Yumi Bin Kisim Wanpela Gutpela Samting Tru
1 Aposel Pol i tingim tru wok autim tok God i bin givim long em na em i tok dispela wok em i “gutpela samting tru.” (2 Ko. 4:7) Em i karim ol hevi na ol man i birua long em taim em i mekim dispela wok. Em i wok strong long autim tok long ol man em i bungim. Em i raun planti taim long ol rot na solwara we i gat hatwok na em inap kisim bagarap long en. Olsem wanem yumi ken bihainim pasin bilong Pol na soim olsem yumi amamas tru long wok autim tok bilong yumi? (Ro. 11:13) Wanem samting i mekim na wok autim tok bilong yumi em i nambawan gutpela samting tru?
2 Nambawan Gutpela Samting: Planti taim ol gutpela samting bilong graun i save kamapim bikpela bel hevi na inap helpim man inap liklik taim tasol. Tasol wok bilong yumi long autim tok i helpim yumi na ol narapela man inap oltaim oltaim. (1 Ti. 4:16) Em i helpim ol man i gat gutpela bel long kisim save long Jehova, senisim sampela pasin bilong ol, na ol i ken bilip na wet long kisim laip oltaim. (Ro. 10:13-15) Taim yumi ting wok autim tok i gutpela samting tru, i stap bilong yumi i gat as tru bilong en, yumi pilim olsem yumi mekim gutpela wok, na yumi ken wet long gutpela samting bai kamap bihain.—1 Ko. 15:58.
3 Soim Olsem Yu Tingim Tru Gutpela Samting Yu Holim: Sapos yumi ting wanpela samting i bikpela samting tru, bai yumi redi long lusim planti samting bilong kisim dispela samting. Man! Em i wanpela gutpela wok tru long lusim taim na strong bilong yumi bilong litimapim nem bilong Jehova! (Ef. 5:16, 17) Ol samting yumi save lusim taim long en i mas soim olsem yumi save tingim ol samting bilong spirit i winim mani kago samting. Yumi gat wanpela gutpela tok bilong autim, olsem na yumi amamas long mekim olsem, na yumi redi long autim dispela gutnius long olgeta taim rot i op.
4 Ol man i no save haitim ol gutpela samting tru i gat bikpela pe, nogat, ol i save putim long wanpela hap we ol man i ken kam na lukim. Sapos yumi ting wok autim tok bilong yumi i wanpela gutpela samting tru, dispela bai i stap ples klia long wokabaut bilong yumi. (Mt. 5:14-16) Yumi amamas tru na oltaim yumi bihainim pasin bilong aposel Pol na soim olsem yumi ting wok autim tok bilong yumi i wanpela gutpela samting tru.