Olsem Wanem? Yu Inap Mekim Wok Painia?
1 Long “Ol Man i Stap Olsem Lait” Kibung Distrik, wanpela brata i kamapim askim olsem: “Yu inap mekim wok painia? Bai yu mekim?” Em i tok, Armagedon i klostu, olsem na yumi mas mekim hariap wok bilong autim tok.—1 Ko 7:29a.
2 Tru tumas, wok painia i hatwok liklik. Ol painia i mas bosim gut skin na stretim gut ol samting bilong mekim dispela wok. Tasol ol wok yumi mekim long autim tok “bai i no inap lus nating.” (1 Ko 15:58) Olsem wanem? Yumi inap tok olsem long ol narapela wok yumi inap mekim na i pulim bikpela hap taim na strong bilong yumi? Nogat tru! Pasin bilong laikim tumas Jehova i save kirapim ol Kristen long wok strong long mekim wok bilong Jehova, na i bin kirapim planti long mekim wok painia.—1 Jo 5:3; KTH 4:11.
3 Planti yangpela wokboi bilong Jehova i winim haiskul pinis ol i tingting strong long mekim wok painia. I stret ol i mekim olsem, long wanem, no gat narapela wok i winim tru wok painia, a? (Mt 6:33) Wok bilong autim tok bilong Kingdom, em wanpela wok yumi mas mekim—em wok bilong Jehova—na em i wanpela gutpela samting bilong ol yangpela sapos ol i mekim dispela wok kirap long taim ol i yangpela yet!—Mt 24:14.
4 Olsem wanem? Yupela ol papamama i save kirapim ol pikinini bilong yupela long mekim wok painia? Ol pikinini i save gut olsem yu laik bai ol i givim bel na tingting na strong olgeta bilong ol long mekim dispela gutpela wok? (Mk 12:30) Planti yangpela pablisa, taim ol i stap yet long skul na rot i op, ol i mekim wok painia haptaim na dispela i helpim ol long redi long kamap painia oltaim. Ol i givim bel long Jehova olsem, na dispela i mekim Jehova i belgut tru!—Snd 27:11.
5 Tasol i no olgeta pablisa inap mekim wok painia. Olsem wanem? Maski yu marit o singel, o yangpela o lapun, yu bin beten na skelim gut ol samting, yu inap mekim wok bilong Jehova olsem wanpela painia? (Kl 3:23) Planti yangpela marit i wok long painim rot bilong tupela wantaim i ken mekim wok painia, o wanpela inap long mekim olsem.
6 Olsem wanem? Sapos nau yu no inap mekim wok painia oltaim, yu inap mekim wok painia haptaim? Ating planti pablisa long kongrigesen bilong yu i laik mekim wok painia long mun Epril. Olsem wanem? Yu inap mekim wok painia wantaim ol? Yumi olgeta wokboi bilong Jehova i save kisim planti blesing, tasol sapos yumi inap lusim bikpela hap taim moa long mekim wok bilong Kingdom na painim ol man i kain olsem sipsip, bai yumi inap kisim planti blesing moa.—Ap 20:35.