Ol Miting Bilong Wok Bilong Mas
Wik i Kirap long Mas 1
Singsing 53
10 min: Ol toksave bilong kongrigesen.
20 min: “Mekim Wok Long Ol Liklik Nius Bilong Helpim Ol Man.” (Namba 1 Hap) Paslain long miting, makim wanpela brata i save gut long kaunim tok na em i ken redi long kaunim ol paragraf. Kaunim pinis paragraf, orait kamapim askim bilong en. Bihain long paragraf 5, mekim soim long pasin bilong mekim wok long wanpela liklik nius bilong kirapim tok. Mekim wok long liklik nius Amamas Wantaim Famili Bilong Yu. Bihain long paragraf 8, mekim soim long pasin bilong autim tok long kain kain taim na ples long rot bilong wanpela liklik nius.
15 min: “Yu Mas Lain Gut Long Pasin Bilong Givim Bel Long God.” Wasman bilong Skul i ken mekim dispela tok bilong strongim bel bilong ol brata. Stori long pasin bilong mekim Tok Namba 2, na kirapim tingting bilong ol brata i kamapim ol bikpela tok bilong Baibel na bai ol i no ken stori planti long hap bilong Baibel em brata i mekim Tok Namba 2 bai kaunim.
Singsing 103 na beten.
Wik i Kirap long Mas 8
Singsing 20
10 min: Ol toksave bilong kongrigesen.
20 min: “Mekim Wok Long Ol Liklik Nius Bilong Helpim Ol Man.” (Namba 2 Hap) Paslain long miting, makim wanpela brata i save gut long kaunim tok na em i ken redi long kaunim ol paragraf. Kaunim pinis paragraf, orait kamapim askim bilong en o mekim soim. Taim yu kamapim tok bilong paragraf 2, mekim soim long pasin bilong kirapim Baibel-stadi long rot bilong wanpela liklik nius. Long paragraf 5, mekim soim long pasin bilong kirapim Baibel-stadi long rot bilong liklik nius Ol Man Bilong Graun Bai Abrusim Bagarap o Nogat?
15 min: “Yumi Mas Pilim Tru Olsem Ofa Bilong Krais Em i Bikpela Samting.” Sapos inap, orait wanpela elda i ken mekim dispela tok.
Singsing 196 na beten.
Wik i Kirap long Mas 15
Singsing 172
10 min: Ol toksave bilong kongrigesen. Ripot bilong ol akaun.
20 min: Wok Politik Long Skul—Em i Putim Bikpela Traim Long Ol Pikinini Bilong Yumi. Sapos inap, orait wanpela elda i ken stori long ol dispela tok hia na lukautim dispela soim.
1 Bikpela traim i save painim planti pikinini Kristen long skul, na long haiskul tu, na bai ol i mekim sampela pasin i no stret. Long planti skul ol i save vot na givim namba o wok long sampela sumatin, olsem kamap kepten bilong klas o kamap prifek o bosboi o bosmeri samting. Long rot bilong wanpela eleksen, ol i makim sampela sumatin bilong wok wantaim ol tisa, o het-tisa, o lain bilong bosim skul, na bai ol i ken stretim sampela hevi samting i save painim ol sumatin long skul. Ol bos bilong skul i laik bai ol sumatin, taim ol i yangpela yet, i lain long wok politik na wok gavman, na taim ol i winim skul bai ol i wok long kamap wanpela bikman long kantri.
2 Tasol ol yangpela Witnes i no save insait long ol politik bilong skul, na ol i no vot tu. Na sapos klas i vot na givim namba long ol bilong holim wanpela wok, ol i no kisim. Ol i bihainim pasin bilong Jisas—taim ol man i laik putim em i stap king bilong ol, em i lusim kwik ol. (Jo 6:15) Sapos ol pikinini Witnes i insait long ol politik bilong skul, orait, ol i no inap tok ol “i no bilong dispela graun,” na ol i no inap tok ol i bihainim Gopas bilong ol, em Krais Jisas.—Jo 17:16.
3 Na yumi mas tingim dispela samting tu: Ating kepten bilong klas na ol prifek ol i mas mekim sampela wok i no stret wantaim ol lo Kristen. Olsem: Planti taim ol prifek i mas go pas long mekim ol singsing bilong litimapim kantri, na kolim ol beten bilong skul, na pulim plak i go antap, na lukautim ol samting ol i mekim long ol nesenel-holide.
SOIM: Wanpela yangpela Witnes i lukim tisa bilong em. Klas i bin makim em bilong sanap long eleksen bilong skul bilong kamap kepten bilong klas.
Sumatin: Yes Tisa, mi laik toktok wantaim yu.
Tisa: Yes, olsem wanem?
Sumatin: Yu save, klas i makim mi bilong sanap long eleksen bilong skul bilong kamap kepten bilong klas.
Tisa: Em, mi save. Yu gat hevi long dispela?
Sumatin: Mi amamas long ol wanklas i tingim mi, tasol mi laik toksave olsem mi no inap kisim dispela wok.
