Taim Yumi Stadi Long Baibel, Yumi Mas Tingim Gut Ol Yia Ol Samting i Bin Kamap
1 Stori: Bilong makim ol yia ol samting i bin kamap, Baibel i kolim krismas bilong sampela man, na ol yia bilong wok king bilong sampela man, na kain bikpela samting olsem. Baibel tasol i makim ol yia ol samting i bin kamap i go bek inap long pastaim tru, olsem long taim God i bin wokim Adam. Na sampela bikpela samting bilong kamapim laik bilong God, taim i no kamap yet, Baibel i bin kolim yia em bai kamap. . . . I gat planti samting i makim klia olsem Babilon i bin bagarap long yia 539 paslain long Krais, olsem na ol Juda i bin lusim Babilon i go bek long ples long yia 537 paslain long Krais. (Esr 1:1-3) Sapos yumi kirap long kaunim ol yia long kain yia olsem, orait long ol kalenda bilong nau yumi inap makim stret ol yia ol samting long taim bilong Baibel i bin kamap.
2 I Gat Wanem As na Ol Witnes Bilong Jehova i Tok, Kingdom Bilong God i Bin Kamap Long Yia 1914?: I gat tupela samting i makim dispela yia: (1) Ol yia Baibel i kolim na (2) ol samting i bin kamap long graun bihain long 1914 na i truim ol tok profet. Nau yumi ken stori long ol yia Baibel i kolim. Bilong save long truim bilong ol tok profet, lukim het-tok “Taim Bilong Las De.”
3 Kaunim Daniel 4:1-17. Ves 20-37 i makim olsem truim bilong dispela tok profet i bin painim Nebukatnesar. Tasol i gat bikpela truim bilong en tu. Olsem wanem yumi ken save long dispela? Ves 3 na 17 i kamapim klia olsem dispela driman God i bin givim long King Nebukatnesar i makim Kingdom bilong God na laik bilong em long givim dispela Kingdom long ‘wanpela man nating em yet i makim.’ Olgeta tok bilong Baibel i makim olsem Jehova i laik putim Pikinini bilong em yet, Krais Jisas, i stap king bilong mekim wok olsem maus bilong em na bosim ol man. (Sng 2:1-8; Dan 7:13, 14; 1 Ko 15:23-25; KTH 11:15; 12:10) Baibel i stori long Jisas i daunim em yet na i stap olsem “man nating.” (Fl 2:7, 8; Mt 11:28-30) Olsem na dispela driman i makim taim bilong Jehova i putim Pikinini bilong em i stap king na bosim ol man.
4 Tasol wanem samting i mas kamap pastaim? Dispela diwai na as bilong en i makim wok bilong bosim ol man. Ol bikpela gavman i gat “tingting olsem ol animal” ol i mas kamap na bosim ol man. (Dan 4:16) Bai ol i mekim pasin olsem bilong ol wel animal. Long taim bilong yumi, bea i makim Rasia; tarangau i makim Amerika; laion i makim Briten; traipela snek i makim Saina. Baibel tu i save stori long ol wel animal bilong makim ol gavman, na bilong makim olgeta gavman wantaim em Satan i bosim ol. (Dan 7:2-8, 17, 23; 8:20-22; KTH 13:1, 2) Jisas i tok profet long taim bilong las de, olsem: “Ol man bilong ol arapela lain bai i krungutim Jerusalem, inap long taim God i bin makim.” (Lu 21:24) “Jerusalem” i makim Kingdom bilong God, long wanem, Baibel i tok i olsem God i “makim” ol king bilong Jerusalem. (1 Sto 28:4, 5; Mt 5:34, 35) Olsem na ol gavman bilong ol narapela lain, em ol i olsem ol wel animal, ol bai “krungutim” wok em Kingdom bilong God i mas holim bilong bosim ol man, na ol yet bai bosim graun aninit long strong bilong Satan.—Lukim tu Luk 4:5, 6.
5 God bai larim ol dispela kain gavman i bosim graun inap hamas yia na bai em i givim Kingdom long Krais Jisas? Daniel 4:16 i tok, inap “7-pela yia.” Tasol lo bilong Baibel i olsem: Long tok profet, wanpela de i makim wanpela yia. (Ese 4:6; Nam 14:34) Orait, i gat hamas de insait long “7-pela yia”? Kamapim Tok Hait 11:2, 3 i tok, 42 mun, em 3 na hap yia, i olsem 1,260 de. Olsem na 7-pela yia i gat 2,520 de. Na olsem yumi tok pinis, Baibel i makim wanpela de i olsem wanpela yia, olsem na dispela 2,520 de em 2,520 yia.
6 Wanem taim dispela hap taim bilong “7-pela yia” i kirap? Taim ol Babilon i rausim pinis Sedekaia long wok king long Jerusalem, em i laspela king long dispela kingdom i olsem piksa bilong Kingdom bilong God. (Ese 21:25-27) Long kirap bilong mun Oktoba long yia 607 paslain long Krais, wok king bilong ol Juda i pinis olgeta. Long dispela taim ol man i kilim pinis Gedalia, em ol Babilon i bin putim em bilong lukautim kantri Juda, na liklik lain Juda i stap yet long ples ol i ranawe pinis i go long Isip. (Jeremaia, sapta 40-43) Ol yia Baibel i kolim i makim olsem dispela i bin kamap 70 yia paslain long yia 537 paslain long Krais, em yia ol Juda i bin lusim Babilon na go bek long Jerusalem, olsem na dispela i bin kamap long kirap bilong mun Oktoba, long yia 607 paslain long Krais. (Jer 29:10; Dan 9:2; na lukim tu buk Stap Oltaim, pes 138-141.)
7 Orait, olsem wanem yumi save, dispela hap taim i pinis long 1914? Em i kirap long Oktoba, 607 paslain long Krais, olsem na 2,520 yia bihain long dispela, em Oktoba, 1914.
8 Wanem samting i bin kamap long dispela taim? Jehova i givim wok bilong bosim ol man long Pikinini bilong em yet, Krais Jisas, em i kisim pinis biknem long heven.—Dan 7:13, 14.
9 Orait, bilong wanem pasin nogut i pulap yet long graun? Krais i kamap king pinis long heven na em i rausim Satan wantaim ol spirit nogut i kam daun long graun. (KTH 12:12) Krais i stap King, tasol em i no kirap wantu tasol na pinisim olgeta lain i no laik daun long wok king bilong Jehova na long em yet, em i Man bilong kisim bek ol. Olsem em i tok profet pinis, pastaim i gat wok bilong autim tok bilong Kingdom long olgeta hap bilong graun. (Mt 24:14) Em i stap King na em i bosim wok bilong tilim ol manmeri bilong olgeta lain—ol stretpela man bai kisim laip i stap oltaim, na ol man nogut bai pinis olgeta. (Mt 25:31-46) Na ol hevi i olsem mak bilong “taim bilong las de” i mas i stap. Ol dispela hevi i kirap long yia 1914. Ol manmeri i bin stap laip long 1914, sampela bai stap yet na bai olgeta narapela samting Jisas i bin tok profet long en i mas kamap, wantaim “taim bilong bikpela hevi tru,” na bai pasin nogut bilong nau i pinis.—Mt 24:21, 22, 34.
This article is unique to PNG.