Long 1991 Bai Yu Mekim Wanem long Skul?
1 Long planti hap, Februeri em i taim bilong ol pikinini i go bek long skul. Ating bai ol i kisim ol nupela tisa, na ol i mas lainim ol nupela samting, na i gat ol narapela kain wok ol i mas mekim. Taim yu skul, rot i op long lainim sampela man long tok i tru. Yu inap autim tok long ol tisa na wanskul bilong yu. Gutpela wok yu mekim long skul long autim tok long narapela man, dispela samting i litimapim nem bilong Jehova, na bai yu kisim bikpela amamas.
OL SAMTING JEHOVA I LAIK BAI YUMI MEKIM
2 Jehova i laik bai ol yangpela i mekim wok bilong lotu i tru. (Sng 148:12, 13) Em i givim wok long ol yangpela long lain bilong em. (Sng 110:3; Mt 19:13, 14) Sapos yu givim bel long autim tok long ol wanskul bilong yu, na yu bihainim gutpela pasin taim yu stap long skul, bai yu inap litimapim nem bilong Jehova. (Snd 27:11) Gutpela pasin bilong yu inap kirapim narapela man long litimapim nem bilong God Jehova.—Mt 21:15, 16.
3 Sapos yu laik mekim gut wanpela wok, yu mas mekim mekim na bai yu lain gut long mekim. Sapos man i lain long paitim gita, dispela samting i no makim olsem em i save gut long mekim. Na i wankain tu long ol yangpela Kristen, ol i mas mekim mekim olgeta wok Kristen pastaim, na bihain bai ol inap mekim gut. Wok long kisim bikpela save moa olsem Jisas i bin mekim. (Lu 2:52) Lain long kaunim gut tok. Wok strong long kisim save long skul. Yu mas tingim famili-stadi na ol miting bilong kongrigesen em i bikpela samting. Sapos yu mekim olsem, bai ol man i tok yu bihainim gutpela pasin olsem Timoti i bin mekim.—Ap 16:1, 2.
OL SAMTING PAPAMAMA INAP MEKIM
4 Ol papamama i ken kirapim pikinini bilong ol long autim tok long skul. Ol i mas helpim ol pikinini long save, sapos pikinini i stap gut long tok i tru na autim tok long skul, dispela samting inap helpim em na bai ol wanskul bilong em i no inap pulim em long mekim pasin nogut. Na sapos pikinini Witnes i bihainim gutpela pasin long skul, orait bai ol narapela skulmanki i litimapim nem bilong em.
5 Sampela taim long skul, ol narapela skulmanki i save subim ol pikinini Witnes long mekim ol samting wantaim ol taim skul i pinis long apinun, olsem pilai spot o go raun long sampela hap samting. Na sampela taim tisa na ol kosa bilong spot i laik subim pikinini Witnes long mekim sampela narapela wok bihain long taim bilong skul, na ating dispela samting i givim hevi long pikinini Witnes na em wanpela i no inap karim dispela hevi. Sampela gutpela tok bilong helpim yupela long save gut long dispela samting i stap long pes 22-25 long buklet Skul na Ol Witnes Bilong Jehova. Na i gat sampela gutpela tok tu long buk Yangpela. Sapos yupela lusim liklik hap taim bilong toktok wantaim pikinini bilong yupela long ol dispela samting, gutpela samting bai kamap.—Snd 22:6.
6 Taim yu go long skul long dispela yia na yu wok yet long bihainim ol gutpela pasin Kristen, yu ken save Jehova bai blesim yu long nau na long bihain tu. Sindaun 20:11 i tok: “Yumi lukim pasin bilong wanpela man na yumi ken save, em i gutpela na stretpela man o em i man nogut. Na long wankain pasin tasol, yumi ken save long ol pikinini tu.”—Lukim tu Buk Song 37:37.
OL BOS BILONG SKUL I AMAMAS
7 Ol bos bilong skul i amamas long kisim save long bilip bilong ol Witnes Bilong Jehova na ol samting ol pikinini Witnes inap mekim na ol samting ol i no inap mekim. Ol i bin givim wanpela buklet Skul na Ol Witnes Bilong Jehova long het-tisa bilong wanpela skul long Kwibek long Kanada. Bihain em i tok: “Dispela buklet bai helpim mipela long save gut long ol pikinini bilong yupela, na bai mipela inap tingim ol samting ol i no inap mekim.”
8 Bihain em i tok: “Inap mi kisim 8-pela bilong dispela buklet? Mi laik givim wan wan long 8-pela skul.” Brata i tok, “Yu ken kisim.” Olsem na dispela man i tok, “Orait, mi laik kisim 40.” Na em i tok: “Sapos olgeta lotu i tokaut long bilip bilong ol, planti hevi nau i save painim ol pikinini bai i no inap kamap. Tenkyu tru.”
OL YANGPELA WITNES I LAIKIM
9 Wanpela yangpela bilong Jojia long Amerika em i tok em i bin givim dispela buklet long tisa bilong em. Taim tisa i kaunim pinis, em i orait long dispela pikinini Witnes i no ken mekim sampela wok bilong skul. Dispela yangpela Witnes i raitim pas na em i tok: “Ol yangpela long skul i mas kisim dispela buklet. Mi laik tok tenkyu tru long yupela, long wanem yupela bin wokim dispela buklet. Mi amamas, long wanem mi save Sosaiti i tingim ol yangpela na ol hevi i save painim mipela.”
[Ol Askim]
1. (a) Taim ol yangpela Witnes i go bek long skul long 1991, wanem ol nupela samting bai painim ol? (b) Ol yangpela Witnes i gat wanem gutpela wok ol inap mekim? (c) Taim yu skul long 1991, yu ken mekim wanem na bai yu kisim bikpela amamas moa?
2. (a) Jehova i laik bai ol yangpela i mekim wanem olsem Buk Song 148:12, 13 i tok? (b) Olsem wanem ol yangpela inap bihainim tok bilong Sindaun 27:11? (c) Sapos yangpela Witnes i bihainim gutpela pasin, wanem gutpela samting inap kamap?
3. (a) Ol yangpela Kristen i ken mekim wanem na bai ol i lain gut long autim tok? (b) Ol yangpela Kristen i mas mekim wanem na bai ol i bihainim pasin bilong Jisas na Timoti?
4. (a) Ol pikinini Witnes i ken mekim wanem na bai ol narapela skulmanki i litimapim nem bilong ol? (b) Ol papamama i ken mekim wanem bilong helpim pikinini bilong ol?
5. (a) Kolim sampela traim i painim ol pikinini Witnes long skul. (b) Famili i ken lukim wanem ol buk long famili-stadi bilong ol?
This article is repeated in km 1/93.