Rot Bilong Yumi Kisim Tok i Kam
1 Husat dispela man i autim tingting bilong em? Na em i givim tok long husat? Dispela man, em Jehova, na em i givim tok long yumi olgeta wan wan. Tasol ating yu gat askim olsem: ‘Jehova i save givim tok long mi?’ Yes, em i save givim tok long yu! Em i givim tok long yu long rot bilong “wokboi i gat gutpela tingting” em Matyu 24:45-47 i stori long en. Dispela “wokboi” i mekim wok long magasin Wastaua bilong autim tingting bilong Jehova long yumi.
2 Winim 100 yia pinis, Jehova i bin blesim wok bilong redim ol tok bilong dispela nius na ol wok ol brata i bin mekim bilong tilim. Ol i wokim namba wan Wastaua long Julai, 1879. Ol i bin wokim hamas? Inap 8,000. Na long hamas tok ples? Wanpela tasol!
3 Olsem na kirap long yia 1879 i kam inap long nau, Jehova i bin blesim ol wok bilong Wastaua. Long nau ol i wokim hamas Wastaua? Ol i wokim 16,400,000 samting! Na long hamas tok ples? Inap 112.
4 Wastaua i gat wanem wok? Pes 2 bilong olgeta Wastaua i tok olsem: “Wok bilong Wastaua em bilong litimapim nem bilong God Jehova, em King bilong heven na graun. Dispela nius i skelim ol samting i kamap long graun, em ol i truim tok profet bilong Baibel, na i tokim olgeta lain long Kingdom bilong God na mekim gut bel bilong ol. Dispela Kingdom liklik taim bai pinisim ol man i mekim nogut long ol narapela man, na em bai mekim graun i kamap gutpela ples paradais. Wastaua i kirapim ol manmeri long bilip long Krais Jisas nau em i stap king, na em i bin dai bambai ol man i ken kisim laip i stap oltaim. Ol Witnes Bilong Jehova i wokim Wastaua kirap long yia 1879 i kam inap long nau. Wastaua i no helpim wok politik. Baibel i as bilong ol tok bilong en.”
5 Long nau, taim yumi tilim Wastaua, planti man i tok, ‘Mi no gat mani.’ Tasol maski man i kisim Wastaua o nogat, gutpela sapos yumi opim Wastaua na bai em i ken save long ol gutpela samting bilong en—i gat ol naispela piksa na ol gutpela tok em inap mekim gut bel bilong man. Ating bihain, sampela bai tingim bek ol tok yu bin mekim long Wastaua, na bai ol i gat laik long kisim. Sapos ol i mekim olsem, ol bai kisim save em inap long helpim ol long kisim laip oltaim.
6 Long ol dispela as, ol Witnes Bilong Jehova i gat bikpela laik long tilim dispela magasin, em i ‘rot bilong kisim tok i kam.’ Ol i laik tilim long planti man, long wanem, no gat bikpela hap taim i stap—Armagedon i kam klostu pinis.
This article is unique to PNG.