Yumi Mas Givim Bel Yet Long Wok Autim Tok
1 Kirap long 1992 na i kam, long olgeta yia ol Witnes Bilong Jehova i bin lusim inap olsem 1 bilion aua long wok bilong autim tok bilong Kingdom na kamapim ol disaipel long olgeta hap. Yumi amamas tru long yumi bin insait long dispela gutpela wok tru, a?—Mt. 28:19, 20.
2 Yumi tenkyu na litimapim nem bilong Jehova long olgeta dispela wok yumi bin mekim. Em i bin helpim yumi long mekim wok autim tok long dispela ‘taim bilong planti hevi nogut tru.’ (2 Ti. 3:1) Yumi mas mekim wanem bambai yumi ken givim bel yet long mekim dispela bikpela wok?
3 As na Yumi Givim Bel Long Wok: Pasin bilong laikim tru God na ol narapela man, na laik bilong yumi long truim dediket bilong yumi, dispela i kirapim yumi long mekim wok bilong Kingdom. (Mt. 22:37-39; 1 Jo. 5:3) Pasin laikim i kirapim yumi long daunim sampela laik bilong yumi yet bambai yumi ken mekim bikpela wok bilong autim tok.—Lu. 9:23.
4 Wok Strong Long Givim Bel Yet: Birua bilong yumi, Satan, em i mekim olgeta samting em inap mekim bilong daunim pasin bilong yumi long givim bel long wok autim tok. Sampela samting em Satan i save yusim bilong daunim yumi, em ol man i les long harim tok, ol samting bilong dispela graun i laik pulim yumi, i gat ol hevi bilong wan wan de, na yumi wari long sik i wok long bagarapim helt bilong yumi.
5 Olsem na yumi mas wok strong long holimpas pasin bilong givim bel long wok autim tok. Em i bikpela samting long yumi kamapim pasin laikim yumi bin i gat taim yumi bilip nupela. Bilong mekim olsem, oltaim yumi mas ritim na tingim tingim long bel Tok Bilong God, em Baibel, na mekim wok long olgeta samting Jehova i givim bilong strongim bilip bilong yumi long rot bilong “wokboi i gat gutpela tingting.”—KTH 2:4; Mt. 24:45; Sng. 119:97.
6 Olsem ol tok profet bilong Baibel i kamapim klia, de bilong Jehova long bagarapim ol man nogut i wok long kam hariap. (2 Pi. 2:3; 3:10) Yumi tingim dispela samting na yumi wok strong long givim bel na insait tru long wok bilong autim tok bilong Kingdom na kamapim ol disaipel, em dispela wok i kamap long nau long olgeta hap bilong graun!