Askim
● Sapos wanpela Baibel-stadi i kisim baptais, tasol em i no pinisim yet tupela buk, bilong wanem yumi mas stadi yet wantaim em inap long taim em i pinisim tupela buk?
1 Yumi save Jehova i blesim oganaisesen bilong em, long wanem, planti man moa yet i wok long kam insait long ol kongrigesen na yumi amamas long lukim ol. Tasol yumi mas wok yet long helpim ol long lain gut long mekim laik bilong Jehova.
2 Ol dispela nupela man i mas kisim stretpela save long tok i tru. (Ko 1:9, 10) Yumi gat wok long helpim ol long save gut long ol bikpela tok bilong Baibel, na long ol gutpela pasin Kristen em ol i mas bihainim. Dispela bai helpim ol long kamap strongpela Kristen bambai ol i ken winim ol traim i laik painim ol long bihain.
3 Tingting bilong Baibel-stadi i mas kamap olsem tingting bilong man i bikpela pinis. (1 Ko 14:20) Bilong kamap strong tru long spirit, gutpela sapos wanpela i ken stadi yet wantaim em. Olsem na sapos stadi bilong yumi i kisim baptais, tasol em i no pinisim yet tupela buk, i gutpela sapos yumi stadi yet wantaim em inap long taim em i lainim pinis ol tok i stap long tupela buk.
BIHAIN LONG BAPTAIS
4 Jisas i tok yumi mas kamapim ol disaipel—baptaisim ol na lainim ol. (Mt 28:19, 20) Yumi mekim bikpela wok moa long lainim ol bihain long taim ol i kisim baptais. Tasol sapos ol i stadi long wanpela buk tasol, save ol i kisim i no inap long helpim ol long kamap strong tru long ol samting bilong spirit. Ol i mas kisim sampela save moa bambai ol i ken mekim gut wok bilong autim tok, na bai ol i ken sanap strong na sakim ol samting i laik pulim ol man i save mekim wok bilong Jehova nau long dispela las taim. Sapos yumi no lainim ol gut, ating ol i no redi long sanap strong. Olsem na taim man i kisim baptais pinis, yumi mas wok yet long helpim em long kamap strong, maski em i stadi pinis long tupela buk o nogat. Namba wan buk em i stadi long en i helpim em long save long ol as tok bilong Baibel, na namba tu buk i kamapim ol pasin Kristen. Pastaim yumi ken stadi long buk Stap Oltaim na bihain yumi ken stadi long buk Wanbel o buk Bel Isi. Sapos yumi no gat ol dispela buk, orait yumi ken mekim wok long ol narapela buk i gat ol wankain tok long en. Sapos yumi mekim stadi long tupela buk pinis, dispela bai skulim em tru long ol laik bilong Jehova na ol lo bilong em, na ol pasin Kristen em i mas bihainim, na dispela save bai helpim em long kamap strong long bilip.—Ko 2:7.
5 Ol nupela baptais i mas wok yet long kamap strong long ol samting bilong spirit. (Hi 6:1-3) Ating yumi no lusim bikpela hap taim tumas long pinisim namba tu buk. Tasol long dispela rot ol nupela baptais inap kisim strongpela bilip.