Amamas Long Wok Bilong God Yumi Holim
1. Planti man i gat wanem tingting long wok bilong yumi long autim tok?
1 Planti man long graun Satan i bosim, ol i ting wok bilong yumi long autim tok em i “longlong” wok. (1 Kor. 1:18-21) Sapos yumi no was gut, dispela tingting kranki inap mekim yumi bel hevi, na i pinisim amamas bilong yumi long autim tok. (Snd. 24:10; Ais. 5:20) I gat wanem ol as na yumi amamas long i stap olsem ol Witnes Bilong Jehova?—Ais. 43:10.
2. Olsem wanem wok bilong autim gutnius em i “wok holi”?
2 Wanpela “Wok Holi”: Aposel Pol i kolim wok bilong autim tok olsem “wok holi.” (Rom 15:15, 16) Olsem wanem wok bilong autim tok em i “wok holi”? Taim yumi insait long dispela wok, yumi kamap “wanwok” bilong “God holi,” Jehova, na dispela i helpim wok bilong mekim holi nem bilong em. (1 Kor. 3:9; 1 Pita 1:15) Jehova i tingim wok autim tok bilong yumi olsem “sakrifais” yumi mekim bilong “givim biknem” long em, olsem na wok autim tok em i bikpela samting insait long lotu bilong yumi.—Hib. 13:15.
3. Wanem samting i mekim na wok bilong autim gutnius em i wanpela gutpela wok?
3 Wok bilong autim gutnius em i wanpela gutpela wok em liklik lain tasol i amamas long mekim. Ol ensel bai amamas tru long mekim dispela wok na ol bai mekim gut tru. (1 Pita 1:12) Tasol Jehova i makim yumi ol sinman, olsem “ol sospen graun,” bilong mekim dispela gutpela wok!—2 Kor. 4:7.
4. Yumi ken mekim wanem bilong soim olsem yumi tingim wok autim tok i gutpela samting?
4 Putim Dispela Wok i Stap Namba Wan: Yumi laikim tru wok bilong autim tok, na yumi tingim em i “bikpela samting” long laip bilong yumi. (Fili. 1:10) Dispela i as na yumi save makim taim long olgeta wik long insait long dispela wok. Man husat i insait long tim bilong swim long Olimpik, em i save mekim trening na lainim gut pasin bilong swim bambai em i ken redi long swim long Olimpik gem. Olsem tasol, paslain long yumi go long autim tok yumi mas redi gut na bai yumi inap ‘mekim ol tok i stret taim yumi autim na kamapim mining bilong tok i tru,’ na bai yumi mekim “wok tisa” bilong yumi i kamap gutpela moa.—2 Tim. 2:15; 4:2.
5. Husat i amamas long wok autim tok bilong yumi?
5 Yumi no ken larim tingting kranki bilong ol man i daunim yumi. Planti man long teritori bai amamas moa long harim tok yumi autim. Yumi no mekim dispela wok bilong ol man i ken orait long yumi, nogat. Bikpela samting moa em Jehova i amamas long wok yumi mekim, na em i tingim tru gutpela wok yumi mekim.—Ais. 52:7.