Wok Gut Wantaim Brata i Lukautim Buk-Stadi
1 Buk-Stadi i mekim bikpela wok long helpim pasin bilong yumi long autim tok i kamap gutpela moa. I no gat planti manmeri insait long grup, olsem na dispela i helpim narapela long save gut long narapela na pas gut wantaim olsem wanpela famili. Grup i no bikpela, olsem na brata i lukautim Buk-Stadi em inap tingim olgeta wan wan bilong grup na helpim ol long autim gut tok. Yumi ken mekim wanem na bai yumi inap wok gut wantaim brata i lukautim Buk-Stadi na bai dispela Stadi i helpim yumi?
2 Wok Strong Long Mekim Wok Bilong Autim Tok: Wanpela bikpela wok bilong brata i lukautim Buk-Stadi, em i mas helpim olgeta long grup long wok strong long mekim wok bilong autim tok. Buk Lo long pes 44 i stori long wok bilong em olsem: “Sapos em i givim bel long dispela wok na em i strong long mekim oltaim, dispela bai kirapim ol pablisa long mekim olsem.” Sampela taim, brata i lukautim Stadi bai autim tok wantaim ol wan wan bilong famili bilong em yet, tasol sapos em inap, em bai amamas tu long wok wantaim ol narapela long mekim wok autim tok long kain kain rot. Olsem wanem? Yu inap go oltaim long ol bung bilong i go autim tok? Sapos yu mekim olsem, brata i lukautim Buk-Stadi na ol pablisa bai amamas.
3 Ol i putim ol bung bilong i go autim tok long ol narapela narapela hap insait long teritori bilong kongrigesen na i no hatwok long ol brata i kam long en, olsem na ol inap mekim bikpela wok autim tok. Gutpela sapos olgeta pablisa i lusim ples bung hariap na go autim tok—no ken lusim nating taim. Planti pablisa na painia, taim ol i autim tok long Sarere Sande, ol i autim tok i go inap long belo o wan klok samting na long dispela rot ol i save painim planti man i laik harim tok.
4 Olsem wanem? Yu laik bai narapela i helpim yu long mekim wok autim tok long kain kain rot? Ating brata i lukautim Buk-Stadi i ken stretim rot na bai wanpela strongpela pablisa long grup i ken wok wantaim yu. Long pinis bilong mun, gutpela sapos yu putim kwik ripot. Brata bilong lukautim Buk-Stadi na kuskus bai amamas sapos yu wok gut wantaim ol long dispela samting.—Lukim Luk 16:10.
5 Taim Wasman Bilong Wok Autim Tok i Kam Lukim Grup: Wanpela taim long olgeta mun, wasman bilong wok autim tok i go lukim narapela narapela Buk-Stadi bilong helpim ol long autim gut tok. Long pinis bilong Buk-Stadi, em bai mekim wanpela tok em inap long 15 minit. Putim gut yau long dispela tok, long wanem, em bai kolim stret sampela samting grup i ken mekim na bai ol hap bilong wok autim tok i ken kamap gutpela moa. Na tu, wasman bilong wok autim tok i gat bikpela laik long wok wantaim ol narapela narapela brata sista bilong grup long Sarere Sande. Sapos inap, gutpela sapos yu wok wantaim em—em i lain pinis long pasin bilong autim gut tok na em inap helpim yu.
6 Sapos yumi wok gut wantaim brata i lukautim Buk-Stadi na redi long helpim ol pablisa i no save gut long pasin bilong autim tok, orait, dispela inap helpim grup long kamapim pasin olsem pren gut wantaim, na long dispela rot yumi bihainim Galesia 6:10 i tok olsem: “Yumi mas strong tru long mekim gutpela pasin long ol arapela manmeri i bilip long Bikpela.”