Ol Miting Bilong Wok Bilong Epril
Wik i Kirap long Mas 29
Singsing 165
10 min: Ol toksave bilong kongrigesen.
15 min: “Rot Bilong Yumi Kisim Tok i Kam.” Ol askim na bekim. Sapos inap, kaunim ol paragraf.
20 min: “Olsem Wanem? Yu Inap Mekim Wok Painia?” Wanpela brata i ken toktok wantaim kongrigesen long ol dispela tok. Toktok wantaim wanpela yangpela i mekim wok painia oltaim, o wanpela pablisa, taim em i stap yangpela em i bin mekim wok painia. Stori long olsem wanem papamama na ol narapela i ken strongim ol yangpela long winim mak ol yet i bin putim bilong mekim wok painia. Kirapim olgeta brata sista long skelim wok bilong ol, ol inap mekim wok painia o olsem wanem? Givim bel long mekim dispela tok na bai ol brata i ken pilim gut. Nau ol brata sista i mas stretim rot bilong mekim wok painia haptaim long mun Epril.
Singsing 196 na beten.
Wik i Kirap long Epril 5
Singsing 171
10 min: Ol toksave bilong kongrigesen.
20 min: “Wok Gut Wantaim Brata i Lukautim Buk-Stadi.” Paslain long miting, makim wanpela brata i save gut long kaunim tok na em i ken redi long kaunim ol paragraf. Kaunim pinis paragraf, orait mekim sampela askim bilong kamapim ol bikpela tok bilong paragraf.
15 min: “Sampela Tok Yumi Ken Mekim na i No Hatwok Long Save Long En.” Toktok wantaim kongrigesen long ol dispela tok. Taim yu kamapim ol tok bilong paragraf 3, wanpela pablisa i ken mekim soim long pasin bilong mekim wok long buk Stap Oltaim, bilong kirapim tingting bilong man bilong haus. Man bilong haus i ken kamapim klia olsem em i gat bikpela laik long harim tok. Taim yu kamapim tok bilong paragraf 5, pablisa i ken mekim soim long pasin bilong mekim wok long wanpela liklik nius bilong kirapim tingting bilong man i no gat bikpela laik long harim tok.
Singsing 215 na beten.
Wik i Kirap long Epril 12
Singsing 143
10 min: Ol toksave bilong kongrigesen. Ripot bilong ol akaun.
20 min: “Lainim Ol Long . . . Olgeta Tok Mi Bin Givim Long Yupela.” Paslain long miting, makim wanpela brata i save gut long kaunim tok na em i ken redi long kaunim ol paragraf. Kaunim pinis paragraf, orait kamapim askim bilong en. Taim yu kamapim tok bilong paragraf 4 na 5, kolim sampela narapela skripsa na buk samting ol brata sista i ken mekim wok long en na i stret long hap teritori yu autim tok long en. Redim gut na mekim soim long olsem wanem pasin bilong kirapim tok i ken stret wantaim liklik nius yu laik tilim. Sapos yu gat taim, stori long wanpela o tupela paragraf bilong dispela liklik nius. Kirapim olgeta brata sista long wok strong oltaim long kirapim ol nupela Baibel-stadi.
15 min: Toktok Wantaim Sampela Skulmanki. Toktok wantaim sampela skulmanki. Makim ol skulmanki ol inap kamapim sampela stori bilong strongim ol narapela yangpela pablisa. Givim ol dispela askim long ol, na sampela askim moa i stret long hap yu stap long en:
1. Yu bin mekim wanem tok o wanem samting bambai ol tisa bilong yu i save yu pilim tru ol samting ol i mekim bilong helpim yu?
2. Olsem wanem? Sampela hevi i bin painim yu long taim bilong salut long plak o mekim singsing bilong litimapim kantri? Sapos olsem, yu bin mekim wanem?
3. Taim yu bung wantaim ol narapela sumatin, yu bin mekim wanem tok o wanem samting na i kamapim klia olsem ol Witnes Bilong Jehova ol i narapela kain?
Singsing 157 na beten.
Wik i Kirap long Epril 19
Singsing 211
10 min: Ol toksave bilong kongrigesen. Toktok wantaim ol brata sista long sampela tok bilong ol nupela magasin ol i ken kamapim. Kirapim olgeta long autim tok long dispela Sarere Sande.
20 min: “Mekim Ol Baibel-Stadi Long Buk Stap Oltaim.” Paslain long miting, makim wanpela brata i save gut long kaunim tok na em i ken redi long kaunim ol paragraf. Kaunim pinis paragraf, orait kamapim askim bilong en.
15 min: Kisim Tok Bilong Stretim Yu na Bai Yu Lain Long Bihainim Tok. Wanpela brata i ken mekim tok long ol tok bilong “Kisim Tok Bilong Stretim Yu na Bai Yu Lain Long Bihainim Tok,” i stap long Wastaua bilong Oktoba 1, 1992. Helpim kongrigesen long save, olsem wanem olgeta Witnes Bilong Jehova—ol yangpela na lapun tu—i kisim tok bilong stretim ol. Na helpim ol long save, sapos ol i amamas long bihainim tok, dispela samting inap helpim ol.
Singsing 200 na beten.
Wik i Kirap long Epril 26
Singsing 98
10 min: Ol toksave bilong kongrigesen.
20 min: “Ol Samting Mi Kisim Long Jehova Inap Helpim Mi Olsem Wanem?” Wanpela brata i ken toktok wantaim kongrigesen long dispela askim. Kirapim ol brata sista long lukim ol tok bilong Baibel i gat taim bilong kaunim, na kamapim gut insait bilong ol dispela tok.
