Bilong Go Bek Long Skul
1 Long mun Februeri ol pikinini bilong yumi bai go bek long skul. Bai ol i amamas long planti samting i kamap long skul, tasol i gat sampela samting em inap givim hevi long ol. Planti yangpela bai ol i gat nupela tisa na bai ol i stap long nupela klas, na ol i mas bung wantaim ol narapela yangpela ol i no save long ol. Tru, ol yangpela bilong yumi i laik wok gut wantaim ol tisa na toktok gut wantaim ol wanklas bilong ol, tasol ol i mas tingim dispela samting: Ol i mas givim baksait long olgeta samting em inap pundaunim ol long ol samting bilong spirit.—1 Ko 15:33.
2 Wanpela bikpela samting i olsem: Ol pikinini Witnes i mas sakim ol pasin bilong dispela graun i laik pulim ol long mekim pasin i no stret—long nau long planti kantri kain pasin olsem i pulap long planti skul. Ol Kristen, ol yangpela na lapun, ol i mas strongim bel na sakim pasin na tingting bilong dispela graun, olsem bilong maritpasin samting na ol kain samting olsem. Na tu, ol i mas was gut, na lukim ol tok bilong Baibel na larim dispela i soim rot long ol. (Sng 119:9) Ol gutpela papamama i mas save long ol samting pikinini i lainim long skul na bai ol inap helpim gut pikinini. Sapos samting pikinini i lain long en i pait wantaim pasin i holi na pasin bilong i stap klin, em lain bilong Jehova i mas bihainim, orait pikinini i mas sakim dispela samting.—1 Pi 1:15, 16.
3 Planti skul i mekim ol samting bilong litimapim kantri, na tingim ol holide, na spot, na ol bung bilong amamas. Buklet Skul na Ol Witnes Bilong Jehova inap helpim ol pikinini Kristen long ol dispela samting. Bilong helpim pikinini, gutpela sapos papamama i go lukim ol tisa na givim dispela buklet long ol. Ol i ken tok, dispela buklet bai helpim tisa long save i gat wanem as na ol Witnes Bilong Jehova ol i no insait long sampela samting i kamap long skul. Sapos tisa i kisim dispela buklet, dispela bai helpim em long wok gut wantaim papamama na pikinini.
4 Na gutpela tu sapos ol sumatin Kristen i putim buklet Skul i stap wantaim ol narapela buk bilong ol long skul. Taim klas i stori long sampela bilip bilong ol Witnes, ating rot bai op long pikinini i ken autim tok long ol sumatin i gat askim. Na tu, long olgeta taim kat “Medical Directive” o “Identity Card” i mas i stap wantaim pikinini Witnes. Ol samting ol i raitim long kat i mas stret; ol i mas raitim det long en, na nem bilong ol, na nem bilong tupela narapela i bin lukim ol i sainim nem bilong ol. Sapos ol i bihainim ol dispela tok, bai ol i olsem dispela ‘man i gat gutpela tingting em i save hevi i laik kamap long em na em i abrusim.’—Snd 22:3.