Mekim Stadi Long Buk Stap Oltaim na Buk Wanbel
1 Yumi ken mekim wok long ol liklik nius na buklet na magasin na buk bilong kirapim Baibel-stadi wantaim ol man i laik harim tok. Long planti hap yumi bin tilim buk “Nambawan Man Tru i Winim Olgeta Narapela Man,” na planti man i laikim, olsem na i no hatwok long mekim wok long dispela buk bilong kirapim ol stadi. Gutpela sapos yumi wok long kirapim olgeta man long kaunim na stadi long dispela buk, na kirapim ol tu long kam oltaim long Buk-Stadi na redim ol tok bilong en.
2 Tasol i gat tupela buk yumi mas stadi wantaim ol nupela man long en bilong helpim ol long save long ol as tok bilong Baibel na ol pasin Kristen ol i mas bihainim. Nem bilong tupela buk i olsem: Yu Inap i Stap Oltaim Long Paradais Long Graun na Wanbel Long Lotuim Dispela Wanpela God Tru. Sapos yu save stadi wantaim man long narapela buk, orait long taim yu ting i orait long mekim, gutpela sapos yu lusim dispela buk na kirap long stadi long wanpela bilong ol dispela buk yumi kolim pinis. Sapos yumi bin stadi wantaim man long buk Nambawan Man Tru, kirapim em na bai em yet i ken kaunim dispela buk. Sapos man i kisim baptais, tasol em i no pinisim yet tupela buk, yumi mas stadi yet wantaim em inap long taim em i lainim pinis ol tok i stap long tupela buk, em buk Stap Oltaim na buk Wanbel. Sapos em i mekim olsem, dispela bai helpim em long kamap strong long ol samting bilong spirit na bai em inap sakim ol samting i laik pulim em.