15 min: Stori Bilong Dispela Mun. Toktok wantaim ol brata long Stori Bilong Dispela Mun na helpim ol long save olsem wanem dispela tok inap helpim ol man long nau. Planti manmeri ol i tok ol i gat Baibel, tasol olsem wanem? Ol i save long as bilong ol tok bilong en? Ol i save bihainim ol tok bilong en? Yumi amamas long helpim ol long kisim save long ol tok bilong Baibel long rot bilong Wastaua na ol narapela buk samting bilong Baibel. Man i bihainim tok bilong Baibel em inap long kisim laip oltaim.
Bilong Wanem Yumi Mas Stadi Long Baibel?
2 Ti 3:16, 17: Tok bilong God i gutpela bilong helpim yumi.
Jo 17:3: Tok bilong God em i rot bilong kisim laip oltaim.
Tokim narapela narapela pablisa long mekim ol dispela soim. Redim gut ol dispela soim, bambai ol inap helpim gut olgeta pablisa, na taim ol i autim tok, ol i ken tingim ol tok bilong ol dispela soim na mekim wok long en.
SOIM 1: (Pablisa i autim tok wantaim pikinini bilong em. Man bilong haus tu i gat sampela pikinini.)
Pablisa: Moning tru! Yu mekim bikpela wok long gaden, a? Mi tu mi amamas long mekim wok long gaden, tasol nau mi wantaim pikinini bilong mi i raun bilong toktok wantaim ol man long tok bilong Baibel. Nem bilong mi . . . na nem bilong pikinini bilong mi . . . Mi wanpela Witnes Bilong Jehova na mi stap long . . .
Man bilong haus: Nem bilong mi . . . , na nem bilong pikinini bilong mi . . .
Pablisa: Long wik i go pinis long hap bilong mipela ol raskol i mekim planti pasin nogut.
Man bilong haus: Wankain samting i bin kamap long hap bilong mipela tu.
Pablisa: Mi tingim dispela na mi kisim pikinini bilong mi i kam wantaim mi taim mi raun toktok wantaim ol man long tok bilong Baibel. Olsem na mi save pikinini i stap we, na long dispela rot mi inap lainim em long bilip tru long ol tok bilong Baibel. Mi pilim olsem i bikpela samting mi mas mekim, long wanem, yumi stap long taim nogut.
Man bilong haus: Taim yupela ol Witnes i kam lukim mi, mi no save harim tok bilong yupela, tasol ol tok yu mekim i kirapim tingting bilong mi, olsem na mi laik harim tok bilong yu. Wanem as tru na yu kam?
Elda: Sapos yumi tingim gut ol man bilong haus, planti taim dispela i opim rot bilong yumi ken autim gut tok long ol. Olsem bai yu ken tilim sabskripsen bilong Wastaua o wanpela buklet long man bilong haus.
SOIM 2: Pablisa i autim tok wantaim pikinini bilong em.
Pablisa: [Em i tokim pikinini long paitim dua.]
Man bilong haus: Mi save pinis yu wanpela Witnes Bilong Jehova, olsem na mi laik tokim yu mi wanpela strongpela Katolik na mi no laik senisim lotu bilong mi!
Pablisa: [Pes i lait na em i mekim gutpela pasin pren.] Tru yumi gat lotu bilong yumi yet, tasol i gat wanpela samting yumi wanbel long en!
Man bilong haus: Em wanem samting?
Pablisa: Mi lukim haus bilong yu i gat strongpela banis, na haus bilong mi tu i gat banis. Long nau yumi mas mekim planti samting bambai ol raskol i no ken brukim haus, a? Na long ol narapela kantri tu ol i save mekim olsem.
Man bilong haus: Tru tumas. Tasol planti bilong ol dispela raskol i manki tasol. Sapos papamama bilong ol i tingim gut ol, bai ol i no larim ol i raun nating long rot—bai ol i kirapim ol long mekim sampela gutpela wok.
Pablisa: Yu tok stret. Ating dispela samting i olsem, long wanem, planti papamama i no pas gut wantaim pikinini bilong ol olsem pren gut wantaim ol. Tru lotu bilong yumi i narapela narapela, tasol mi save ol Katolik i bilip long tok bilong Baibel, na mi tu mi bilip long en. Baibel bilong yu i stori long ol pasin nogut i kamap nau long taim bilong yumi. Bihain yu ken lukim dispela tok long Baibel bilong yu. Bai mi kaunim 2 Timoti 3:3. [Kaunim] Em i stori long wanpela taim bai kamap na ol man “i no save long pasin bilong i stap pren bilong ol arapela.” Tasol olsem wanem long ol pikinini? Lukim ves 2. [Kaunim] Em i tok ol pikinini “bai i sakim tok bilong papamama”!
Man bilong haus: Tru ya!
Pablisa: Nau lukim ves 1. Em i tok ol dispela samting bai kamap long “taim bilong las de.” Olsem wanem? Yu bilipim dispela tok bilong Baibel bilong yu, olsem yumi stap long “taim bilong las de”?
Man bilong haus: Yes, mi bilip olsem.
Pablisa: Tasol nogut mi pulim bikpela hap taim moa. Tenkyu tru yu bin toktok wantaim mi long ol dispela samting. Gutpela sapos narapela taim yumi ken toktok moa long dispela “taim bilong las de” em Baibel bilong yu i stori long en.
Elda: Olsem yumi lukim long namba wan soim, sapos yumi mekim gutpela pasin pren na tingim gut ol man bilong haus, planti taim dispela i opim rot bilong yumi ken autim gut tok long ol.
Singsing 59 na beten.