Wok Bilong Autim Tok Bilong Kingdom—Wanpela Gutpela Wok Tru
1 Long olgeta de, planti bilion manmeri i kisim ol samting Jehova i save givim long ol bilong ol i ken i stap laip. (Mt. 5:45) Tasol i no gat planti man i mekim gutpela wok bilong autim gutnius bilong Kingdom Bilong God bilong soim olsem ol i tenkyu long Man Bilong Wokim ol. (Mt. 24:14) Yu save pilim tru dispela gutpela wok?
2 Wok bilong autim tok bilong Kingdom i litimapim nem bilong God na i givim bel isi long ol manmeri husat i tingting planti long ol hevi bilong nau, na i helpim ol long wetim gutpela samting bai kamap bihain. (Hi. 13:15) Ol man i laik harim tok bilong Kingdom, ol inap kisim laip oltaim. (Jo. 17:3) Wanem wok mani o namba inap givim kain gutpela samting olsem? Aposel Pol i tingim tru wok bilong em long autim tok na pasin bilong em long mekim dispela wok i kamapim klia dispela samting. Em i ting dispela wok em i wanpela gutpela samting tru.—Ap. 20:20, 21, 24; 2 Ko. 4:1, 7.
3 Amamas Long Gutpela Wok Bilong Yumi: Wanpela rot bilong soim olsem yumi amamas long wok bilong autim tok, em long rot bilong mekim gut dispela wok. Olsem wanem? Yumi save lusim haptaim bilong redim wanpela tok ol man bai pilim long bel? Yumi inap mekim gutpela wok moa long ol skripsa na toktok gut moa wantaim ol man? Yumi save autim tok long olgeta man long teritori bilong yumi? Yumi inap kirapim na lukautim wanpela Baibel stadi? Olsem ol Kristen i stap gut long God, long bipo na long nau, stretpela tingting i kirapim yumi long mekim wok, na yumi amamas long mekim dispela gutpela wok.—Mt. 25:14-23.
4 Taim yumi karim hevi bilong lapun, sik, o yumi gat sampela narapela hevi, em i mekim gut bel bilong yumi long save olsem pasin bilong yumi long givim bel long mekim wok autim tok i bikpela samting tru. Baibel i tok Jehova i tingim tru pasin bilong yu long taitim bun long mekim wok bilong em, maski ol narapela inap ting em i liklik samting tasol.—Lu. 21:1-4.
5 Wok bilong autim tok bilong Kingdom i givim bikpela amamas. Wanpela sista i gat 92 krismas, em i tok: “Em i wanpela gutpela samting tru long mi inap tingting i go bek long 80 yia samting mi bin mekim wok bilong God—mi no bel hevi liklik long wok mi bin mekim! Sapos mi inap kamap yangpela gen na kirap mekim ol samting, bai mi bihainim wankain pasin tasol, long wanem, ‘laip bilong dispela graun i gutpela, tasol marimari bilong God i nambawan tru.’ ” (Sng. 63:3) Yumi tu i laik amamas long dispela gutpela wok God i bin givim long yumi—em wok bilong autim tok bilong Kingdom.