Yumi Amamas Long Ol Wok Lotu Bilong Yumi!
1 Kirap long bipo yet na i kam inap long nau, Jehova i bin givim kain kain gutpela wok long ol wokman bilong em. Em i bin givim wok long ol maski ol i man o meri, o ol i gat hamas krismas, o ol i gat nem o nogat. (Lu. 1:41, 42; Ap. 7:46; Fl. 1:29) Em i save givim wanem ol gutpela wok long yumi long nau?
2 Sampela Gutpela Wok: Wanpela gutpela samting em skul yumi kisim long Jehova. (Mt. 13:11, 15) Narapela gutpela samting em yumi ken litimapim nem bilong Jehova long rot bilong bekim tok long ol miting bilong kongrigesen. (Sng. 35:18) Taim rot i op long yumi bekim tok, yumi save givim bel long mekim. Na i wankain tu long ol wok yumi kisim insait long kongrigesen, sapos yumi tingim ol dispela wok olsem gutpela samting, bai yumi mekim gut ol dispela wok inap tru long skel bilong yumi. Olsem wanem? Yumi save amamas long insait long wok bilong klinim na stretim Haus Kingdom?
3 Planti milion manmeri i save tingting planti olsem God i save harim beten bilong ol o nogat, tasol Man i winim olgeta narapela man long heven na graun, em i save harim ol beten bilong yumi. (Snd. 15:29) Jehova yet i save harim beten bilong ol wokman bilong em. (1 Pi. 3:12) Em i no putim mak long hamas taim yumi ken beten long em. Yumi inap long beten “oltaim” long em, na dispela em i wanpela gutpela presen tru.—Ef. 6:18.
4 “Wanwok Bilong God”: Wanpela gutpela wok tru yumi ol “wanwok bilong God” inap mekim em long autim gutnius bilong Kingdom Bilong God. (1 Ko. 3:9) Em wanpela wok yumi save kisim amamas na nupela strong long en. (Jo. 4:34) I no olsem Jehova i mas mekim wok long ol man bilong mekim dispela wok, tasol em i bin givim dispela wok long yumi, long wanem, em i laikim tru yumi. (Lu. 19:39, 40) Jehova i no bin givim nating dispela wok long olgeta kain man. Ol man i insait long wok bilong autim tok ol i mas inapim sampela mak bilong spirit. (Ais. 52:11) Olsem wanem? Yumi save kamapim klia olsem yumi amamas long mekim dispela wok, na yumi putim dispela wok i stap bikpela samting yumi save mekim long olgeta wik?
5 Ol gutpela wok Jehova i givim long yumi i mekim na laip bilong yumi i gat as tru bilong en. (Snd. 10:22) Yumi no ken ting ol dispela samting i samting nating! Taim yumi kamapim klia olsem yumi amamas long ol wok lotu bilong yumi, yumi mekim Papa bilong yumi long heven i amamas, em Man Bilong Givim “olgeta gutpela samting . . . na olgeta presen i gutpela tru.”—Jem. 1:17.