Wok Autim Tok—Em Gutpela Wok Tru
1 Wok bilong autim gutnius em i wanpela gutpela wok tru Jehova i bin givim long yumi. (Ro 15:16; 1 Ti 1:12) Yu tu yu gat wankain tingting? God i no givim gutpela wok bilong holim nem bilong em long olgeta man; long sampela tasol. Olsem wanem yumi ken amamas moa yet long dispela wok?
2 Wok bilong autim tok bilong Kingdom i no kirapim olgeta man long laikim ol Witnes, nogat. Planti ol i les na ol i no laik harim. Ating ol wanwok, na ol man i stap klostu long haus bilong yumi, na famili bilong yumi tu, ol i birua long dispela wok. Long ai bilong ol i olsem yumi bihainim tingting kranki na longlong pasin. (Jo 15:19; 1 Ko 1:18, 21; 2 Ti 3:12) Ol i save mekim tok na bai yumi no givim bel tumas long wok autim tok—ol i laik bai yumi slek o lusim dispela gutpela wok. Satan i laik bai ol man i kisim tingting nogut long dispela wok. (2 Ko 4:4) Olsem wanem long yu yet?
3 Yumi mas save, wok autim tok bilong Kingdom em i nambawan bikpela wok yumi mas mekim long nau. Long dispela rot tasol ol man inap kisim tok bilong helpim ol long abrusim bagarap na stap laip. (Ro 10:13-15) Bikpela samting i olsem: Maski ol man i no orait long yumi, God i mas orait long yumi. Tru, planti man i gat tingting nogut long wok bilong yumi long autim gutnius, tasol yumi mas strong yet long mekim, na no ken pret.—Ap 4:29.
4 Jisas i amamas tru long bihainim laik bilong Papa bilong em. (Jo 4:34) Em i givim em yet olgeta long mekim wok autim tok, na em i no larim ol birua na ol samting i laik pulim nabaut tingting bilong em i mekim na em i slek. Oltaim wok bilong autim tok bilong Kingdom i stap olsem nambawan samting long i stap bilong em. (Lu 4:43) Wan Pita 2:21 i tokim yumi long bihainim pasin bilong em. Sapos yumi mekim olsem, bai yumi stap “wanwok bilong God.” (1 Ko 3:9) Olsem wanem? Yumi insait tru long dispela wok? Yumi wok long painim rot bilong autim gutnius long ol haus na long kain kain taim na ples? Yumi stap ol Witnes Bilong Jehova, olsem na oltaim “maus bilong yumi mas litimapim nem bilong en.”—Hi 13:15.
5 Sapos yumi kisim stretpela tingting long wok autim tok, ating dispela bai kirapim yumi long mekim bikpela wok. Olsem wanem? Yumi pilim tru olgeta gutpela samting Jehova i bin mekim bilong helpim yumi? Sapos yumi tingim gut ol gutpela blesing yumi kisim long nau, na ol gutpela samting Jehova i tok promis long kamapim bihain, dispela bai helpim yumi long laikim moa yet Man bilong wokim yumi. Sapos yumi laikim Jehova olsem, dispela bai kirapim yumi na oltaim bai yumi autim tok bilong Kingdom na wok strong inap tru long skel bilong yumi.—Mk 12:30, 31.
6 Ol wok na tok yumi mekim long wanpela samting, i makim olsem yumi tingim dispela samting em i bikpela samting o nogat. Olsem wanem? Yumi pilim tru olsem wok autim tok bilong Kingdom em i wanpela gutpela wok tru? Yumi litimapim dispela wok? Maski man i birua long yumi, yumi tingting strong long mekim yet dispela bikpela wok? Sapos yumi pilim olsem em i wanpela gutpela wok tru, dispela bai kirapim yumi long givim bel olgeta long mekim dispela wok.—2 Ko 4:1, 7.