Bilong wanem ol man i save amamas long kisim liklik nius, winim ol buk na magasin?
8. Yumi olgeta wan wan i mas redi long mekim wanem? Wanem gutpela samting inap kamap?
[Questions for Part 2]
3. (a) Ol strongpela pablisa i ken mekim wanem na bai ol i bihainim gutpela pasin bilong Prisila na Akwila? (Ap 18:24-27) (b) Kaunim 1 Korin 4:17. Pol tupela Timoti i makim wanem gutpela rot yumi ken bihainim?
4. Sapos papamama i lainim gut ol pikinini long wok bilong autim tok, wanem ol gutpela samting inap kamap?
6-8. (a) Sapos yumi laik mekim gutpela wok long ol liklik nius, orait yumi mas mekim wanem samting pastaim? (b) Kolim sampela kain taim yumi ken mekim wok long ol liklik nius. (c) Sapos yumi mekim gutpela wok long ol liklik nius taim yumi autim gutpela tok bilong Kingdom, orait, wanem gutpela samting bai kamap?