Tisa: Tasol yu wanpela gutpela sumatin. Bai yu mekim gut dispela wok.
Sumatin: Yu save pinis mi wanpela Witnes Bilong Jehova. Sapos klas yet i vot na givim namba long mi, mi no inap kisim—mi wanpela Kristen na mi mas bihainim maus bilong bel bilong mi. Mi wok long bihainim pasin bilong Jisas, olsem na mi no ken insait long ol samting bilong vot na politik.
Tisa: Gutpela tru yu bin kamapim tingting bilong yu. Tasol yu wanpela sumatin na mi ting yu mas mekim sampela samting bilong helpim skul.
Sumatin: Mi wanbel long dispela tok bilong yu. Mi save mi gat wok long daun long ol tisa, na wok strong, na tingim ol narapela, na no ken giaman o stil. Na sapos yu yet o narapela tisa i makim mi long mekim sampela wok, na dispela i no brukim lo bilong God, orait, bai mi wok strong long mekim gut dispela wok. Tasol mi no inap kisim wanpela wok em klas i bin vot na eleksen long en.
Tisa: Orait, bai mi rausim nem bilong yu long lista bilong ol sumatin i sanap long eleksen bilong skul na tumora bai mi toksave long klas.
Sumatin: Tenkyu tru. Na mi laik givim dispela buklet long yu i kamapim klia i gat wanem as na ol Witnes Bilong Jehova i no insait long sampela wok bilong skul olsem dispela samting. [Em i tilim buklet Skul.]
Tisa: Tenkyu. Mi laik save moa long wanem samting i mekim na ol Witnes Bilong Jehova ol i narapela kain.
4 Bilong pinisim tok, kirapim ol papamama long toktok wantaim ol pikinini bilong ol long ol dispela samting, ating long famili-stadi long bihain. Papamama i ken askim tisa, i gat wanem kain pasin bilong makim ol sumatin long mekim sampela wok long skul. Olsem wanem? Ol pikinini i bin kisim sampela traim? Ol i bin mekim wanem bilong winim ol dispela traim? Ating sampela taim hevi i kamap na papamama i mas go long skul na lukim het-tisa o tisa na toktok gut wantaim em long ol samting pikinini bilong ol i ken mekim. Tru tumas, yumi olgeta i mas strongim ol yangpela—long olgeta de long skul i gat planti hevi na traim i laik pulim ol long mekim pasin i no stret.
15 min: “Memorial—Redim na Mekim.” Brata i lukautim dispela hap i mas toktok gut wantaim kongrigesen long (1) ol samting ol i mas redim bilong Memorial na (2) pasin bilong mekim Memorial.
Singsing 150 na beten.
Wik i Kirap long Mas 22
Singsing 6
10 min: Ol toksave bilong kongrigesen. Ripot bilong kongrigesen. Mekim sampela tok amamas long ol gutpela wok ol pablisa i bin mekim. Stori long sampela wok ol i mas wok strong long mekim i kamap gutpela moa.
MEMORIAL: Em bai kamap long Tunde, Epril 6, 1993, taim san i go daun pinis. Daunbilo em sedyul bilong sampela tok bilong Baibel yumi ken kaunim long olgeta de na bai yumi ken save long ol samting i bin kamap paslain liklik long taim Jisas i dai. Na yumi ken lukim dispela sedyul long kalenda bilong 1993 na long buklet Skelim Sampela Tok Bilong Baibel Long Olgeta De—1993.
Fonde, Epril 1: Luk 19:29-44
Fraide, Epril 2: Luk 19:45-48; Matyu 21:12, 13, 18, 19
Sarere, Epril 3: Luk 20:1-40
Sande, Epril 4: Luk 22:1-6
Mande, Epril 5: Luk 22:7-13; Mak 14:12-16
Tunde, Epril 6: Luk 22:14-71
20 min: “Mekim Gutpela Wok Long Ol Samting Bilong Helpim Yumi Long Autim Tok.” Taim siaman i mekim pinis liklik tok bilong kirapim tok, mekim tupela soim olsem i stap long paragraf 2 i go 5. Long pinis bilong namba wan soim, man bilong haus i kisim tupela magasin long 50 toea. Pablisa i tok promis long go bek lukim em bilong bekim wanpela askim olsem: “Bilong wanem God i larim pen na hevi i stap?” Long pinis bilong namba 2 soim, pablisa i kirapim Baibel-stadi long rot bilong wanpela liklik nius. Ol brata sista i laik autim tok long dispela Sarere Sande, kirapim ol long toktok wantaim man bilong haus long ol tok bilong Baibel na traim kirapim em long insait long dispela tok.
15 min: Askim. Wanpela elda o wanpela strongpela brata i ken stori gut long ol dispela tok. Sapos yu laik save moa long dispela samting, yu ken lukim buk Revelation Climax (tok Inglis), sapta 28, paragraf 32-38. Lukim tu buk Insight on the Scriptures, Volyum 2, pes 512.
Singsing 200 na beten.